الأربعاء، 30 أبريل، 2014

مقتطفات نسائية (17)



يا رجلاً يؤلمني حضوره ويذبحني  بعاده.
رجل المتناقضات حضرتك على عرش قلبي.
لا أقوى على الفراق ولا أجرؤ على الاقتراب.
--------------------------------

والآن أصبح قلبي مستعداً لاستقبال نفحات الحب.

---------------------------

عارف ليه؟.
لأني عارفة أن مهري غالي عليك.
وأخاف أقولك طلباتي ماتنفذهاش ..
أنا عارفة أنك تقدر لكن هتستخسر.
أخاف وقتها الفرحة ماتكملش والحلم يبقى كابوس.
كان نفسي فوي تطمني..
كان نفسي أبقى ضامنة حبك لدرجة تخليني أتحدى خوفي.
كان نفسي تحبني زي ماحبيتك.
بس تعرف أنا مش هعمل زيك وأدور على حد تاني يشاركني حياتي..
لأنك مالي عيني قوي حتى لو مش معايا.
و لأنك أغلى عندي من إن حد ممكن يشاركك قلبي.
--------------------------------------

لا هستجدي قلبه ولا هترجى حبه.
مشاعري ليه هو مالوش علاقة بيها.
دي حاجة بيني وبين نفسي.
وهو مش ملزم تجاهي بأي شيء.

----------------------------

عايزة يبقى ليا حفيدة علشان أحكي لها حاجات كتير مش هينفع أحكيها لبنتي.

-----------------------

نعم كنت ممل، وحينما قارنت بينك وبينه فى البداية رجحت كفته؛ فهو لديه القدرة على خلق حوارات شيقة،كان يثير رغبتي في التحدث بلا توقف، لم أشعر يوماً بالوقت في صحبته.
ولكن لأن النهايات هى من تحكم على نوع الشخصيات؛ فأنا أعرب لك عن اعتذاري، فلا وجه للمقارنة بينكما؛ فأنت احترمتني وحاولت أن تحتفظ على شعرة تربط بيننا من المودة، أما هو فقد كاد يسلبني اعتزازي بنفسي.

--------------------

قد أكون لا أعني لك شيئاً ولكنك تعني لي الكثير.

------------------------

لأنك لم تهديني شيء فما يذكرني بك الآن هو هدايايا أنا لك.
أذكر الهدية بمناسبتها بانطباعك عنها.
وهذا ما يؤسفني الآن لأنك لم تكن تستحق.

---------------

أود إخباره بأن رصيده لدي قد نفد وعليه أن يشحن سريعاً قبل انتهاء فترة السماح،
 ولكن كرامتى تأبى إخباره.

-------------------

فلتذكر جيداً..
لقد حاولت جاهدة الحفاظ على ما بيننا تحت أية مسمى.
ولكن مهما كانت قوة المركب ورغبتها في الإبحار إلا أنها لن تستمر طالما تستخدم مجدافاً واحداً.







الثلاثاء، 29 أبريل، 2014

سانتا كلوز



هتجيب لي إيه السنة دي يا بابا نويل.
يا ترى هتخلي حبيبي يصالحني وييجي يراضيني.
ولا هتخليه يفضل فاكرني بقية عمره.
ولا هيكتب لي رسالة يحكي لي فيها عن إحساسه ببُعدى.
ولا هيكتفي بإرسال بطاقة تهنئة.
ولا مش هيعمل حاجة خالص وهيقول أن الكريسماس حرام.
أنا عايزة صورته يا بابا نويل.
ومش أي صورة، أنا عايزاها أحدث صورة ليه.. ممكن تجيبهالي.








الاثنين، 28 أبريل، 2014

مبررات سخيفة




(1)

قال بكل فخر وأنا بواجهه بقسوته المتعمدة معايا :
"كنت قاصد أديكي خبرة في مواجهة المواقف الصعبة.. قوليلى بقى اتعلمتي ايه؟".

- اتعلمت إن عمري ما أثق فيك ولا اعتمد عليك في أي حاجة تاني.


(2)

"صدقيني مكنتش عايز ده كله يحصل"

أمال لو كنت متعمد كنت عملت إيه؟.

ما تتكلمش عن قدر الله في اللى حصل بينا، فراقنا كان قرارك.


(3)

"لأنك تستحقين الأفضل"

أنت بالنسبة لي الأفضل.. لو مش أنت يبقى مفيش حد..
 فيرضيك يبقى مفيش حد.. تعالى أنت بقى وخلاص.


(4)

 تصدق كنت حاسة إنك هتقول كده:
" تليفوني ضاع ياقلبي ورقمِك ماعدتش معايا".

من يومك كذاب وأنا ماعدتش عايزة أشوف وشك تاني.


(5)

 "رسايلك مابتوصلنيش"

قال يعني لما كانت بتوصلك كنت بترد!!.







الأحد، 27 أبريل، 2014

لن أقول



"قولي أحبك كي تزيد وسامتي فبغير حبك لا أكون جميلا"

حتى وإن لم أقلها فأنت في نظرى دوماً جميلا.

حتى وإن لم أقلها ألم تكون دقات قلبي لك رسولا.

حتى وإن لم أقلها ألن تكون لي عاشقاً مفتونا.

لا تنتظرها مني فقلبي أصبح منك خجولاً.







السبت، 26 أبريل، 2014

الرقصة الأخيرة



سترقص على أشلائي أعدك.
وأنا لا أخنث الوعد مثلك.
ستكون ليلة صاخبة لم تشهد مثلها ولن تشهد.
سأساعدك على العبث بجسدي.
وسأجعلك تغرس إبرة الوشم لتنول مرادك وتتلذذ بقطرات دمائي وهي تخضب روحي المهدرة.
سأرقص كالطير المذبوح..
أعلم أن هذه الرقصة تثيرك ولكني أحذرك أن تتناثر عليك دمائى فتغضب.
سأساعدك على خلع قناع الفروسية لتصبح بحريتك دون زيف.
أريدك على طبيعتك الذئبية كما سأكون على طبيعتي الزومبية.
لا تنزعج مما سأصير عليه فهذه رغبتك وقد حققتها لك.
لا تنتظر ظهور أنيابي فلست مصاصة دماء..
لا تخشى شيئاً يا صغيري فلن أؤذيك..
فقط سأقضي معك رقصتنا الأخيرة ..
 فهل تقبل؟.





الجمعة، 25 أبريل، 2014

شقا عمري



- بيني وبينك قصة حب لن يفهمها أحد.
كم أعشق تفاصيلك.. وكم أهوى صوتك.. وكم يجذبني راحتي معك وفهمي لك..
 حتى النقص في بعض إمكانياتك لا أراها.
يعجبنى انتمائك لي وارتباطي بك.
أنت الوحيد المسموح له بإيقاظي بل ومشاركتي وسادتي أيضاً.
أنت الوحيد الذي يرافقني في كل خروجاتي ويحضر معي ندواتي ومؤتمراتي بلا كلل أو ملل.
أنت الوحيد الذى أشعر تجاهه بأنه أغلى ما امتلكت يوماً ولمَ لا وملكيتك معي من أول مقابلة لنا.
أنت الذي استطعت أن تقلقني عليك حينما أصابتك وعكه لدرجة جعلتني لا أدعو لك فقط بل طلبت من الجميع أن يدعوا الله بأن تعود لي سالماً.
نعم لا أهتم بالاحتفال بيوم مولدي ولكني أجهز للاحتفال بيوم لقائنا قبلها بأسابيع..
 أحضر التورتة والحلويات والبالونات والشموع بعدد سنين بقائنا سوياً..
 بغض النظر أني بطفي الشمع معاك لوحدنا وإن المدعوين للحفلة لا يهتمون سوى بتناول الحلويات فقط ويتركوني وحيدة إلى أن أجهز الأطباق وأحضرها لهم إلا أني انتظر كل عام هذا اليوم.
أنت الذى احتار في اختيار هدية تليق به وما يؤسفني حقاً بأن مستلزماتك لم تعد متوفرة فى الأسواق.
أنت الذى أدعو الله أن تظل معي طوال حياتي وألا تكون لأحد بعدي.
موبايلي الحبيب..كن بخير دائما من أجلي.
فأنا أحبك كثيراً.

الخميس، 24 أبريل، 2014

عودة الغائب



(1)

بتلف العالم من غيري يا حبيبي .
طيب خد بالك من نفسك يا نور عيني.
وإياك تكلم ولا حتى تسلم على أي بنت.
وعايزة هدية تذكارية من كل بلد.
ومعاها كارت تكتب فيه إحساسك وقتها.
واتصور كتير يا عمري
 علشان لما ترجع تحكي لي أبقى حاسة أني  كنت معاك.
ترجع بالسلامة يا نبض قلبي.

--------------------

(2)

أحلى شعور في الدنيا.
لما تكون لسه بتفكر في حبيبك.
وتلاقيه يبعت يقولك إنه وصل لأرض الوطن.
بتبقى جواك مليون كلمة ومن الفرحة يطير الكلام.
بتبقى عايز تملي عينيك بيه وتسأله جاب لك إيه.
بتبقى عايز تسمع منه وتحكيله.
بتبقى طاير من الفرحة .
وفي نفس الوقت بتبقى عايز تبص في عينيه أوي وتشوف في حد غيرك جواهم ولا لأ.
بتبقى عايز تفتح قلبه وتشوف مكانك لسه محتفظ برونقه ولا الغربة زحزحته من مكانه.
وبعد كل ده هتلاقي نفسك بترد عليه وتقوله.
الله يا حبيبي على صورتك.
فرحت أوي لما شوفتك.
قلبي كان لسه في سيرتك.
وروحي سألتني عليك.
قلت لها أكيد نسي عشقك.
ومل من سؤاله عليك.





الأربعاء، 23 أبريل، 2014

فوقي


هي زوجته وأنتِ عشيقته.
هي دُنيته وأنتِ نزوته.
هي شرفه وأنتِ عاره.
هي سيارته وأنتِ سيجارته.
هي اللي في النور وأنتِ اللي في الضلمة.

شوفي تحبي تكوني أية واحدة فيهم.





الثلاثاء، 22 أبريل، 2014

علاج لا يباع







جسدي  يستغيث طالباً الزواج.
ليس حباً في الموضوع بصفة عامة.
فشغل البيت من أبغض الأعمال إلى قلبي،وصُحبة رجل تجلب الشقاء .
ولكن لإن هرموناتي في حاجة ماسة لذلك.
الطريق الوحيد لعلاقة جنسية مشروعة هو الزواج.
فماذا عليَّ أن أفعل وهذا الطريق غير متاح.
أصبر نعم، وأقوى على شهوتي.. كل هذا سهل .
الغير متاح أن هرموناتي ليس لها علاقة بذلك.
الطبيبة أخبرتني بأن علاجي في الزواج ونسيت أن تخبرني أية الصيدليات التى أستطيع من خلالها جلب هذا الدواء.







الاثنين، 21 أبريل، 2014

جرعة صغيرة تكفي



ليتك تعلم بأنني أستمد قوتي منك.
جرعة حنان قليلة منك كفيلة بأن تمدني بقوة أتحمل بها طلبات الصغار التي لا تنتهي.
مجرد كلمة حلوة تبث في نفسي نشاط وطاقة تجعلني لا أمِل من مهام المنزل التي لا تنضب.
ابتسامتك في وجهي تجعل يومي أحلى.
نظرتك الحانية تجعلني أفعل أي شيء تحبه فقط لأرى سعادتك.
زوجي الحبيب لا تبخل عليَّ بحبك قولاً وفعلاً.







الأحد، 20 أبريل، 2014

مقتطفات نسائية (16)



"صدقيني أنا ماخنتكيش"
ماهي المصيبة أنك مش حاسة أنك خنتيني.

-----------------------

ليتك تعلم أن جميع الأشياء في العالم يمكن تأجيلها عدا وقت احتياجي لك.

--------------------------------

أيوة عايزاك تفاجئني بحاجة بحبها بس من غير ما تسألني أنا بحب إيه.

--------------------------------------


عارف يعني إيه أحبك؟.
يعني القليل منك يرضيني.

وعارف يعني إيه ما أحبكش؟.
يعني القليل منك يخنقني.

------------------------------


ندمانة على كل كلمة حلوة قلتها له
ندمانه على كل صورة حسيتها بعتها له

-------------------------- 

يسألني كيف تحترفين صناعة القهوة هكذا ولا تشتهيها ولا يثيرك فضولك لتتذوقيها
فأجبته بأنني بالفعل أتذوقها حينما أجدك تغمض عنيك بنشوة حين ترتشف أول رشفة.

-----------------------

- لا أعلم سر انجذابي إليك .. هل يلعب قانون تضاد الأشياء دور في مشاعرنا.

-----------------------

- أريدك أن تحبنى كابنتك .. تخاف عليَّ وتحميني.
أريدك أن تحبني كعشيقتك.. تستمتع بجسدي وتأكلني بنظرات شهوتك.

-------------------

- أرى أن زيجتنا أصبحت باطلة فقد تزوجتك اعتقاداً مني بأنك قادراً على أن تأخذ بثأر أخي؛ لا أن تسير على خطى القاتل.

-----------------------

- بدل ما كنت تستغل حبي ليك كنت حافظ عليه.










السبت، 19 أبريل، 2014

عني (10)






كالشتاء أنا؛ أحب الرسميات في التعامل، ولذلك عليك أن تستعد جيداً لقدومي،
وتختار بعناية ماترتدي لمقابلتي.
عليك أن تحترم مواعيدك معي فلست كالصيف الذي يسعد بالمقابلات مهما تأخر الوقت.








الجمعة، 18 أبريل، 2014

يوتوبيا زائفة






(1)
دايماً كنت بحلم أعيش في المدينة الفاضلة.. ولما شوفتك لقيتك بتتكلم عنها.. حبيتك أوي من أول كلمة قلتها، واتمنيت يكون لي معاك نصيب.. ودعيت ربنا أوي يجمعنى بيك وألاقيك بتطلب إيدي.. وحصل وطلبت إيدي ووافقت عليك من غير تفكير..
 كنت كأني مُغيبة ووهمت نفسى بأني عايشة فعلاً في المدينة الفاضلة وكنت بغلط نفسي وأقول أكيد هو صح حتى لو مش مقتنعة بكلامك وبأفعالك..
 أصلي صدقت الفكرة اللي أنت حاولت تزرعها يمكن أكتر منك.. ومع الوقت اتضح أن كل دي مظاهر فارغة ،وأنك مش نبي؛ أنت بس عايز تبان إنك كويس قدام الناس، واكتشفت كمان أن أنا اللي ساذجة زيادة عن اللزوم لأني صدقت إن ممكن أعيش في الدنيا في مكان يشبه المدينة الفاضلة ويكون جنة الله على الأرض .

----------------------
(2)
حينما زال البريق عنك رأيت الصدأ بداخلك ويالصدمتي وقتها؛ ليس من أجل خيبة أملي فقط، ولكن لأني تحدثت عنك كثيراً، وجعلت الوفود تأتي إليك ظناً مني بأنك معدن خام أصيل.. عذراً للجميع فلم أكن أعلم حقيقته إلا بعد معاشرته فوقتها لم يكن بحاجة لارتداء أية قناع، فقد أخذ مني ما أراد ولم يعد يعنيه صدمتي في شيء.

-------------------------------
(3)
وبعد انتهائك من خطبتك العصماء عن ثواب من يبدأ بالسلام، ومن يسأل عمن هوغاضب منه ،وعن القلب الأبيض ،وعن...، وعن....، وعن...
 توقعتك هتطبق ده معايا وتحاول تصالحني وتراضيني وخصوصاً أن عتابى ليك كان صريح ومباشر ولا يحتمل معنى آخر غير إني زعلانة منك..
 ولكنك كالعادة رجل كلام وليس أفعال..قدام الناس تقول أحلى كلام ودى أكتر حاجة بتعرف تعملها أنك بتتكلم وبس.. بتوعد وبس ..لكن الفعل مفيش.

----------------------------------
(4)
أيوة مشيت وراك وأنا مغمضة وكانت النتيجة أني وقعت في حفرة ملهاش قرار،
واتحولت فرحتي بيك لقهرة،واتحول الحلم لكابوس.
حرام عليك.. ليه عملت فيا كده!.
----------------------------------
(5)
مشكلتي أني لسه فاكرة تفاصيلي الصغيرة معاك.. فاكره كل موقف بتاريخه، وكنت لابسه إيه، حتى الحلم اللي حلمته ليلتها وأنا نايمة برضه فاكراه..
فاكره وعودك الكذابة ليا اللي كنت مصدقاها.. فاكره أني ماكنتش عايزة منك حاجة أكتر من اللى كنت بتديهولي أصلك كنت مالي عينيا أوي..
 لأ ماكنتش مالي عينيا ولا حاجة أنا اللي ماكنتش طماعة وكنت راضية بقليلي..

--------------------
(6)

ما تقولش إن أنا اللي طلبت الطلاق لإن كل تصرفاتك معايا قالت إنك طلقتني..ولما لقيت إن اللي بينا ماعدتش غير ورقة قلت مابدهاش بقى .. الورقة تتقطع وكل واحد يروح لحاله.. خناقتنا دلوقتي على المؤخر اللي أنت مش عايز تديهولي، وأنا بعد إحساسي بكرهك ليا مش عايزة منك حاجة ..بس عمري ما هسامحك على كل حاجة.. لا على معاملتك ليا ،ولا على حقي اللى كلته عليا.. بس ما اتفكرش أنى هخرج من حياتك كده.. ده أنا هفضحك قدام كل اللي بيتعاملوا معاك علشان يعرفوا حقيقتك المتدنية.

-----------------------------


(7)
- مش مزعلني أنك مارديتش عليا، ومش مزعلني أنك كذاب ومالكش كلمة معايا، ومش مزعلني أنك بتماطل ترجع لي حقي، اللي مزعلني إنهم قالولي عنك كده وأنا ماصدقتهمش.

---------------------------


وفجأة لقيتني مكسوفة أقول للناس إني كنت على ذمتك في يوم من الأيام.






الخميس، 17 أبريل، 2014

أهي ماتت




(1)
لم تقرأ رسالته فقد ماتت إثر سكتة قلبية فقد أحبته بل عشقته قبل حتى أن تراه.
 روحها هامت به وقلبها الصغيرلم يتحمل كل هذا الوجع الذى تسبب فيه بعاده عنها، وهى على يقين بأنه لن يرسل شيئاً يهدئ به قلبها، وهذا جعلها لا تتبع صندوق بريدها الخاص حتى لا تصاب بخيبة أمل بعد كل مرة تجده فيها فارغاً..
ما لم تكن تعلمه بأنه أرسل لها رسالة عشق واعتذار بعد ساعات من قرارها بعدم الإطلاع على الرسائل الواردة..
غضب من تجاهلها وقرر الابتعاد النهائي وحينما علم بوفاتها عاد إلى البيت حزيناً، غير مصدق ما حدث وأطلق نظرة على صندوق البريد واتفاجئ برسالته كما هي وشعر بروحها تخترقه قائلة "أنت اتأخرت عليا أوي"
فقد كانت رسالتك نبض الحياة لماذا بخلت عليَّ بها.

--------------------------------
(2)

من حقك ألا تصدق أنها بعدك قد ماتت بالفعل.

لأنك لم تكن تعلم بأنك تلهو بفتاة كانت في فترة النقاهة بعد خروجها من جراحة مميتة واستهتارك بمشاعرها  أدى لإنتكاستها..فقد كنت بالنسبة لها طوق النجاة الذي وجدته بعد ما فاقت من التخدير، وبُعدك المفاجئ عنها كان بمثابة سحب أنبوب التنفس الصناعي منها على حين غرة فلم تملك وقتها سوى الموت.
وكأنه جاء سريعاً لانقاذها من براثن قربك المفترس.

-----------------------------
(3)

اطمن أنت موتني خلاص ،وحركتي تحت إيدك دي حلاوة روح مش أكتر..
أصلك بعد ما دبيت فيا الروح، وخليتني أحس بطعم لحياتي من تانى جيت بكل بساطة وحطيت إيدك على أنفي لتكتم أنفاسي وتموتني فطبيعي أقاوم شوية قبل ما روحي تطلع.. لكن ماتقلقش مقاومتي مش هتستمر كثير..
 أصلك ماتعرفش أني بعاني من صعوبة في التنفس أصلاً يعني مش هاخد منك وقت كتير.



الأربعاء، 16 أبريل، 2014

حرفك





 أحب حرف اسمك.. لا تنتشي هكذا فسآتي لك بالسر حالاً.
أصله مقلوب حرفي.. ولهذا كانت نظرتي له فلسفية محضة.
ولا يخفى عليك أن أفضل أنواع السيارات بالنسبة لي كان BMW.
كان هذا وقت ما أردت أن يصير حرفي جوار حرفك.
ولكن حينما تعمقت في معنى انغماس الحرفين معاً وجدته سيضفي رونق غامض لن يفهمه سوانا.
ولأني مهووسة بحرفي وطوال الوقت كنت أكتبه منذ أن كنت في المرحلة الثانوية.
هذا غير وجوده في:
خاتمي الفضي،
سلسلتي الذهبية ،
وسلسلة موبايلي،
وبوستر ميكي ماوس في غرفتي.
كل هذا وأكثر كل ما عليَّ فعله أن أنظر تجاه حرفي لأجده صار حرفك بفعل وضعيته .
-ككلمة الإسعاف التي تكتب مقلوبة حتى تظهر في مرآه السيارات معدولة-
ولكن أوتدري شيئاً كان هذا في الماضي فلم أعد مهووسة بحرفي كالسابق.
فقد أصبحت مهووسة باسمي كاملاً، وهذا يعني أن حرفك لم يعد مهم بالنسبة لي؛ فجماله كان يكمن في حرفي.






الثلاثاء، 15 أبريل، 2014

عن الإنجاب


من غير المعقول أن أنجب فقط لأرضي حماتي.. أنا لست مستعدة نفسياً الآن لهذه المهمة الشاقة فمن حقي أن أستمتع مع زوجي بحياتنا فترة قبل إزعاج الأطفال.
أنا من ستحمل وستنجب وستسهر وستربي ..هي فقط ستراهم في المناسبات..
 إذن فمن حقي وحدي أن أحدد الوقت المناسب لي بعيداً عن رغباتها..
 وأرجو أن تتوقف عن التدخل في حياتي.

---------------

زوجي يشتاق للإنجاب وكأنه تزوج خصيصاً لأجل هذا الهدف؛ ليس رغبة منه في تحمل مسئولية تربية طفل ،ولكن حتى يظهر أمام الجميع بأنه كامل الرجولة ويستطيع الإنجاب.. أنا أتوق لهذا لإن غريزة الأمومة بداخلي قد بلغت أقصاها ولكن ليس الأمربيدي فهذا بيد ربي.. ليتك تعلم يا زوجي بأني مشتاقة أكثر منك بمراحل. 
ليتك تعلم بأن إصرارك المبالغ فيه لذهابنا لطبيب في أول شهر زواج يؤلمني.
ليتك تعلم بأن أول الألعاب بالنسبة لي كانت بممارسة دور الأم على عروستي.
ليتك تعلم رغبتي في أن أشعر بأنك تحبني أنا سواء استطعت الإنجاب أم لم أستطع.
ليتك ترضى بقضاء الله مهما كان فأنا ليس لي ذنب.

--------------------

ماذا يحدث لو ان الناس توقفت عن التدخل في شئون الآخرين ..
 يهمهم إيه إذا كنت حملت ولا لسه؟.
يهمهم إيه إني روحت للدكتور ولا لسه؟.
حياتي الخاصة تهمهم في إيه أنا عايزة أفهم.

---------------

في انتظار نتيجة اختبار الحمل وكأني انتظر نتيجة الثانوية العامة.






الاثنين، 14 أبريل، 2014

معاهدة سلام



رفض الحبيبة لطلب الحبيب في مسك إيديها
مايدينهاش
نظرة حبيبها لغيرها هي
ماتقبلهاش
ترفض تكون في عينيه زي غيرها
ماتسواش
عايزة حياتها معاه شروطها فيها
مايخدعهاش
عايزة في لحظة حبه ليها
 تكون غالية عليها
ماتنسهاش
عايزة تكون واثقة فيه
ولو قالوا لها عنه إيه
تقول لأ
 مايعملهاش
لو كان حبيبها هيقدرعليها 
هتقوله أهلا
ماتستناش
روح كلم بابا 
وماتنساش
تجيب عيلتك
وعيلتي سيبها عليا
ولو قالوا لأ
 ماينفعهاش
هقول ليه؟
ماهي شروطي واضحة عليه
الضرة في حياتي 
مايجيبهاش
والغيرة والشخط والنطر
 مافيناش
ولو في غضبك شخط فيا
 ماتزودهاش
وأني في حياتك حاجة غالية عليك
ماتسيبهاش
وإن في حياتنا قالوا وقلنا
مايلزمناش
وإن تدخل عيلتي وعيلتك في حياتنا
ماينفعناش
بس وجودهم في حياتنا أساسي 
ما نستغناش
والصلاة فرض أساسي 
مانفوتهاش
فردوا وقالوا
بدل عايزها هنديهالك 
ماتزعلهاش
وماتتأمرش عليها 
ماتخنقهاش
دي بنت عز وعلينا غالية
ماتبهدلهاش
ولو قالوا ده جواز وعرف ودين
وعِشرة عمر مش سنتين
فكري تاني
هقول وليه؟
ماهو شاريني وحبه ليا باين عليه
لما طلبني ودخل البيت
وقاللي أنا يا ما اتنميت
ألاقي زيك مالاقيت
وأقعد جنبك وأتمنى قربك
وأمسك إيدك وأضمك ليا
بعد موافقتك عليا
وكتب كتابك ليا
وإذا كان ع العيلتين فموافقين
وإذا كان عليا
هشيلك في عينيا
معرفتش أرد وأقول
بس السكوت
علامة القبول.

الأحد، 13 أبريل، 2014

النهاية واحدة



شايفة نهايتي معاك؛ أصلها تشبه نهايتى معاه.
نفس التفاصيل..
 البداية كان مبين أنه شاريني.
ونفس الطباع ..أنانية وغرور ونفاق وإهمال.
ونفس سذاجتي.. بديله فرصة يمكن يتغير ويبقى كويس.
ونفس سبب الفراق.. واحدة تانية غيرته عليا.
ونفس الخيانة.. هو سرق شقتي وأنت غيرت الكالون
ونفس الكذب.. فرشلي الأرض ورد ووعدني ألف وعد.
والنهاية أنه كرهني في عيشتي لحد ما قلت حقي برقبتي.

يا لكم من أوغاد لا تستحقون نعمة الحياة.






السبت، 12 أبريل، 2014

نسخة مُصغرة






أن الكلمات التي تتفوهين بها أمام أطفالك حتى وإن كانت مزاح تعتبر رسالة منك لأولادك لكيفية نطق الكلمات واستخدام العبارات وانتقاء المصطلحات.
والتعبير عن كل انفعالاتهم سيكون بمقتضي تقليدك في هذا الموقف.
فأنتِ المرجع الرئيسي للتعامل مع من حولهم بما فيهم أنتِ، فالعالم يروه من خلالك.
وأية حركة صغيرة ستنطبع تلقائياً في ذاكرتهم ، وقد يفاجئونك بها أمام شخص تدعين أمامه بأنك سيدة الإتيكيت الأولى.

نصيحة :اعلمي أن أبنائك أجهزة رادار متحركة تخبر الآخرين عن أدق تفاصيلك.





الجمعة، 11 أبريل، 2014

قلة العرسان



- معندكيش عروسة؟.
- آه طبعا عندي .. لمين؟
- ليا.
- أه.. بس اللي عندي أنت ماتنفعهاش.
- ليه بقى هي تطول ولا حد أصلا لاقي عرسان.
- طيب قولي أنت ازاي هينفع.
هي عايزاه يتقي ربنا فيها وأنت مابتركعهاش.
هي عايزاه مابيشربش سجاير وأنت حشاش.
هي عايز راجل يصرف عليها من عرقه مش مديون لطوب الأرض.
- كل دي شكليات فارغة.
- معلش ماهما بنات اليومين دول تافهين.
- خليهم يتشرطوا كده لحد ماهيبوروا.
- خلاص سيبك منهم وماتشعلش بالك بيهم.
- طيب عرفيني عليها وأنا هخليها هي اللي تيجي تتحايل عليكي أني أتقدم لها.
- أنا مصدقاك.. بس ليه توجع دماغك بيها.. سيبك من عرايسي ودور في مكان تاني.




الخميس، 10 أبريل، 2014

مقتطفات نسائية (15)


أجمل إحساس حسيته معاه.
حسيته بيعاملني كأنثى يقدر غيرتها .
ما اتعاملتش معايا كجسد يريده.
أو كعروسة يسألها هتجيبوا إيه في الشقة وأنا مش ماضي على القايمة.
أو زوجة عايزها تطبخ وتغسل وتنظف وتاخد بالها من العيال.
 حب روحي فعشقته.

-------------------------------------

لمجرد رؤيتك في منامي استيقظت ولدي رغبة شديدة في التقيؤ.

------------------------

وبعد ما جيت على نفسي علشانه لقيته بيقولي أنتي معرفتيش تستحمليني.
يا راجل! ده أنا جبت آخري وأنا اللي بالي طويل وصبري مالوش حدود.
كنت عايزني أعمل إيه تاني بعد الصبر ما فاض.
طيب ماسألتش نفسك أنت عملت إيه علشاني.

--------------------

لو كنت أعلم بأن الموت يباغتنا ما تركت حضنك لحظة.

----------------------------


"آسف على كل جرح تسببت لك فيه"

تتمنى أن تصلها منه هذه الرسالة يوماً لتدرك كم شعر بوجعه لها
 ولكن كيف له أن يشعر بذلك وهو لم يمتلك يوما ملكة الإحساس بالآخرين.


-------------------------------

شخصيته السادية مقدرتش تحميها منه؛ فالطبع تغلب ولم يستطع سوى أن يتلذذ بتعذيبها بكل دناءة.

------------------

الكذبة التي أفتخر بها هي:
 أوهمته بعشقي فعاقبني بالطلاق ولم يعلم بأن هذا كان سبباً لنجاتي من الحياة تحت كنفه.

----------------------------------
نعم يا عزيزي لا أجيد سوى عشق المراهقات.

--------------------

وصدمني بخروجته معايا تحت المطر لما لقيته جايب شمسية معاه.
وصدمني يقيادته الهادئة للسيارة مع إن الطريق مغري للسرعة الجنونية.
وصدمني بهدوءه وبروده وتحفظه في كل شيء.
وصدمني أكثر باعطائه لي الدفة.
ده أنا مع نفسي ببقى مستمتعة أكتر من كدة.

------------------

الرجل الذى تتذكره المرأة دائماً بالخير.
من حماها من نفسه في عز ضعفها.
من حماها في الطرقات المزدحمة من أن يقترب منها أحدهم.
من وفى بوعده لها.
من لم يخن ثقتها.
من كان لها سنداً وعوناً دون أن تطلب منه ذلك.









الأربعاء، 9 أبريل، 2014

هي عارفة



هو بيخاف على مشاعرها لأنها ملكه؛ حاجة تخصه يعني حتى لو مابيحبهاش.
هو مقدر حبها ليه حتى لو مابيحبهاش بنفس الدرجة؛ ماهي برضه زوجته.

هي عارفة أنه بيخونها وده واجعها ومسبب لها حزن كبير.
 وهو عارف وبيستعبط.

وجع خيانته ليكي يشفع له عندك يكفي أنه مش عايزك تعرفي .
مش عايز يصغر في عينيكي.
مش عايزك تخجلي من حبك ليه .
صدقيني هو إنسان كويس بس الدنيا علمت عليه، والشيطان قدر يتحكم فيه.






الثلاثاء، 8 أبريل، 2014

ذكرياتي في الشتاء





- كان يوماً مُشمساً وعلى أثره ارتديت طقم شيك يليق باجتماع خاص بعملي أذهب إليه لأول مره في مكان يبتعد كثيراً عن مقر شركتي وبعد خروجى من المقر إذا بحال الجو يتبدل والشمس تغيب والجو يغيم والدنيا تمطر بغزارة وأخذت الشتواية كلها وأنا فى الشارع منتظرة تاكسي.. وبغض النظر إن ما ارتديته أصبح لونه غريباً من الشتاء بالإضافة لابتلال ملابسي بشدة إلا أنني كنت فى قمة السعادة .

- خرجت من مشوار خاص بعملي وإذا بالدنيا تمطر بغزارة ولا يوجد أية سيارات من أية نوع تسير في هذا الطريق فاضطررت أن أمشي مسافة لابأس بها إلى أن رأيت أخيراً تاكسى يلوح في الأفق فأشرت له وركبت أخيراً.. وبرضه كنت مبسوطة.

-كان أول يوم الدنيا تمطر فيه بعد استلام وظيفتي ومن فرط سعادتي وقفت في البلكونة ضاحكة غير عابئة بأعين المتلصصين في العمارات المقابلة ،ثم اتصلت بأمي لأخبرها بأن الدنيا تمطر عندي وأنني سعيدة بهذا المنظر ،ثم اتصلت بأحد زملائي في العمل فوجدته متذمراً من هذا الجو البغيض إلى قلبه و الذي يمنعه من أن يعدي الشارع.
صدمني رد فعله ولكنه لم يستطع أن يفسد عليَّ لحظة نشوتي..- كنت أريد أن يشاهد الجميع هذا المشهد ويستمتع برؤية المطر وهو يسقط لأول مرة في هذا الموسم بعد طول انقطاع-

-  كان يوماً مزدحماً مليئاً بأناس يزورون مقر عملي لأول مرة وبينما كان رئيسهم مستغرق في الحديث باندماج إذ بي أسمع أصوات تنذر بأن المطر في الخارج، فتركتهم مهرولة تحت أعين متعجبة، ورغبة بعض الزميلات من منعي أن أخرج حتى لا أصاب بدور برد يمنعني من الحركة كعادته معي.. لم أكترث لهم وخرجت فرحة لاستقبال المطر مادة ذراعي للأمام وفاتحة كفوفي لأصافحه باشتياق.



هل تدركون الآن مآساتي!.
أعشق من يتسبب في مرض جسدي.
أعشق من رائحته لا تباع ولا تشترى.
أعشق من لا أستطيع تمضية وقت معه سوى أوقات قليلة كل عام وحسبما يتراءى له ..
فهو لا يعطيني أية فرصة لأتهيأ له.. لقد رآني في جميع أحوالي.. تارة باكية تندمج دموعي بقطراته وتارة فرحة فيترك بصماته على وجهي ويدي..
تارة نائمة منكوشة الشعر مغمضة العينين وتارة مستيقظة في كامل هندامي.
تارة بمفردي ولا أحد يشعر بمقابلتي له وتارة مع حشد من الناس فأتركهم من أجله.

هل أنا مريضة بداء عشق المطر لهذا الحد.






الاثنين، 7 أبريل، 2014

مصدومة



كان يريني ما يحدث للبنات في المظاهرات من انتهاكات جسدية واغتصاب .
لعمري لم أشاهد هذه الحقارة من قبل، ولم يكن خيالي قادراً على تصوير ما يحدث مهما سمع من مصطلحات معبرة ، لم أكن أفهم معنى الاغتصاب بالأيدي، لم أكن أدري أن هناك مراهقين مأجورين يقوموا باللهو بجسد فتاة وكأنهم يبحثون عن شيئ فُقد منهم داخله، لم يأتِ في مخيلتي ولو للحظة بأن يوجد شباب ورجال يساعدون على هذا الفعل وينتشون برؤية ما يحدث وكأن من وقعت فريسة على الكل أن ينهل منها .
شعرت بأن دموعي تحجرت وأصابني الخرس مع ألم في صدري ووجع حقيقي في قلبي وعدم القدرة على التنفس ..
كان ينظر لي نظرة استخفاف مفادها" إيه رأيك.. مش كنتي عايزة تعرفي اللي بيحصل؟".
نظرت له مع  عدم القدرة على التنفس والمحاولة أن آخذ شهيق مقاومة الإغماء وكأنني أغرق .
وجدته يقترب مني - لا أعلم لماذا!-.
كانت يدي اليمنى على فمي من الصدمة ويدي الأخرى على صدري الأيسر .
وجدت نفسي أدفعه بيدي اليمنى وأنا أحاول التنفس علّي أحظى ببعض الهواء النقي. 
كلما أراد الاقتراب دفعته بوهن.
أردت سؤاله لماذا تريد الاقتراب مني هكذا.. فقط ساعدني على الخروج من هنا.
أمسكت موبايلي بيد مرتعشة لأرسل رسالة لأخي.
ضغطت على الحروف سريعاً مكونة رسالتي "تعالى خدني بسرعة".
ثم سقطت قبل إرسالها.








الأحد، 6 أبريل، 2014

بنوتة طهقانة



رسالة لزوجى المستقبلي :
 لو ظروفك دلوقتي مش مناسبة للزواج فأحب أعرفك أن ده أنسب وقت أنك تتقدم لي فيه.
لأني أنا كمان مش مقتنعة بفكرة الزواج من أصله.
وهاخد وقت كبير جداً على ما أقنع نفسي وأوافق.
وأهلي كمان هياخده وقت كبير على ما يسألوا عليك.
وفي الوقت ده أعتقد أن ظروفك هتكون بقت مناسبة.
فبدل ما تضيع وقت في إقناعي أنا وأهلي بيك في الوقت اللي ظروفك فيه بقت مناسبة وياعالم ده هيقعد كام سنة وهي ماعدتش طالبة تضييع سنين من العمر.
فأنا بقول تعالى دلوقتي ورزقنا ورزقك على الله.






السبت، 5 أبريل، 2014

رؤيا




رأيت نفسي معك في طريق شجرمترامي الأطراف، أغصانه متكاثفة حاجبة عنا ضوء الشمس.
لكنك لم تكن تجري خلفي ككل مرة.
 كنا فوق الشجرة على أحد أغصانها، وكنت أحاول أن أقفز قفزة طرازان من شجرة لأخرى وكنت في كل مرة تمنعني بطريقتك الخاصة.
رأيتنا نرقص سوياً ، وكأن كل هذه الأشجار صنعت خصيصاً لحراستنا من أعين المتطفلين.





الجمعة، 4 أبريل، 2014

مايعرفوش


 شايفيني بتبطر على النعمة لما رافضة أرجع لخطيبي اللى بيقول للناس دلوقتي أنه بيحبنى وباقى عليا وعلشان كده راجع لي تاني.

- مايعرفوش أن تصرفاته معايا هي اللي خلتني خدت قرار الإنفصال.

- مايعرفوش أنه ياما اتسبب في نزول دموعي سواء معاه أو لوحدي.

- مايعرفوش إن مكنش بيني وبينه أسرار حتى لو حوارعادي؛ كانت كل حاجة بالتفصيل توصل لأهله.

- مايعرفوش إنه ماحاولش يسعدني وكان بيضغط على أعصابي دايماً.

- ما يعرفوش إن مفيش ذكريات حلوة بينا تشفع له عندي.

- مايعرفوش إنه يا ما رجع في كلامه واتفاقاته معايا ومع أهلي.

- مايعرفوش أنه سمح لأهله يتطاولوا عليا.

- مايعرفوش إن أهله غلطوا في أهلي.

- مايعرفوش إني أول ما طلبت الانفصال ماصدق وقالي هاتي الشبكة.

- ما يعرفوش إنه يا ما صغرني قدام قرايبي وصحباتي لما ما كنش بيتصل بالأيام ولا حتى برنة على الموبايل.

- ما يعرفوش إني إديته كذا فرصة علشان يحافظ عليا وفي كل مرة كان بيدوس فيها عليا.

- مايعرفوش إني علشانه كنت بعمل حاجات مش راضية عنها بس علشان أرضيه.

- مايعرفوش إنه اغتصب فرحتي بيه وكأنك استكترها عليا.

- مايعرفوش إنه بعد انفصالنا بأسبوع كان خاطب غيرى.

- ما يعرفوش إني خلصت الحزن عليه.

- مايعرفوش أنى كنت بموت فى بُعده عني في اليوم مليون مرة وإن قرار انفصالنا مكنش سهل عليا.

- ما يعرفوش إنى كان لازم أعيش بعده وعلشان كده كان لازم أموته جوايا.. وده اللي حاصل دلوقتي هو بالنسبة لي مجرد شبح لشخص خلاص مات من سنين.







الخميس، 3 أبريل، 2014

عن رحلة الصعيد




قررت أن أسافر وحدي؛ فلم أكن في حالة نفسية تسمح لي بالسفر مع الصُحبة؛لعل الطريق يغير ما عكر صفوي.. كان القطار متهالك حد تعجبي كيف لمثله أن يسمح له بالحياة،بل والتحكم في مصائر راكبيه.. كان مزدحماً،وكانت صدمتي أن نوافذه بلا زجاج! وأن من الوارد أن يتوفر فيه اللصوص والبلطجية ليثبتوا الركاب، وهذا ما حدث في العربة التي تسبقنا؛ فقد سمعنا جلبة، وصراخ علمنا فيما بعد بأن مجموعة من البلطجية في سن المراهقة تعدوا على فتاة بالتحرش اللفظي والجسدي،
 وحينما ثارت الفتاة تم التحدث بالمطاوي، ثم لوجود _ للصدفة_ ظابط يرتدي مدني  يحمل سلاحه هو ما جعلهم يفرون سريعا بالقفز خارج العربة ليسقطوا على الأراضي الزراعية بكل خيرة تنجيهم من الأذى..
نقل إلينا بائع الشاي هذه الأخبار حين سألته عما حدث.. تعلمون حبي للأسئلة ولذلك كان علي أن أطلب منه كوبا من الشاي حتى يتسنى لي سؤاله كما أريد_ رغم أني لا أشرب الشاي_
 .. أهديت كوب الشاي لمن كانت تجلس جواري، كانت سيدة مسنة قد جاءت لتوها من القاهرة بعد زيارة ابنتها المتزوجة هناك.. كانت شاردة طول الطريق، وتفاجئت بتربيتتي الخفيفة على كتفيها، وإعطاءها كوب الشاي الساخن دون كلمة.
. أخذته محاولة أن تبتسم، وبعد بضع رشفات بدأت تتحدث معي، وتحكي عن معاناة ابنتها مع زوجها الفظ الذي يسيء معاملتها بالتعاون مع أمه.. تلك المرأة المتسلطة التي لا تحترم سنها، وتتعامل بميوعة لا تناسب عمرها.. "أنها كاذبة يا بنتي تقول في ابنتي ما ليس فيها وتدعي خيالات مريضة فقط لتستمع بضرب ابنها لابنتي في سادية ضاحكة لا تخفيها" تخبرني بذلك وتكمل" ربيت ابنتي على الصدق واحترام الرجل وما يحز في نفسي ونفسها أن زوجها يصدق أمه ويكذبها"
سألتها بشفقة متأثرة "وهل وصلتي لنتيجة معه في هذه الزيارة؟" أجابتني بسخرية" ماذا في وسعي أن أفعل؟ هل أخرب بيتها بيدي إذا ما واجهته بإهانتها المتعمدة وليس من المستبعد أن يضربها أمام عيني لأنها أفشت أسرار بيتها أو أنها تفتري عليه.. لو كان أباها على قيد الحياة ما سمح بحدوث هذا ووارد أن كان يجعلها أرملة؛ فلم يكن عنده شيء في العالم أغلى منها؛ فهي وحيدتنا."
ربت على كتفها وتمتمت ببعض الدعوات، وأعطيتها أذني كاملة فهي لم تكن تحتاج سماعي بقدر ما كانت تحتاج أن تجد من تفرغ شحنتها المكبوتة من الحزن، والقهر على ابنتها، وخاصة مع شخص لا يعرفها ولا تعرفه، وقد كانت هذه المواصفات تنطبق علي تماما..
سعدت بصحبتها؛ فهي قللت من الشعور بطول الطريق؛ فأتخيل لو كانت قرعتي جاءت جوار رجل أظنها كانت ستصبح من أطول الرحلات فأنا لا أفضل الجلوس بجانب الرجال عموماً..
تفاجئت حين وصولنا بأن غضبي جعلني أنسى تماما أخذ أرقام المحمول الخاصة برفقة السفر وخاصة صاحب الدعوة ، فها أنا قد  وصلت ووطئت قدمي أرض قنا ولا أعلم أين سأذهب.
حينها سخرت من نفسي في ابتسامة أتمنى ألا يكون رآها أحد لأنني في العاده أتوه والعنوان معي ماذا عن حالي الآن، وأنا بلا عنوان محدد.. أظن  أنني الآن في وضع مثالي للضياع في البلدة .

ألقت عليا السيدة السلام وهي تصر على ضيافتي حينما علمت بأنني أول مرة أزور الصعيد وأن لا أحد في استقبالي.. للوهلة الأولى وكعادتي قررت الرفض التام، ولكن بعد تفكير واقعي وافقت.. كانت تريد رد عزومة الشاي بغداء ولتشكرني بطريقتها على استماعي لها طول الطريق وعلى حد قولها في أنها تسببت في صداعي.

بعد الإلحاح والردود المجاملة وتأكدي بأنها ليست عزومة عابرة وافقت، وذهبت معها وكانت تلح علي فكرة شريرة أردتها أن تساعدني في تنفيذها.
هذه السيدة قد حققت أمنيتي في المكوث مع أسرة صعيدية؛ فقد كانت تعيش وحدها وقررت أن أشاركها في إعداد الطعام، وفشلت تماما في العجين حيث أن ذراعي آلمتني بعد عدد قليل من الدفعات، وخاصة أنني قطعا لم أفعلها بيدي وإنما طلبت منها ملعقة كبيرة .. ضحكت هي متعجبة ولم تشأ وقتها أن تجعلني أفعل شيء ولكني أصررت. وبعدها اكتفيت بالمشاهدة والتربيت على العجين في محاولة لصنع دوائر مفرودة.. وانتهينا أخيرا، و أصبح الغدا الذي طلبته منها جاهزا من فطير مشلتت، وكفافي، وعسل أسود، وجبن أبيض، وبيض مسلوق وأصبحت وليمة . وكأننا نعرف بعض منذ زمن ولم يخلو الجو من الضحك والحكاوي.. هي تضحك على طريقتي في كل شيء وأنا أشاركها السخرية باستمتاع.

سألتها عن منزل "المضيف " ذاك الطبيب الصيدلي ..فكرت للحظة وقالت "نعم ،فأمه حبيبتي"
إذن مهمتي ستكون سهلة.. هل معكِ رقم هاتفه
أخبرتني بأن لا ولكنها تستطيع الحصول عليه بسهولة ..
وبعد حصولنا على الرقم  اتصلت به وقامت بوضع قطعة من القماش على السماعة لتتغير نبرة  صوتها  واتصلت به تخبره" بأن ضيفتك موناليزا رهينة عندنا، وإذا أردتها سليمة فلتخبرنا على الملأ بأن الأهلي حديد ".
أغلق مصطفى الهاتف لاعنا هذا الحظ الذي جعل إبراهيم يقترح عليه ضيافتهم
كان الصحبة وصلت عنده فأخبرهم  عن المكالمة سائلاً :ماذا نفعل؟
فرد إبراهيم" هذه السيدة معها حق فالأهلي فعلا حديد رغم أنف الزمالك".
غضب مصطفى ولولا كون إبرهيم ضيفه للكمه في أنفه فرد" مين ده اللي حديد يا عم .. أنتوا هتصدقوا نفسكم"
فأجاب الشاذلي" وما المشكلة ياصديقي في أن تقول هذا مقابل أن تعود صديقتنا سالمة"
فرد مصطفى مدافعا" ومظهري أمام أهل البلد"
فصرخت نها "هل ستتركها إذن في إيدي من لا نعلمهم حتى لا تهين ناديك الأعظم،
أين شهامة ومجدعة أولاد الصعيد إذن؟"

تركهم وانصرف ودمه على وشك الغليان..
وبعد تفكير طويل قرر أن يتصل بمن اتصل به من محمول والدته عله يعرف شخصيته الحقيقية، فوجده اسم سيدة فأغلق الخط سريعا وسأل والدته عن هذه السيدة،
 فأخبرته بأنها "أم سعاد" التي ترملت منذ عام وهمت بقص حكايتها، لكنه قاطعها قائلا أين منزلها فأخبرته في ضيق بعد أن قاطعها بالعنوان ..

في هذه الأثناء كنت في ضحك هيستيري وأنا أتخيل ردود الأفعال، وإذ بالباب يطرق بهدوء.
فتفتح "أم سعاد" الباب فتجد "مصطفى" أمامها فتنسى للحظة المكالمة وتدعوه للدخول وتسأله عن أحواله وأحوال العائلة وأنه"ماشاء الله كبرت" .
هنا تظهر موناليزا لترى من الطارق  فلا تتمالك نفسها من الابتسامة الواسعة مع تضرج وجهها  فهي مفاجأة غير متوقعة.
يقابلها مصطفى بكل هدوء ويستأذن "أم سعاد" للذهاب بها، ولكنها تصر على أن تحضر له شاي مع قطعة فطيرة..
فينسى كل شيء ويوافق مبتسما مستمتعا بطعم الفطيرة مع الشاي.






الأربعاء، 2 أبريل، 2014

حالة متغيرة



حاجات كتير ممكن نتمناها لكن لما تحصل ممكن مانلاقيلهاش معنى.
ممكن تروح مكان جميل وتتمنى ترتبط بانسان يشاركك التنزهه فيه ولما يحصل تحسها كانت خروجة ماسخة.
ممكن تتمنى حبيبك يحكيلك يومياته بالتفصيل علشان تحس أنك معاه وتبقى مطمن عليه ولما يبعتلك فعلا تحسها رسالة طويلة ومملة وملهاش طعم.
واضح انها بتبقى مجرد حالة أنت بتتمناها في وقت معين لكن لما تحصل بعد كده حالتك بتكون اتغيرت.
وتبقى الأشياء في الخيال أرقى وأروع من تحقيقها على أرض الواقع.





الثلاثاء، 1 أبريل، 2014

وحدة الأعياد



- ألن يأتى العيد هذا العام أيضاً.. ألن أرتدي فستان الفرحة بشوق.. ألن أنتظر قدومه بلهفة.. ألن أرتب البيت ليكون في استقباله..
 يقولون لي "تهيئي لقدومه وسيأتي"
 وأقول لهم "فعلتها كثيراً من قبل ولم يأتِ".
إلى متى أيها العيد تنسى تعدي عليَّ.

---------------------

- ترى بماذا ستفاجئني بالعيد هذا العام.
هل ستنافس الجميع لتكون أول من يحرص على تهنئتي فجر العيد ولو برسالة.
أم  ستعد لي نزهة محببة إلى قلبي.
أم  ستجلب لي حلوتي المفضلة مع هدية من اختيارك الخاص.
أم ستهاتفني فقط.
أم  ستقضي اليوم كله بصُحبتي في المنزل.
أم ستنساني ككل عام.

---------------------------

يقولون أن العيد فرحة ولذلك توقعت أنك ستكون فرحتي ولكن خاب أملي.

---------------------------

انتظر رسالتك لي بفارغ الصبر لتكون أول من يهنئني بالعيد فلا تخذلني.


-----------------------------

يقول لي: "عيد سعيد".
طيب هو فين العيد وأنت مش معايا فيه.
وإزاى سعيد وأنت عني بعيد.

---------------------------------


فتحت الفيس بوك في أولى أيام العيد، وشعرت بالفراغ؛ فلا يوجد أحد تحادثه، أوحتى تتابع كتاباته كما هى معتادة، وتنبهت إلى أن الطبيعي إن محدش  بيكون فاضي في العيد. أكيد الناس يا إما خارجة تتفسح، أو بيستقبلوا الزوار فى البيت .. يعني دخول الفيس النهاردة آخر حاجة ممكن الناس تفكر فيها في ظل زحمة الأحداث الخاصة  بهم هذا اليوم..
 هي فقط التي تشعر بالوحدة؛ فلا يوجد أحد معها، ولن تستقبل أية زائرحتى وإن كان  محصل الكهرباء، وبالمقابل لن تخرج للنزهة أو حتى لزيارة الطبيب..

"أيها العيد ارحل سريعاً حتى يعود أصدقائي الافتراضيين للظهور من جديد".

----------------------------

أيها العيد الصامت لا أطيق سماع صوتك.

--------------------------------

هل تذكر هذه الأيام العام الماضي .
كنت مخليني ست الستات وأنا كنت طايرة من الفرحة.. فاكرة أدق التفاصيل..
 فاكرة كنت لابسه إيه على مدار الأيام التى سبقت تجهيزات العيد، وفاكرة يوم العيد كنا لابسين إيه ..فاكرة أني تعبت قبلها بأسبوع ومقدرتش أصوم وأنت قد إيه كنت قلقان عليا.. فاكرة لما حطيت اسمي جنب اسمك لأول مرة في كارت دعوة لحفل العيد اللي كنا عاملينه علشان نعزم فيه كل قرايبنا بمناسبة زفافنا.. فاكرة لما أمي تعبت في العيد وأنا مارضيتش أقولك وأنت لما عرفت زعلت أوي إني معرفتكش ..
فاكرة إني زعلت منك لأنك سبتني أجهز ليلتها كل حاجة لوحدي ولما عاتبتك قلت لي أن وراك حاجات كتير لازم تعملها بره بس نجاح الحفلة يومها نساني زعلي منك ومافتكرتش غير أني بس بحبك..

فاكره ثقتك فيا وخوفك عليا.. كل ده بقى راح فين!! وإزاي قدرت تطلقني بعد شهور قليلة من زواجنا.. قولي أنا قصرت في إيه!!.

--------------------------------

- بيقولوا العيد خلص .
وأنا بقول : هو كان جه إمتى أصلاً.