الأحد، 31 أغسطس 2014

عاشقة الطبيعة





دايما في عز الشتا والرياح الشديدة والمطر
والناس بتجري وخايفة من البرق والرعد
ببقى أنا مطمنة.. عارفة إن ربي معي
ولوأن الصواعق أصيبت الأرض جميعا لن تصيبني
مع إن رصيدي أظنه لايكفي ولكن تلك هي ثقتي بربي
لا أظن الطبيعة قد تؤذيني يوما مهما بدت قاسية

فأنا عاشقة لها وكيف لمعشوق أن يؤذي عشيقته







السبت، 30 أغسطس 2014

مقتطفات نسائية (24)




- براءتها وجديتها مش مخلياه يشوفها أنثى.

------------------

محتاجة وجودك يدفيني .. عاوزة أحس إن ليا صاحب بيسأل عني وبيهتم بيا..
 يعرف بصحى إمتى ولابسة إيه وبعمل دلوقتي إيه.. يكلمني في التليفون ويخرج معايا .. يهون عليا مصائب الدنيا ومايكونش هو مصيبتي فيها.. ماعدتش عايزة أبقى لوحدي.

------------------

- رغم إن مكالمتنا كلها كانت خناقة وقفلنا ومحدش فينا طايق التاني
 بس عملت لي حالة من النشوة والسعادة.

---------------

- نفسي أحب حد ما يخلنيش أعيط.

------------------

- لقيته مستغرب أوي وهو بيقولي بعد ده كله ولسه زعلانة!..
 طيب هو أنت قلت إيه أصلاً يصالحني!!

---------------------

- صعب إنك ترتبطي بحد أحداث كتيرة أوي بتقع من ذاكرته.. وتكتشفي إنه بيستعبط وبيفتكر اللي على مزاجه وبس.. لأ وكمان تلاقيه بيطلب منك أنك تكوني موجودة معاه علشان ذكرياتكما بعد كده تبقى مشتركة!!.. 
هو أنت فاكرني أصلاً بدماغك دي!.


-------------------

- عارف يعني إيه ما تشوفش غمازتى غير يوم انفصالنا؟  
يعني دي الحاجة الوحيدة اللي خلتني أضحك من يوم ما عرفتك.

---------------------

- اتوجعت أوي لما روحت المكان اللى كان بيجمع بينا وقابلت ناس كتير كانوا متعودين يشوفونا سوا ولقيتهم بيسألوني عليك.. 
مقدرتش أقولهم إننا سيبنا بعض وبقى اللي يسألني عليك أقوله معرفش.

---------------------

ماكنتش مضايقة من وجودك بس ماكنتش عارفة أحدد أنا عايزاك ولا لأ
بس لما غبت عني حسيت أني مرتاحة ومبسوطة أكتر.

-------------------

- أنا عارفة إنك هترجع..
لكن أنت مش عارف إنك هترجع متأخر أوي

----------------------------

- كده يا بابا ماتحسش بمرض أمي وهي نايمة جنبك وماتقوليش أصلها ماقالتش
كنت عايزها تقولك إيه؟ بص لي وحس بيا ..

-------------

- لا أجيد لعب دور الخليلة فالدور الوحيد الذي يصلح لي زوجة.

----------------

- خايفة بعد ما أربي وأكبر هي تيجي تاخدهم على الجاهز ماهى برضه مامتهم.

 --------------------------------

- لو كنت بتحترم كلمتك ومواعيدك.. كنت رغم كل حاجة جيت وقابلتك وشوفتك عايز إيه..
 لكن لإنك عمرك ما احترمت كلمتك لا معايا ولا مع غيري هسيبك تدوق تصرفاتك
 اللي أنت علمتها لي.

-------------------

هنبدأ بقى غياب من غير سبب واحنا لسه بنقول يا هادي!! طيب وعلى إيه؟
 غياب بغياب خليك غايب على طول.. على الأقل قبل ما ابدأ اتعود على وجودك.

---------------

فرق كبير أوي بين لما أقول بيتك وبيتي وبين إني أقول بيتنا..
 وبين عندك أوعندي وعندنا.. مبسوط دلوقتى لما كل واحد فينا بقى لوحده.


الجمعة، 29 أغسطس 2014

محاولات فاشلة للرضا





هل تعلم شعور الأب العاجز عن الإتيان بطعام لأبنائه لقصر ذات اليد،
وشعور الأبناء الذين لا يستطيعون التعبير عن جوعهم حفاظاً على كبرياء الأب المكسور أمامهم؟
هذا حالنا معاً..
فأنت لا تستطيع تقديم قلبك لي لإنه مع غيري..

وأنا لا أستطيع إظهار حرماني فقط أرسم على وجهي بسمة رضا حينما تقدم لي فتات مشاعرك.







الخميس، 28 أغسطس 2014

وعد بالفراق




علمت بحصوله على منصب محافظ مدينة بعد انتهاء فترته؛ فأرادت أن تجرى معه حواراً صحفياً عن كيف يمارس حياته بعدما كان مسئولاً وله شأن خاص والآن أصبح مجرد مواطناً عادياً..
 بداخلها تعلم بأن هذه الشكليات لا تهمه ولا تفرق معه في شيء؛ فهو من الفئة الكادحة البسيطة، ولكنها تذكرت وعدها له منذ سنوات بألا تراسله أبداً ما حييت.
فامتنعت غاضبة متمنية له الخير.







الأربعاء، 27 أغسطس 2014

خائنة




لم تقوم سوى بدور الخائنة فى حياتهن.
فها هى تحب حبيب صديقتها وتلمح له بهذا.
ثم تزوجت حبيب صديقتها الأخرى.

وها هى الآن تعشق رجلاً متزوجاً.

الثلاثاء، 26 أغسطس 2014

الحب قوة




الحب ده حاجة حلوة أوي
إزاي إنسان ممكن يعيش من غيره
الحب بيدي طاقة  غير عادية
إذا شعرت الزوجة بحب زوجها ستتفنن في كيفية إسعاده وطهي جميع الأصناف التي يحبها وتعلم أصناف أخرى لم تطهيها من قبل وستتقن فن التقديم .
إذا شعرت الابنة بحب أبوها ستجتهد في المذاكرة والنجاح لكي يفخر بها.
لو حبيت وظيفتك هتبدع فيها...
إزاي ممكن تعيش في مكان وأنت عارف أن اللى حواليك مش بيحبوك.







الاثنين، 25 أغسطس 2014

عقيم





قالت بانهيار باكى:  أيوة نفسى أبقى أم
عايزة اسمع كلمة ماما
عايزة يبقى عندي ولاد كتير مرتبطين بوجودي في حياتهم
عايزة أعيش معاهم وبيهم وليهم
وكل كلامي عن ازعاج الأطفال وشقاوتهم وانهم تكفير ذنوب ده لإنهم مش ولادي
هما بس ييجوا وربنا يرزقنى بيهم

دي أحلى حاجة فيهم لماضتهم

الأحد، 24 أغسطس 2014

تحرش مشروع






هممت أن أضربه، وللحظة نويت أن أتهمه بالتحرش حينما أمسك يدى ليُقبلها
 ولكني تراجعت سريعاً حينما تذكرت بأننا قد وصلنا للتو من عند المأذون.

السبت، 23 أغسطس 2014

احذر رحيلي



هل تعلم لمَ أبدو متسامحة معك؟
لأني إذا أظهرت غضبى واستيائي منك لن تستطيع محوه ..
فأنا غضبي جارف، وحزني عاصف، وسأمي زلازل كونية.
فاحذر أن أعلن عن استيائي؛ فهذا يبشر بالنهاية.
أوتدري ما النهاية؟

تلك التي يعقبها نقطة وكلمة تمت.

الجمعة، 22 أغسطس 2014

أم حريصة




من حرص الأم المبالغ على الأشياء أن تحفظ الألوان الخشب وكتب تلوين الحروف بحجة أن طفلها مازل صغيرا وحينما يكبر ستعطيهم له..
ولا تعلم بأن الصغير حينما يكبر لن يكون في حاجة للألوان الخشب فهناك ألوان فلوماستر سيحبها أكثر أما عن كتب تلوين الحروف ستصبح بالنسبة له ذكرى طفل لم تكتمل..

فكل مرحلة ولها متطلباتها.. فلا تحرمي طفلك ما لديه بالفعل .

الخميس، 21 أغسطس 2014

لصاحب القلم




كلمة لأصحاب الأقلام: هل تدرك حجم المسئولية التي ألقاها قلمك على عاتقك من تأثر أحد مهما كان بما تكتب.
هل تعلم أنك قد تؤثر بشكل أو بآخر في طريقة تفكيره واتخاذ قراراته.
هل توقن بسحر القلم على من يؤمنون به.

لا تنكر أنك أيضاً تتأثر بمن تقرأ له ؛ لذلك كن على حذر مما تكتب لعل كلمة تكتبها لا تلق لها بالاً تقع في نفس أحدهم وتغير مجرى حياته بطريقة سلبية.





الأربعاء، 20 أغسطس 2014

مقتطفات نسائية (23)




- زي ما أنا بالنسبة لك حد مُتعب أنت بالنسبة لي حد لا يطاق.

-------------------

-عايزني أنام!.. علشان أنام لازم أحس بالأمان.. وإزاي أحس بالأمان وأنت مش جنبي.


----------------

- كان نفسي يكون راجل معايا ويقولى بصراحة وقتك معايا انتهى بدل كذبه عليا كل ما أسأله أنت لسه عايزني يقولي: أنتِ عندك شك!!.

- طيب ما هوقالهالك بتصرفاته بس أنتي اللي ماكنتيش قادرة تصدقي.


------------

- من أجمل المواقف لما نتقابل صدفة وألاقينا لابسين ألون زي بعض.

----------------

- هو مفيش في قرعتي غيرك ولا إيه!.

--------------


- بتكرهينى ليه مش ذنبي أني اتولدت بنت.

 --------------------------

- بكائي عليك كعملية الولادة فبه قد تم انتزاعك من داخي.

---------------------------

- لما نكون متخانقين و تلاقيني بطلب منك حاجة ليا كانت عندك اعرف وقتها أني
 بنكشك وبجر كلام معاك علشان تصالحني.

---------------------

- إزاي ما احبكش وأنت أكتر حد بيستحملني.

-------------------------

عارف يعنى إيه بحبك؟
 يعني يوم ما تعمل حسابي معاك في الأكل وتقدمهولي
 هاكله حتى لو كنت شبعانة ولسه واكلة حالاً.

----------------------------

- هو باين أوي كده إني الزوجة الثانية اللي في السر.. يبقى طبيعي معاملتها العدوانية ليا وهي شايفانى ضرتها.

---------------------

- عايزة أحس بحبك اللي بتقولي عليه.. عايزة أشوفه في أفعالك.

--------------------

- أنا مش هصدق غير الواقع اللي عيشته لكن أي كلام تاني بالنسبة لي شواذ.

------------------------

- إمتى يوجعك؟.. لما يبقى جزء منك.

---------------------------------

- أظنني أبحث عن رجل لم يخلق بعد.

-----------------------

- أنت شاغل نفسك بيا أوى كده ليه؟
 أراك تتابعنى بشغف رغم إنني من وجهة نظرك لا أروقك وتأتي خصيصاً لتقول لى هذا.. بل وتأتى أيضاً لتاخذ سيئاتي وتعطيني من حسناتك- ده لو كان عندك حسنات-.. بدل كده ما تهتم بنفسك أحسن وتشوف أنت قدمت إيه للي حواليك غير التهكم ومحاولة نصب نفسك حاكماً عالماً.. ماذا تركت من أعمال.. ماذا تركت من أشخاص يتذكرونك بالخير.. ماذا تفعل فى حياتك عموماً.. عموماً هذه صحيفتك فاملأها بما شئت.

----------------------------

- مين قالك أن بعدك عنى هيريحنى!
- مش أنتى اللى طلبتى مني ماقربش منك تانى؟
أيوة ماتقربش مني بالطريقة اللي انت عايزها بس ماتبعدتش عني
 كفاية تكون موجود في حياتي لما احتاجك ابقى عارفة أني هلاقيك.

----------------------------

- الاستقرار نعمة والانفصال موجع.


الثلاثاء، 19 أغسطس 2014

رسالة من عالم آخر





لأ يا حبيبي أنا مكنتش أقصد أأذيك أو أوجع قلبك بفراقي..
أنا بس كنت عايزة أكون متأكدة أن لما أموت هلاقي حد يفضل فاكرني وفاكر كل تفاصيلنا الصغيرة ويفضل حتى بعد موتي يحبني.
ماكنتش أقصد أسيبك لوحدك.
ماكنتش أقصد أنك تزعل أوي كده.
كنت عايزاك تفضل تبص على صوري وتفتكر مواقفنا وتضحك.. مش تعيط بحرقة كده.
مكنتش أقصد أنك توقف حياتك وتكفر بكل حاجة وتبقى واحد تاني.
كنت عارفة أني هوحشك وانك هتفتقدني وأن مفيش واحدة ممكن تحل مكاني عندك بس ماتوقعتش أنك هتقارن دايما بيني وبين أي واحدة تعرفها فتلاقي كفتي بترجح فتسيبها مجروحة وتمشي.
أصلك هتلاقي واحدة فيها من مواصفاتي منين؟
واحدة اتربت معاك من وهي صغيرة.
واحدة فاهماك وانت حافطها.
 لأ وإيه وكمان شبه بعض.
ماتزعلش بقى..
أو ازعل ماشي.
بس ماتوقفش حياتك كده.
يلا قوم بقى..احلق راسك كده وسيب دقنك زي ما بحبها.
واقرأ على روحي الفاتحة.
هستناك في الجنة.

بحبك.






الاثنين، 18 أغسطس 2014

موقف لا يتكرر كثيرا


قام بتجهيز طعام العشاء بعدما رآني متدثرة من صقيع الشتاء 
بالأغطية الكثيرة،

 وشعر بعدم رغبتي في النهوض مهما كانت غريزة الجوع
 لدي تعاني..

 أعد كل شيء..شطائر البطاطس المحمرة الساخنة 
مع كوب قرفة باللبن ساخن،

 وقدمه لي مع ابتسامة فاتنة وسؤاله إذا كنت أريد أي شيء آخر..


تناولت طعامي في استمتاع ؛ فهو شهي بحق وشكرته بامتنان؛


فإذ به يقول:


" هل تشكرينني على مرة واحدة رأيتك فيها لا تستطيعين القيام،
 وأنا لم أشكرك سابقاً 

على فعلك لي هذا كل يوم رغم عدم وجود عذر لدي لأفعله لنفسي".




الأحد، 17 أغسطس 2014

سامحتك


أنا مسمحاكي.. مش علشان أنا ملاك ولا علشان أنتي تستاهلي


لكن علشان أنا لو مكانك وحد قرب من حبيبي كنت هعمل فيه أكتر ماعملتي فيا.

السبت، 16 أغسطس 2014

قلب معاق



أرجوك افهمني

السبب مش في إعاقتك ولا كونك صاحب كرسي متحرك

أنا معنديش حاجة أديهالك، مانفعكش كزوجة،

 مش هقدر على الضغط النفسي اللي هيكون موجود بينا.

أنت لو عملتلي حاجة وماعجبتنيش هتتوقع أن إعاقتك هي السبب

 وأنا مش هستحمل احساسي بالذنب.

إذا كنت أنت عندك إعاقة في رجلك فأنا عندي إعاقة في قلبي.

مش هينفع أعمل معاك اللي متوقع أعمله مع اللي هتجوزه.


ماتفهمش غلط ودماغك يروح لبعيد.. 

مش هينفع أطلع عينك يعني.. هتصعب عليا.









الجمعة، 15 أغسطس 2014

لعلك تفهم





لا تقل لى : تعالي؛بل خدنى إليك بقوة.
لا تطلب منى شيئاً؛ فقط خذ ماتقدر عليه.
لا تأمرني بشيء؛ فقط نل مرادك إن استطعت.

إذا أردت أن تمتلكنى فلا تعبث بحريتى فأنا خارج نطاق القيود.






الخميس، 14 أغسطس 2014

ارحل




اغرب عن وجهى

لا أريد رؤيتك مجدداً

ابتعد عن محيط حياتى

اخرج من دائرة سلامى النفسى إلى الأبد.


باختصار شديد.. فقط.. ابتعد عن طريقى.






الأربعاء، 13 أغسطس 2014

عني (17)



ما بحبش طبيخي .. أي أكل غير اللي أمي بتعمله بيبقى طعمه بالنسبة لي ماسخ..
حتى لو الكل قال إن أكلي حلو.




الثلاثاء، 12 أغسطس 2014

للرجال مآرب أخرى




- لا تصدقي الرجل الذي ينهي اتصاله معكِ فجأة دون أن يعاود الاتصال بكِ مجدداً..
 فإذا أراد محادثتك حقاً لتفرغ من أجلك ولو لدقائق معدودة.

-----------------

- لا تتعجبي حين ترين أنثى قليلة الجمال ولكنها متزوجة وزوجها شديد التعلق بها.. فالموضوع لا دخل للجمال الخارجي به.. هو رأى روحها جميلة وهذا ما جذبه إليها أما عن الشكل الخارجي الغير مقبول بالنسبة لك فالتعود يجعل الأشياء مقبولة..
 فباهرة الجمال مع الوقت ستصبح في نظره عادية.. النصيب له قوانينه الخاصة.






الاثنين، 11 أغسطس 2014

مقتطفات نسائية (22)




- بكاء أمي بمثابة انهيار العالم بالنسبة لي.

----------------------

- فرق كبير بين رغبتي في عدم الإنجاب أو تأجيله لأجل غير مسمى،
 وبين عدم قدرتي على الإنجاب من أصله.

-----------------

- لما فسخت خطوبتي قررت إن عمري ماهرجع له تاني ولو كان آخر راجل في الدنيا ولما اتعاملت معاك لقيت أن كان خطيبي برقبتك واتمنيته تاني ولو لليلة واحدة .. أنت متخيل أنا شايفاك ازاي؟.

---------------------

- بيسخروا من شكلي ليه هو أنا اللي عملته!  ده خلقة ربنا
بيسخروا من حجمي ليه؟ أنا اتولدت تخينة حتى لو ما باكلش
بيسخروا من قصرى ليه؟ أنا ذنبي إيه
هو في حد بيختار شكله!


 -----------

- الآن فقط عذرتها فقد قتلها صمتك.

-----------------------

- عايزاك تحميني من نفسي وماتستغلش أوقات ضعفي لصالحك لإن لما اللحظة تعدي وأفوق هفتكر موقفك معايا ووقتها يا إما هفضل ممتنة ليك يا إما هحتقرك؛
فلحظات ضعفي معك هي اختبار حقيقي لك.

-----------------

- بس أنا مش واحدة عادية علشان أعمل فرح عادي
أنت مش شايفني زى البنات العادية لا في لبسهم ولا في حياتهم واختارتني وأنا كده..
إزاي بقى عايزني اعمل فرحنا ويكون عادي زيهم.

------------------

- حتى لو جيت بعد ما أنا مشيت بثانية ولحقتني بالنسبة لي برضه اتأخرت.

-----------------------


- بيقولى اتنازلتى ليه ؟
قلت له : لإن سني كبر ومن حقى أتجوز ويكون لي بيت وأسرة.
أنا في سن لا يسمح لي بالاختيار فقط علي أن أرضى بالموجود لعل الزيجة تكتمل.

----------------

- فرق كبير بين إحساسك بإن حد بيحبك حتى لو ماكلمكيش بالشهور، وبين حد بتحسي أنه نسيكي لمجرد أنه ماكلمكيش في يوم..
 الأول أنتي مطمنة بغيابه والتاني أنتي قلقانة في وجوده لإنك مش عارفة تحددي أنتي بالنسبة له إيه.

------------------

- ليتنى أستطيع الحياة كذا مرة كنت اخترت أن أعيش معك فى أحد هذه الحيوات..
لكنها للأسف حياة واحدة ولازم أختار فيها من يصلح ليكون أباً لأولادى وزوجاً صالحاً افتخر به أمام نفسي وديني وجميع من حولي وهذا لا يتوفر فيك.. أنت فقط تحبني وتعلم كيف تتعامل معي وتفهم طبيعتي جيداً ومعك لا أشعر بالملل ولا أحمل هم مقابلتك فهي ستنتهي سريعاً مهما طال الوقت ولكن هذا وحده لا يكفي لحياة زوجية تقتضي دين الزوج وأخلاقه وتقارب المستوى الاجتماعي والثقافي للعروسين وعائلتيهما وهذا لايتوفر فيك.

--------------------------------


- كده برضه!
قدرت تبعد عني يومين بحالهم
متعرفش عني حاجة ومعرفش عنك حاجة
بعدت وأنا زعلانة منك وكرامتي مش مخلياني أبدأ وأسأل عليك لإنها المفروض تيجي منك وتصالحني.. لكنك حقيقي واحشني وعايزة اطمن عليك.
عايزة أعرف إيه اللى بعدك عني وليه ماصالحتنيش ولا حتى سألت عليا.
أنت فين؟