السبت، 30 نوفمبر 2013

عني (5)


فقدت رغبتي في زيارة مرضى الأورام. فقد كنت أذهب لأبث بداخلهم الأمل في رحمة الله وفضل الدعاء والصبر على الابتلاء و... و... و...
 لا أنسى دخولي أحد العنابر لأجد أول سرير تجلس عليه طفلة يلتف حولها بعضاً من النسوة -في الغالب أمها وجدتها وخالاتها-  فألقيت التحية عليهم وسألتهم إذا كانت الطفلة تحتاج إلى تبرع بالدم ، ظنوني وقتها طبيبة، وظلوا يسألونني بتضرع
"إحنا لسه جايين من شوية ومحدش لسه عدى علينا ومش عارفين إيه اللي هيحصل" ،"هي هتاخد الجرعات أزاي" ،"هي هتبقى كويسة؟ " ،"هو في حد بيخف؟"...
ومليون سؤال من عدة شفاه في وقت واحد موجه لشخصي الفقير.
أخبرتهم بابتسامة أنني مسئولة فقط عن التبرع بالدم .
لم يعبئوا بكوني غير طبيبة؛ طالما تسألين عن الدم وتسيرين بين الأسرة بحرية دون التقيد بمواعيد الزيارة وطالما لاترتدين ملابس الممرضات إذن فأنتي طبيبة وإن أنكرتي.
شعرت بأن لا جدوى من شرح بأن  معي متبرعين بالدم وبأنني المسئولة عن سلامتهم وعن توصيل كل فصيلة للحالة المحتاجة .
واكتفيت بكلمات مليئة بالأمل والتفاؤل بأن ابنتكم ستشفى وستذهب معكم المنزل سليمة
 في أقرب وقت ،واطمئنوا بإذن الله خير.

بماذا سيقولون عني بعد ذلك سوى أني كاذبة وقطعاً خدعتهم وأعطيتهم أمل كاذب.
فهذا المركز اللعين لم يخرج منه طفلاً سوى محمولاً على الأعناق ليس لاستحالة الشفاء من المرض؛ فالمرض بنسبة التحليلات يقول بأنه يخضع للعلاج ويتم قهره بالفعل ولكن لإهمال الممرضات والأطباء.

مازلت أذكر"محمد" طفل في المرحلة الابتدائية ومن أسرة بسيطة ولكنها تجسد الأسرة المصرية الكادحة الأصيلة.
كعادتي تحدثت معهم عن الدعاء ورحمة الخالق فوجدت أمه تفتح قلبها لي بأنها لا تصلي ولكنها تحب الله
لا أعلم بماذا قلت لها وقتها.. ما أتذكره أن ما أطلقه الله على لساني جعلها تقول بأنها ارتاحت لكلماتي وستبدأ بالصلاة.
ما حز في نفسي بعدها أن "محمد" مات.
محمد.. أكتر حد كنت بدعيله وبخليه يدعي وقرأت له الرقية الشرعية.
وأمه كادت أن تقترب من الله دون تذمر.
أظنها الآن لن تفعل فهو كان ولدها الوحيد بعد 7 سنوات عجاف.
والحالات كثيرة...

كيف لي أن أحدثهم بعد ذلك عن رحمة الله والمسئولين عن فعلها في الأرض
 لا يقومون بهذا!.
رحمة الله موجودة ولا شك ولكن الإهمال لا يجعلها تصل.
فكم من ممرضة لم تستطع إعطاء الطفل الجرعة في مكانها الصحيح وتسربت المادة الكيميائية للطفل تحت الجلد.
وكم ارتفعت درجة حرارة الطفل ولم يجد موافقة على دخوله العناية المركزة.
وكم ممرضة تعالت على الأم أو تكاسلت عن إعطاء الطفل الجرعة
وإذا فعلت أعطتها له ناقصة.

لم أعد قادرة على الاستمرار.. موت الأطفال بعد ارتباطي بهم وبث الأمل في أرواح ذويهم صار يذبحني .
فأنا كاذبة، مخادعة.. لن ينجو أحد داخل هذا المركز إلا بمعجزة.
لم أعد قادرة على عمل حملة للتبرع بالدم وأنا أعلم بأن المتبرع قد تتعرض حياته للخطر فهناك لا يتم تحليل قبل التبرع إلا بعد معاناة .-هذا إذا حدثت-.
وكم من أطفال جاء لهم فيروس سي من نقل الدم بعد شفاءه من السرطان.
كل من أعرفهم من الأطفال لم يقتلهم المرض؛
بل قتلهم الإهمال.
فحينما تكون النسبة 80% مثلا وخلال عام تصل إلى 2% ويموت الطفل بسبب ارتفاع مفاجئ في درجة الحرارة يدخل به المركز ويظل 10 أيام لا يمر عليه طبيب واحد وأمه تتعامل كأنها في البيت بكمادات والممرضات يقلن فقط "حميه وهو يبقى كويس"
 في اليوم 12 كان الطفل انتقل الى الرفيق الأعلى.

أنا تعبت وبعترف باستسلامي.
مش هقدر أروح المكان ده تاني.
على الأقل في الوقت الحالي فأنا روحي منهكة حد الإعياء.
ولم يعد لدي القدرة على العطاء أو بث الأمل وجها لوجه.
كيف أبث الأمل وأنا لم أعد مؤمنة بوجوده.
فالسواد في تفشي من أين إذن سيأتي البياض!؟. 



الجمعة، 29 نوفمبر 2013

أنا مش أنتِ



ليه عايزاني أكون نسخة منك.. حرام عليكِ ده أنا بنتك.. أنتِ مبسوطة بنفسك وبحياتك علشان تتمنيلي حياة زيها إزاي أنا عايزة أفهم!.
من وأنا صغيرة وأنتِ بتدعي أن جسمي يكون زي جسمك وآديني بقيت تخينة ومش طايقة نفسي.. كان مالك برفعي كان مضايقك فيه إيه؟؟ هو جسمى ولا جسمك!.

و كنتي بتدعي أن حظي يبقى زي حظك والنتيجة أني رجعت لكم مُطلقة

 ماهو فعلاً كان حظي زي حظك مع فرق طفيف أن مفيش حاجة تجبرني أكمل حياتي في ذل وإهانة.
فاكرة لما قلت لك بطلي تدعيلي ماكنتش بهزر وقتها.









الخميس، 28 نوفمبر 2013

بعد غياب السنين



أستطاع الزمن أن ينهل منك ياصغيري فيبدو علي تقاسيم وجهك سنوات عمرك وهي تجري، ومع هذا مازلت في عيني فارسي الوسيم.
مازالت رؤيتك نقطة ضعفي ، ملامحك تبعث في نفسي سعادة خفية؛
فأنت الحب الحلال والعشق المُحال.
أود أن أذوب الآن بين خلاياك و أتنشق باستمتاع أنفاسك ،
 وأن تغرس في جسدي بصماتك وأسمع بأنين همساتك.
أريد البكاء داخلك ولن أطلب منك تبرير أي شيء فقط تحوطني ذراعيك بقوة وتترك لدموعي العنان دون أن تحاول إيقافها.
أشتقتك وأفتقدتك ومازلت أحبك.




الأربعاء، 27 نوفمبر 2013

عقلي الجاني






 رأيته بعد فراق السنين يصطحب زوجته وطفله ويعاملهما بمنتهى الحب والحنان، تعجبت من هذا فزواجه قد مر عليه قرابة العشر سنوات ومازال يتعامل مع زوجته بحنان ومازلت أرى نظرة حبه لي كلما تلاقت أعيننا مصادفة في الطريق.. تذكرت حينها اهتمامه السابق بي، ومحاولته للفت انتباهي بشتى الطرق، وكم  استخدمت عقلي وقتها في اتخاذ قراري بعدم التجاوب معه أو حتى أعطيه إحساس بأنني أفهم ما يقصد ؛ فهو شاب بلا مستقبل مضمون فمازال يدرس في مرحلته الجامعية وأنا في دراستي الثانوية إذن لا داع لأن أعطي له أمل في الارتباط بي، وفي هذا الوقت كانت زميلته في الجامعه تلفت نظره بشتى الطرق حتى أوقعته في شباكها وتزوجها بعد خطبة استمرت سنوات استطاع فيها أن يكون نفسه، وبمساعدة أهله اصبح لديه وظيفة حكومية وشقة جاهزة..
 أشعر بالندم كلما رأيته يعاملها هكذا أو يتحدث عنها - دون أن يعلم بأن أخباره تصل إليَّ- وتمنيت لو يعود بي الزمان لأوافق عليه وأتزوجه..
 فما أجمل أن تتزوج المرأة بمن تشعر بحبه لها في نظراته ومعاملته كما كان يفعل معي سابقاً..
 سأنحي عقلي جانباً فماذا جنيت منه سوى لقب مُطلقة.





الثلاثاء، 26 نوفمبر 2013

هواية مقيدة



أجبروني أن أتعلم عزف الألحان وتجاهلوا رغبتي في الرقص وموهبتي في أداء الحركات مع مختلف الإيقاعات .
أجدت عزف الألحان بلا اشتهاء واحترفت الرقص بلا دراسات.
علموني بأن الرقص لا يصح أن يكون هواية.
نبهوني لخطورته حتى لايكون غواية.
ففررت منهم وكتبت من الرقص رواية.
تكون لي عوناً وتكون لهم رداً.
بأن حياة الانسان غير خاضعة للميزان.






الاثنين، 25 نوفمبر 2013

مقتطفات نسائية (3)





- تقسى على قلب يحبك.

وتهجر قلب شاريك.

يا ويل عذابي في بُعدك.

ده القلب أصبح عليل.


------------------------------------

- وفي كل مرة أبدأ أحن ليك تعمل حاجة تخليني أبعد عنك وأندم أني أديتك فرصة.

----------------------------

- و زي كل حاجة حلوة بتخلص بسرعة هكذا حملي ينتهي سريعاً بالإجهاض.

--------------

- وهي تبقى حلوة غير وأنت معايا فيها.

-------------

- مشكلتك أنك مش قادر تفهم أني لو زعلت منك بجد مفيش حاجة في الدنيا ممكن تصالحني عليك.

--------------

- كبر دماغك بقى ماعدتش بقرأ تعليقاتك عندي خلاص..

--------------------------

كنت أتمنى ألا أحذف رقم هاتفك لكي أراك تتصل بي ولا أعيرك بالاً حينها لكن لم أستطع أن يظل اسمك على هاتفي أكثر من ذلك.

-----------------------

مللت  القيادة وأريد من يقودني.

----------------

- كلي يا حبيبتي واحدة ليكِ وواحدة ليه.
- يا ماما أنا مخطوبة ليه مش حامل فيه.

-------------------

يوم ما هحبه هرضى بكل ظروفه مهما كانت.






الأحد، 24 نوفمبر 2013

كرامتي بالدنيا




 لم أستطع أن أظل معك دون كرامتي أكثر من هذا..أعتقدت خطأ أن روحي معك وأنني سأموت  حتماً لو فارقتك ولذلك لم أجرؤ على الابتعاد.. كنت أخاف من ألم الفراق وأخشى ألا أستطيع تحمل الحياة بعدك .. لكن بعدما نفذت قراري وجدتني مازلت على قيد الحياة و ليس هذا فحسب فحياتي أصبحت أحسن مما كانت عليه في صُحبتك.. عذراً لكرامتي التي أهدرتها شهوراً معك.





السبت، 23 نوفمبر 2013

استنكار



ما فائدة رسائلي إذا لم تقرأها.

وما فائدة إرسالها إذا لم ترد عليَّ.

وما فائدة الحياة إذا انقطع الاتصال بيننا يوماً.





الجمعة، 22 نوفمبر 2013

الحضن المفقود








 ماكنتش عايزة أكتر من أني أنام على صدرك وأنا واخدة وضعية الجنين واحنا بنتفرج على التليفزيون ودراعك محوطاني..
حضن الأمان أكتر حضن اتمنيته معاك.




الخميس، 21 نوفمبر 2013

حنكة أم



مهما كان شعري خشن ماكنش من حق أمي تقصه دايماً وأنا صغيرة بحجة إنه كان بيتعبها  الصبح وهي بتمشطه.
الآن ومع وراثة ابنتي لملمس شعري  بقول قد إيه أمي كان عندها حق.







الأربعاء، 20 نوفمبر 2013

البادي أظلم



لن أطلب الطلاق كما كنت أنتوي؛ بل سأظل على ذمتك حتى لو تركتنى مُعلقة بلا اكتراث؛ حتى تأخذ إثم هذا ،وليس هذا فحسب سأجعلك تشاهد خيانتي لك دون أن تستطيع منعي.. سأستمتع بخيانتي لك كما اسمتعت بإهانتك لي.




الثلاثاء، 19 نوفمبر 2013

حُرمة الموت





لا تقترب من رفاتي ولا تنبش في قبري فلا جدوى من محاولة الإحياء.
رفضك لتصديق موتي لن يساعد كلانا.
فأنت تنزف قواك على أمل أن تقوم شقيقتك من رقدتها، 
وأنا لا طاقة لي على دفعك بعيداً.
أرجوك ..رأفة بحُرمة الموتى دع جثماني ملفوفاً بإحكام في كفنه.
فأنا لن أعود.




الاثنين، 18 نوفمبر 2013

ردود منسية


- "تفتكري هو بيحبك زي ما أنتي بتحبيه"؟.
ماعدتش فارقة، بعد اللي عمله معايا كل اللي يهمني أنه يتجوزني وبس.

*****************

- "لازم يبقى حافظ القرآن".
هو أنا هدخل بيه مسابقة!
أين استفادتي إذا كان يحفظ القرآن كاملاً ولا يطبق منه حرفاً واحداً
الدين المعاملة.





الأحد، 17 نوفمبر 2013

مش هو



هو فين حبيبي اللي أنا مستنياه ورافضة أي عريس يتقدم لي علشانه!!.
هو حد في خيالي .. معرفش شكله إيه..
لكن عارفة أني لما هشوفه في الواقع هعرفه على طول..قلبي أكيد هيحس بيه.
أنا لسه ماقبلتوش ولا عارفة إذا كان هو عارفني وبيدورعليا أصلاً ولا لأ..

المشكلة إن دي أسباب مش مقنعة خالص لأهلي لما يلاقوني برفض أي عريس يتقدم لي.

لإنه مش هو.

السبت، 16 نوفمبر 2013

احتلال لحياتي الشخصية



عارف يعنى إيه أقعد مع أمك فى شقة واحدة وأنا لسه عروسة؟.
 يعنى طول اليوم هبقى لابسة هدومي كاملة ..
 يعنى لبسي الجديد هي هتشوفه عليا أكتر ما أنت هتشوفه عليا..
 يعنى هتكون كبرج المراقبة.. هتاخد بالها إمتى أنا استحميت وإمتى اتأخرت في نومي وليه قعدت في غرفتي شوية كتير وكنت بكلم مين في التليفون..
 الخلاصة هتبقى عدة عليا أنفاسي.. 
فعلى إيه بقى ما بناقص أحسن.

الخميس، 14 نوفمبر 2013

غزل الروح



- فرحانة قوي كده ليه أنه قالك "أنتِ جميلة"  طيب ماهي دي الحقيقة.. أنتي مفكراه بيجاملك ولا بيغازلك؟.
- لا دي ولا دي هو قالها لما شافني من جوه بعيداً عن شكلي الظاهري.
في كل موقف وقفت فيه جنبه كان بيقولهالي.
في كل مرة فهمته فيها من غير ما يتكلم.. يقولهالي.
في كل لحظة كنت بدافع عنه فيها في غيابه وهو يعرف.. يقولهالي.
في كل مناسبة سألت عنه فيها واحنا متخاصمين.. يقولهالي.
في كل وقت زعلت منه فيه وهو ييجي يصالحني ومن أول ما احسها  في صوته
 أسامحه قبل مايعتذر، وأبرر له تصرفه كمان، ولا أني أشوف في عينيه نظرة كسرته وهو بيقولي "أنا آسف".. يقولهالي.

وما أجمل من يغازلون أرواحنا.


الأربعاء، 13 نوفمبر 2013

حماقة قلب




قلبي كسوته بالجليد منذ زمن ولم يتم ذوبانه بعد.
لا تسألني لماذا فحماقاته المتكررة هي من جعلتني أفعل هذا به ..
عليه النوم الأبدي لأستريح من صراعاته الدائمة مع العقل .
حينما كان يغفو العقل قليلاً ويستيقظ يجد القلب قد فعل كارثة تدميه.
أما الآن فإذا غفى العقل قليلاً فلن يضيرني شيء.
عذراً قلبي هذا ما جنته يداك.

الثلاثاء، 12 نوفمبر 2013

الحب في زمن النت



ولما شوفته لأول مرة قلت مش معقول يكون هو ده اللي حبيته سنين على النت.
صحيح مراية الحب عامية.
لو كنت شوفته الأول كان عمري ما أفكر أكلمه أصلا.
انطبعاتي عنه مكنتش هتكون في صالحه.
ياترى ده حظ مين فينا اللي خلانا نتكلم الأول قبل ما نتقابل.

الاثنين، 11 نوفمبر 2013

وجبة مُتاحة



لو الإنسان جعان واتقدم له أي أكل هياكله مش حباً فيه ولكن لإنه هيسد جوعه..
 هتلاقيه بياكله اضطراري ومع التعود ممكن يدمنه 
لكن لو أكل أكلة هو بيحبها اتفرجي على مدى الاستمتاع اللي هيكون فيه
 قبل الأكلة وبعدها.

حتى لو كان هيموت على أكلة بعينها فده ممكن يكون من
 باب انه يدوق طعم الطبق ده مش اكتر ..
 حتى لو الطبق حلو بس هو ممكن ميفكرش ياكله تانى ؛ لإنه ببساطة ماحبوش.

وفيه طبق ممكن ياكله على طول لمجرد أنه بيريحه .


لكن الطبق اللى بيحبه مهما بعد عنه هيفضل برضه فى باله يتمناه.






الأحد، 10 نوفمبر 2013

إجابة سؤالي عندي

"بعدت عني ليه؟" .
أقولك أنا..
لإنك ماحبتنيش كفاية لدرجة تخليك تتحدى العالم علشاني.
لإنك كنت عايز واحدة تمشي على مزاج أهلك وبس.
لإنك كنت بتستغل حبي ليك ووجعي في بُعدك عني وتبعد علشان تضغط عليا وأكون تحت طوعك.
دلؤتى عايزنا نرجع تانى لبعض!.
عايزني أنسى كل حاجة وكـأنها محصلتش.
عايزني أنسى سنين عمرى اللي ضاعت بسببك.
عايزني أنسى كسري وعجزي بعد ما سيبتني.
وكأن النسيان يحتاج إلى ضغطة زر لا أريد فعلها!.
صعبان عليك أني بقسى عليك.. ما هو أنت يا ما قسيت عليا.
صعبان عليك لإنك حتة مني ..ماهو أنت نزعت نفسك مني بكل قسوة.
صعبان عليك إنك مش لاقي راحتك وسعادتك.. ماهو أنت لو كنت شوفتهم معايا بجد مكنش عمرك تسيبني.
صعبان عليك إنك عايش ميت.. طيب ما هو أنا مُت وأنا عايشة.
تحب أقولك كمان أنت راجع ليه؟.
لإنك مالقيتش حد يحبك قدي ولا هتلاقي ..
تعرف ليه؟.
لأني حبيتك أنت ..بكل مافيك من عيوب .. بكل مافيك من اختلاف واضح بيني وبينك.
عشقت جوارحك وتفاصيلك وملامحك وصوتك وكلامك وأسلوبك.
غضبك وفرحك وحزنك ومرضك وجنونك.. في كل أحوالك ماكنتش عايزة غيرك أنت.
يا ترى واصلك أنت جرحتني إزاي!.


السبت، 9 نوفمبر 2013

نصيحة (12)




1-"أنا اتغيرت علشانك".
اتغيري علشان نفسك مش علشان حد.
أبسط رد هيقوله ليكي" كله كان بمزاجك ومحدش أجبرك"
خوفك على زعله مش هيشفع لك عنده لو قرر أنه يسيبك وهيذلك بعدها بضعفك قدامه.

--------------------------------

2- ماتدخليش العلاقة بـ "كلك" ادخلي بعقلك وبس.
اتعلمي إزاي تزعلي ومش طول الوقت تسامحي وتعدي وتكبري دماغك وتجيبي له في أعذار
خليه يعرف أن معاه واحدة كرامتها عندها بالدنيا مس بالساهل تتصالح.
وده هيكون اختبار منك ليه هتشوفي هيصالحك ازاي وهيتحمل غضبك قد ايه.

------------------------------

3- كوني صاحبة قرار إنهاء الاتصال مش تتكلموا لحد ماهو يزهق ويقولك" أنا هقفل".
في عز مايحلو الكلام اعتذري وانهي الاتصال.
كده هيفضل متشوق ليكي.

----------------------------

4- ماتبقيش دايماً متاحة ليه مهما كان عندك فراغ وفضول.

---------------------------

5- ماتحاوليش تبعديه أو تفرقي بينه وبين البنت اللي هو بيحبها لأن لو ده حصل مش هيكون معاكي زي ما أنتي متخيلة.
قوانين القلب مختلفة تماما عن قوانين العين.
وجودك وبُعدها مش سبب كافي أنه يحبك وينساها.
للقلب غرف منسية  لا يستطيع دخولها إلا من معه مفاتيحها ولا حتى صاحب القلب نفسه.

----------------------------

6- الحب مش محتاج شروط هو بييجي كده لوحده من غير أسباب.
لو حصل بأسباب هيصبح حب معلول ومشروط.
إذا ذهبت مسبباته ذهب.

-----------------------------


7- لما تدخلي أي علاقة اعملي كل حاجة لنفسك وليس للطرف الثاني.
أي حاجة هتقدميها لو مش عايزة أو مش مقتنعة ماتعمليهاش.
اعملي كل حاجة ماتندميش عليها لو العلاقة انتهت.
وحطي في دماغك انها فعلا ممكن تنتهي إلى أن يثبت العكس.





الجمعة، 8 نوفمبر 2013

طلقني



وجدته متعجبأ من طلبي الطلاق لأنه يتركني وحدي دائماً.
وكان رده بأنني في الطلاق أيضاً سأصير وحيدة فالعرسان ليسوا في المتناول السريع إذا كنت أظن ذلك.
هو لا يعلم بأن الوحدة عندي تعتبر مبرر كافي؛ فالوحدة بوجود شريك حياة أمر قاتل.
أخبرته أن الوحدة قدر من الله أما إهمالك لي فهو اختيارك. 

الأربعاء، 6 نوفمبر 2013

نسيتك



عارف يعني إيه نسيتك؟.
يعني لما ترسل لي أغنية "نخبي ليه".
فاسمعها وأعيش معانيها و ألاقيني تلقائياً بدندن مع نفسي أغنية "بص بقى".



الثلاثاء، 5 نوفمبر 2013

شيلني



- شيلني.
- هههههههههه حاضر.
- بتضحك ليه؟.
- أصلك فاجئتيني بطلبك.. طيب تحبي أشيلك ازاي؟.
- شيلني بوضعية أحس فيها أني بتاعتك أنت وبس.


الاثنين، 4 نوفمبر 2013

السبت، 2 نوفمبر 2013

بذاءة


ينعتها بما ليس فيها ويسبها بأمها.
ماذا إذا ردت عليه السباب بأقذع منها وذكرت الست الوالدة بما لذ وطاب وسيكون معها حق فهي لم تحسن تربيته.
هل سيشعر بالراحة وقتذاك؟.
أم أن غروره صور له أنها ستستقبل وقاحته في صمت؟.

الجمعة، 1 نوفمبر 2013

وضع مؤلم


مين قالك إنى هرضى بأي وضع تحطني فيه حتى لو من وجهة نظرك ده الأحسن ليا.. أنا راضية بيك أنت.. مش عايزاك تجيبلي شقة جديدة فى مكان جديد وافرشه على ذوقي وأبقى أنا ست البيت على قد ما عايزة أفضل في بيتي اللي اتعودت عليه واسكن مع غيري ويكون ليا فيك شريك بس ما تبعدتش عني.. أيوة كده أنت واثق في قدراتي على تربية عيالك لوحدي وعايزنى أفضل على ذمتك بس علشان كده.. مش حباً فيا.

*****************

أنتِ أذيتيني كتير وتعديتي عليا كتير لكني مع ذلك مقدرة غيرتك عليه ومسمحاكِ لكن ظلمه ليا علشانك عمري ما هسامحه عليه ما أنا برضه زوجته مثلك الفرق أني الثانية اللي جابها علشان تخلف له الولد بعد ما يأس أنك ممكن تخلفي ودلوقتي بعد ما بقيتي حامل جاي يخرجني من شقتي ويجيبك أنتي ويأجرلي شقة في مكان بعيد.