السبت، 31 يناير 2015

أسئلة بلا أجوبة







ليه محدش غلط في حقي واعترف بده!
ليه زعلي بيهون عليهم!
ليه عتابي مش بيفرق معاهم!
ليه دايما  بيكونوا فيا من الزاهدين!
ليه مفيش راجل حبني!
ليه مفيش راجل اتمناني!
ليه اللى حبتهم استغلوا ده لصالحهم!

هو أنا وحشة أوي كده!.



الجمعة، 30 يناير 2015

مقتطفات نسائية 38






حتى الوحيد اللي حسيته بيحبني بجد وشوفت في عينيه مشاعره
وشوفت في اهتمامه شوقه
 يطلع في الآخر كذاب وكان واخدني رهان

-----------------------------------------

إيماني بيك قواني

--------------------------------

أنتظر لحظة موتك بشغف لأرى صخب قلمي حينها؛ علني أعرف هل قسوتك المتعمدة و محاولاتك الفاشلة في الاقتراب استطاعت أن تنهل من مشاعري تجاهك.

---------------------------------

عارف ليه أنت مابتردش على رسايلي؟
لأن إجابتك هتعريك قدام نفسك
فكل اللي بتعمله يا إما هروب، يا إما لف ودوران، يا إما امتناع تام عن الرد.
----------------------------------

تعرف أن رغم كوني مطلقة إلا أنه لم يمر في حياتي  الورود والدباديب والحاجات الرومانسية الدارجة دي
حتى الخروجات والفسح والكلام الحلو

فعلشان كده أحب اطمنك أن أية حاجة هتعملها معايا هتكون أول حاجة في حياتي

----------------------------------


لن أتشبث بك بعد الآن فقد سقطت من نظري
من الآن فقد انضممت للقائمة السوداء في حياتي

--------------------

أخلع لك اليوم قبعتي ليس لاستطاعتك هزيمتي ولكن لاستغلالك وهني لذلك

----------------------

عليك أن ترضى بما أعطيه لك، حتى لو كان من وجهة نظرك فتات، فلو حاولت أخذ المزيد دون أى اعتبار لرغبتى؛ ستصيبك اللعنة وستأكله بالسم الهارى .

-----------------

معك تعلمت متعة خنث العهد.

-------------------------------

كنت عارفة.. لكنه الفضول ليس أكثر

------------------------

الفرق اللى بينى وبينك
إنى مش ضامنة عمرى وعلشان كده بحب أحسم الأمور على طول
لكن أنت أستاذ في التأجيل
المشكلة إنك على مابتفكر تيجى وتحسم الموقف بكون أنا خلاص نسيتك

--------------------

- في الوقت الذي تقترب فيه مني بسرعة سلحفاة يعدو غيرك تجاهي بسرعة فهد.

-----------------

- روح ضيع وقتك مع غيرى.

------------------

- نفسى أبطل أدور وراك.

-------------------------

- تأبى كرامتك الاعتذار ويأبى قلبى الغفران.







الخميس، 29 يناير 2015

أنت مني






أيوة بتوجع لى قلبى لما بشوفك حزين
أيوة بيفرق معايا عينيك المكسورين
أيوة بحس بعينيا مهما طال السكات

أرجوك انشف علشانى مهما طال البعاد






الأربعاء، 28 يناير 2015

حقيقة مذرية






لم يتذكرها يوماً حتى ينساها
كانت لعبة جديدة أراد استكشافها غير عابئ بما يحدث لها
أما هى
فستشكره يوما على جرحه فبه أصبحت أقوى

أما تشويهه لها لن تغفره له





الثلاثاء، 27 يناير 2015

حيرة





 إنني في حيرة من أمري بعد طول انتظار يتقدم لى عريسين.
واحد في عز شبابه لكن عايزني أربي ولاده.

والتاني بيودع حياته وعايزني لمزاجه.

الاثنين، 26 يناير 2015

غارقة في بحر هواك




تعرف؟
نفسي أوي أبعت لك أقولك وحشتني
وأهديك بكتاب رائع أول ما قرأته حسيت إنه هيعجبك
وأبعت لك لينك موضوع كأني أنا اللى كتباه بيوصف علاقتي بيك أنا شايفاها ازاي
لكن أنت للاسف ماحسمتش الموقف اللى بينا ومابقيتش فاهمة علاقتنا ببعض دلؤتى ايه!
خلاص كده أنا ماعدتش موجودة في حياتك ومش من حقي أراسلك ولو حتى بإزيك!
أنا فى صراع ما بين كرامتي اللي أنت دوست عليها ونفسي اللى أنت هنتها
وبين قلبي اللى شاريك وبيسامحك ونسى اللي عملته فيه

أنا أستاهل منك كده!






الأحد، 25 يناير 2015

ليه ماكنتش فارقة معاك


واضح فعلاً إن زعلي فارق معاك
نفذت وعدك لي على طول
ولما اتأخرت شوية اعتذرت ووضحت سبب التأخير
ولما سألت عليك اهتميت تطمني
ولما عاتبتك صالحتني
مش بقولك واضح فعلاً إنى فارقة معاك


بتضحك ليه.. أنت عارف إن كل ده محصلش !!

السبت، 24 يناير 2015

هو كالبحر






كلامي معاه مش تضييع وقت
لو السباحة والغوص فى عمق البحر تضييع وقت يبقى كلامى معاه تضييع وقت
حد ممكن يقول للى قاعد قدام البحر أنت كده بتضيع وقتك

أهى دى علاقتى بيه.

الجمعة، 23 يناير 2015

بوكيه الورد






وبعد ما حدفت بوكيه الورد بتاع فرحها ومسكته بنت خالتها

وشوشتها في آخر الفرح وقالتلها

"ماتنسيش تحطيه في الفازة اللي في أوضة نومي عند ماما"





الخميس، 22 يناير 2015

يخلق من الشبه أربعين





"التاريخ يعيد نفسه"
جملة مشهورة أثبتت صحتها في مواقف عدة، ولكني لم أتعرض لها بصورة مباشرة إلا اليوم.
حينما رأيته لأول مرة.. ذكرتني ملامحه بصديق دراستي؛ فهو يشبهه كثيراً ولكن اليوم حينما جلست معه ودار بيننا حواراً وأمعنت النظر في تفاصيله وجدته لا يشبهه في الملامح فقط، بل في كل شيء أيضاً..
 فها هو يرتدي طقماً واحداً مميزاً كما كان يرتدي صديقي ..
وها هو يحمل حقيبة مليئة بالكتب والأوراق كما كان يفعل صديقي وهو في هذه المرحلة العمرية كطالب جامعي..
 وهو أيضاً محترف في الكمبيوتر..
 حتى أسلوبه في الكلام وطباعه في التعامل..
 والأدهى حالته الصحية فهو أيضاً يعاني من ألم في ساقه!!.

ترى أين شبيهتي الآن وماذا تفعل.. أتمنى حقاً أن أراها.







الأربعاء، 21 يناير 2015

حدس أنثوي






مش عارفة ليه ما رضيتش أقول للناس عليك واكتفيت بأهلى وأهلك.. يا ترى كنت عايزة أخبيك عن عيون الناس علشان خايفة الناس يحسدونى عليك من كتر ما أنت جميل .. ولا علشان كان فيه حاجة جوايا بتقول إنك لسه مش مضمون واخاف اعمل إعلان وفى الآخر تخذلني.. وكأني كنت حاسة..
ومع إن كل الشواهد كانت بتقول إنك عايزني، لكن مع الوقت زال القناع واتضح إنك كنت عايزنى مجرد بديل لخطيبتك ولما ترجعلك تاني مش هيبقى ليا لازمة..
عرفت وقتها إنك ما كنتش جميل أوي زي ما كنت شايفاك، وماكنتش تستاهل أني أكون معاك من الأول.



الثلاثاء، 20 يناير 2015

مقتطفات نسائية 37





وددت لو أرد على أسئلتك

وددت لو أعاود الحديث معك والمناقشة في أي موضوع

وددت لو أعود أرسل لك ما أشاء وقتما أشاء دون قيد

وددت لو أنسى تجاهلك ونظرتك الرخيصة لي

ولكن
ليس كل ما نود يصلح أن نقوم به

-----------------


تباً لهذا القابع بداخلي الذي مازال يحن إليك.

-----------------------------------


بتسألني عن الماضي ليه
يعني لو قلت لك ماحبتش قبلك هتصدقني
ولو قلت لك حبيت قبلك هترتاح

خليك في الحاضر أحسن ليا وليك
وماتخلنيش أنا كمان أسألك
ومش هقبل بفكرة إنك راجل ومن حقك تعمل اللي أنت عايزه

 --------------------------

لم أكن يوماً معك متمردة
كنت راضية ومستسلمة
وده اللي قوى قلبك عليا
ليتني جعلتك تتذوق تمردي

---------------------------

مش هسيبك
أنت رجلي
أنت سندي

------------------------------

تمنت موته ولكنها تذكرت أن الأشرار لايموتون بهذه السهولة وفي هذا السن الصغير.

----------------------



جرحي ماكنش متحمل لمسة جيت أنت خربشته ومشيت.


---------------------

وأصحى ألاقيني حاضنة سرابك.

---------------------


إزاي تقسى عليا وأنا نايمة في حضن عينيك

----------------------------

اغتصبت قبل أن تكتشف  أن لديها جسد أنثوي.

---------------------


ماتقربش مني أنا مش عايزة أجرحك.. أنت ماتنفعنيش وأنا

ماانفعكش..

----------------

لو كنتي لسه مخطوبة وعايزة تعرفي بعد الزواج هيكون عامل ازاي في أسلوبه معاكي وهندامه وحتى في تربية العيال
راقبي أبوه هتلاقي نسخة كربونية مع اختلافات طفيفة
.

----------------------

حينما بدأت استسلم لعملية غسيل مخى على يديه
حينها أدركت بأن حياتنا سوياً لن تكتمل.

----------------------


أشفق على زوجته كثيرا
فمن تملك زوجاً مثله ستهنأ بشقاء أبدي

-----------------

-
أحلم ببيت يضمنا
وجنة نكون فيها أنت وأنا

------------------------


كان أجمل يوم في حياتي معاك يوم ما افترقنا.






الاثنين، 19 يناير 2015

استيقاظ قلب




كده يا قلبي دقاتك تصحيني من عز نومي تسألنى عليه..
ياترى قلقان عليه.. ولا بتدور عليه.. للدرجة دى مشتاق إليه..
وتتمنى نظرة واحدة من عينيه..طيب هو أنا اعرف عنه إيه..
 يا ترى قلبه برضه بيصحيه علشان يسأله عنى.. نام يا قلبى وسيبه هو يدور عليك..

ياقلبى اهدى عايزة أنام.

الأحد، 18 يناير 2015

رغبة مشروعة






 ماعدتش عايزة أبقى لوحدي.. نعم لا أمل من مصاحبة ذاتي، ولكنى أشتاق لمن يبادلني الحوار، وأن يشاركنى الجوار، وأن يشبع غريزتي بالحلال، وأن يصاحبنى للأعمال الخيرية، والندوات الثقافية، وأن يرافقنى في  السير فى الطرقات، وعلى كورنيش النيل، وأن يهاتفنى ليلاً و يثيرنى نهاراً...

السبت، 17 يناير 2015

طقوس أسرية



 وبعد ما كبرت بدأت أشوف حاجات بنظرة مختلفة تماماً عن اللى كنت بشوفها وأنا صغيرة.
فجميع المسرحيات والأفلام اللى كانت أمى بتحبها وبتخلينا نتفرج عليها فى استمتاع اكتشفت انها كانت ماسخة ولم تكن تستحق تضيع كل هذا الوقت.
وارتباط سماع الأغانى بصوت مرتفع كدليل على السعادة أراه الآن ضوضاء.

وغيرها من الطقوس الروتينية المملة كالمشى فى المصيف كل ليلة بلا هدف وكأنه واجب قومى.





الجمعة، 16 يناير 2015

بتكلم مين







- بدل بتعرف توطي صوتك كده وأنت بتتكلم فى التليفون لدرجة أنى وأنا جنبك مش سامعة أنت بتكلم مين
 طيب وأنا نايمة بتبقى تزعق ليه وأنت بتتكلم فى التليفون.

الخميس، 15 يناير 2015

سقوط الفارسة






بعد سقوطي المروع من على ظهر الخيل والذى تسبب في كسري وكاد أن يطيح بي لهوة عميقة لا أعلم قرارها.
 سأتوكأ على جرحي وسأعالج نزفي وسأعود فارسة تتقن اختيار فرسها.

 وسأقتنع تماماً باستحالة أن أكون معه فى الاسطبل كاستحالة أن يدخل قصرى.

الأربعاء، 14 يناير 2015

أمنية (12)



عايزة أخرج

ومش أي خروجة


أنا عايزة حد يتولى فسحتي


بمعنى أدق يعزمني 


يعملي بروجرام حلو كده علشان يبسطني


وياسلام لو يوديني مكان ماروحتوش قبل كده


ياااه أكون ممتنة له جدا




الثلاثاء، 13 يناير 2015

قانون القلب




عجباً لقوانين القلب
فهو دائما ما يحن لمن يحبه حتى لو لم يبادله نفس الشعور.
ولا يلتفت أو يتذكر من كان يهيم عشقاً فى هواه.
رغم إن الأول اتسبب فى الوجع والثانى اتسبب فى البسمة
ولما يكون مكسور بيلاقى التانى يخفف عنه ويحاول يسعده
والأول لا يلق بالاً لمعاناته
تباً لغبائك أيها القلب
لماذا تحب من يبيعك
ولا تحب من يشتريك







الاثنين، 12 يناير 2015

الرجل الأول






هل تدرك معنى أن تكون رجُلها الأول
حبها الأول
عشقها الأول!

هل ستفرح وتقدر هذه الميزة أم ستجعل غرورك يفقدها.

السبت، 10 يناير 2015

مقتطفات نسائية 36







لإنك أجبن من مواجهتي وعارف إني بعريك قدام نفسك .

------------------

"مش هيقدر ينساني"

دى الكذبة اللي بتحاولى تصبري بيها نفسك.. لإنه بالفعل باعك ونسيكِ وجاب غيرك كمان وهيعمل فيها كده برضه.. واجهي نفسك بالحقيقة الموجعة..أيوة باعك.. ومش هيفكر فيكِ ولا هيحس بذنب تجاهك.. هو ماقالكيش تحبيه وده سبب قوي من وجهة نظره يخلى ضميره مرتاح.


-------------------

قمة دهشتي أن يخرج من حياتي من لم أتوقع مطلقاً أن نفترق سوى بالموت.. ومع كل خروج لأحدهم كنت أتفتت مئات القطع.. فبضعاً من روحى معلقة بهم، وبعد الرحيل عليَّ أن أهيم فى الأرض باحثة عما أخذوه منها لأرده لها.

-----------------------


ولأني ملكة ربت أبنائها فطبيعي أن يتعاملوا مع كل النساء في حياتهم كأميرات حتى لو كن مجرد خادمات.

---------------------


أرفض أن أكتب قصتنا على الملأ فكأني أستجدي تعاطف القراء معي.

------------------------

أعتبر طليقي هو سندي وضهري في الحياة.

هو أبو ابني ومن يتحمل رعونتي وحماقة أفعالي.

-----------------------------

مش مزعلني معاملتاك ليا، وقسوتك عليا من وأنا صغيرة ،على قد ما مزعلني اني معنديش طريقة تانية اتعامل بيها مع الأطفال غير طريقتك معايا.

----------------------------


طبيعي لما هي تكون زعلانة أنت تتصل بيها.
وبرضه طبيعي لو هي ماردتش أنك تفضل وراها.. اتصالات بقى ورسايل ولو قدرت تروح لها وتحسسها انها فارقة معاك وان زعلها وجعك.
اللي مش طبيعى بقى انك تطنش.

-----------------------

حتى لو مش هنكون لبعض كفاية أنى أطمن عليك
أنت لسه حتة منى وطبيعى أنى أقلق عليك

----------------------

زعلان على عمرك اللى بيتسرق منك! طيب أنا ذنبى إيه
هو أنا اللى سرقته!
ولا أنت اللى ضيعته

------------------------

ماتقوليش بحبك بلسانك أنا عايزة أشوفها فى أفعالك.

-------------------

يصعب عليا لو غيرك  حس بوجعى وأنت لأ.

 -------------------------

يمكن أكون لسه بحبك وبحن ليك لكن بعد بعدك عنى ماعدتش بستناك.

----------------------

لو حبك جوايا فهيفضل جوايا أنت مالكش علاقة بيه

-----------------------

متضايق ليه أنى رفعت عليك قضية طلاق
أنا قلت أعمل حاجة تفكرك إنى لسه على ذمتك

---------------------

فرق كبير بين إنك تحبى زوجك وبين إنك تتقي ربنا فيه
الأولى هتخليكي تعملي كل حاجة علشانه وأنتي مستمتعة وسعيدة،  والتانية هتعملي برضه كل حاجة علشانه بس علشان ترضي ربنا.