الاثنين، 30 يونيو 2014

365



وإلى هنا نكون وصلنا لنهاية المارثون وأتممنا الحوليات بسلام.
أرجو أن تكونوا قد استمتعم طوال هذا العام مع المنوعات النسائية التي ضمتها حوليات موناليزا.
شكر خاص للبنى أحمد نور صاحبة الفكرة .
وشكر لـ صديقتي الجميلة/ رحاب صالح.
 فهي صاحبة أكثر عدد من التعليقات.

شكرا لكل من تابع حتى وإن لم يترك تعليق.

حاجات حصلت كده أبهجتني:
- تم نشر "يوم الخطوبة" على مجلة البوسطجي  عن طريق آية محمد حماد  هنا
- تم نشر "ازدراء" على شموس نيوز عن طريق رانيا حجاج هنا
- تم نشر "السيجارة المحرمة" في جريدة القرار الدولي الورقية بواسطة أمل زيادة

تدوينات فاجئتني ورسمت على وجهي ابتسامة واسعة
طارق مسلم وتدوينته حوليات موناليزا.
رحاب صالح وتدوينتها سفر1.

اللي عنده أي نقد أو تعليق أو حتى رغبة في استمرار المدونة يعرفني.
لسه ما قررتش هعمل إيه في المدونة
هل أحذفها بكل ما احتوت؟
هل أهجرها وكأنها تجربة وانتهت؟
هل استمر تدوين نصف إسبوعي مثلا ؟
إمممم مازلت في حيرة من أمري 
بعد رمضان بإذن الله سأعلن عن قراري فابقوا معنا :)





الأحد، 29 يونيو 2014

عني (16)




مابحبش فكرة أن يكون عليا حاجة لحد

فكرة أني أموت مديونة ممكن ماتخلنيش أنام


على سبيل المثال:


- مابحبش حد يعزمني وهو في نيته أني أردله العزومة.


- مابحبش حد يجيبلي هدية علشان أردهاله.


- مابحبش حد يدفعلي أجرة المواصلات ولا تصوير ورق ولا أي حاجة خالص من دي.


- تعاملاتي المادية معاملة إنجليزية بحتة.


- لو حد حابب يعمل واجب فماينتظرش رده ووقتها تبقى هدية بجد.


(أنا شخصيا لما بهادي حد ماببقاش منتظرة ردها)


لأنها هدية مش سلف.


- بكره أوي حكاية واحدة تيجي تنقط قريبتها بفلوس فالتانية تستنى أقرب وقت علشان


 تردهالها ولو مارديتهاش تبقى فضيحة وكأن الموضوع سلف مش "تهادوا تحابوا"-

إمتى يبقى سلف والمفروض أرده؟


لو أنا اللي طلبت (تعزمني، تدفعلي مواصلاتي، تجيبلي عصير معاك،


 عاوزة منك كذا، عيد ميلادي قرب، إلخ إلخ إلخ)

في الحالة دي بس أنا ملزمة أردهالك


لكن لو حاجة جت من غير ما اطلبها ولا أبين حتى رغبتي فيها


فهي دي الهدية اللي بجد وبعتبرها وقتها رزق من ربنا.

" من عرض له شيء من الرزق من غير أن يسأله فليقبله فإنما هو رزق ساقه الله إليه "

.
ذوقيا مني أني أردها بأحسن منها لكني مش ملزمة إطلاقا بردها.


(يعني لو مُُت مايبقاش عليا ليك حاجة).




السبت، 28 يونيو 2014

عنهم




اللي أنتي بتلوميها عليه أنتي نفسك بتعمليه.

---------------------


عن كلامك عنها


أراه غيظاً في الأخرى وليس حبا فيها كما تظهر

-----------------


عنها يوم الوداع لما قالتله عايزة حضن


قالها :حاضر.. وماحضنهاش.

------------------


يوم ماتلاقيها بطلت تتضايق أنك سايبها لوحدها


اعرف أن فيه حد غيرك ملا حياتها.

-------------------


عنها لما عيطت في حضنه وهو بيصالحها.


---------------------


عنه وهو بيقولها : حقك عليا.







الجمعة، 27 يونيو 2014

مشاعر منوعة





عن لما تجيلك حاجة كنت بتحبها أوي زمان في وقت ماعدتش ينفع تستخدمها فيه.

-------------------

عن لما اكتب جملة حساها أوي واعمل من خلالها قصة 

يقوم أحد النقاد يختار الجملة دي تحديدا ويقولي لو شيلتيها القصة هتبقى أظرف!


-------------------

عن فرحتها بأي عريس يدخل البيت وكأنه جايلها هي مش جاي لبنتها.

----------------------

عن لما تطلب منه حاجة نفسها فيها ومايجيبهاش

 ويجيب حاجة تانية أرخص منها فماتعجبهاش.

-------------------

عن لما تكون مروح بالليل وتلاقي الجو حلو وتكون عايز تتمشى

 وفجأة تفتكر أن وارد الكهربا تقطع وأنتي بنت ماشية لوحدك بالليل

 فتركبي تاكسي أضمن.

--------------------

عن حضنه ليها يوم الفرح لما لقاها بتبوس راسه بعد ماهو باس راسها.

--------------------

عنها لما تكون في أسعد حالاتها وهي بتحضر له الأكل وهي اللي مابتحبش المطبخ.

-------------------------

عن لما تفهم الرسايل متأخر.







الخميس، 26 يونيو 2014

نصايح (22)


ماتبقاش بتقرأ القرآن غلط ومن غير تجويد

 ويبقى لك عين تحفظ عيال صغيرة القرآن وتبقى دي شغلتك وتاخد عليها فلوس كمان..

اتعلم الأول تجويد وبعدين ابقى حفظ العيال براحتك


(وابقى إم الناس في الصلاة واقرأ قرآن بصوت مسموع وقتها براحتك برضه)


أنت مدرك كم السيئات اللي في ميزانك لما كل عيل من دول يقول سورة غلط ويفضل 


عمره كله يقولها كده!

ومن أ ب تجويد حضرتك


أن فيه فرق شاسع بين حرف الـ"ذ" و"ز"

ما ينفعش أقول مثلا "صراط الزين أنعمت عليهم"


لازم تتقال وأنت بتطلع لسانك "الذين "


ماينفعش يبقى اسمك سعاد وحد يناديلك ثعاد.


----------------------------

ماتتعامليش مع بنتك على اعتبار أنها مثلك

 (هتحب اللي تحبيه وهتكره اللي بتكرهيه)

هي شخصيتها غيرك وجيلها غير جيلك.


--------------------------

ازرعوا في ذكريات أطفالكم حاجات حلوة علشان تحصدوها بعدين.

----------------------

ما تكتبش لحد رسايل(حتى لو مجرد شغل) وأنت عارف أنه كيف عنده

 يصورها كوبي وباست وينشرها عنده على سبيل الفشخرة.

ده إنسان غير أمين.


---------------------------

الوقت اللي تضيعه في أنك تعمل ريبورتات لصفحات مسئية للإسلام

 والوقت اللي بتشتم فيه الملحدين 

استغله واعمل حاجة حلوة تحبب الناس في الإسلام.


-------------------


ليه استنى مناسبة ما (عيد ميلاد، نجاح، عيدأم ، عيد زواج، عيد عمال...)

علشان أجيب هدية لحد بحبه


الهدايا مش محتاجة مناسبات


أي هدية صغيرة هتسيب أثر حلو في نفس مستقبلها


خدوا نية "تهادوا تحابوا"


وابسطوا بعض 


-------------------

للأنثى: في حاجة اسمها قبول وراحة نفسية

ودي لا تقل أهمية عن دينه وأخلاقه


لو عايزة الجوازة تكمل وتستمر يعني


--------------------


شنطة إيدك الكبيرة حطي فيها

"زجاجة ميه ساقعة ومناديل ومرايا"


دول بنفس أهمية المفاتيح والمحفظة والموبايل


(بايخة أوي لما تشحتيهم من حد)


----------------------

اختاروا لعيالكم أسماء حلوة يشكروكم عليها لما يكبروا.




الأربعاء، 25 يونيو 2014

منوعات حياتية





أسهل حاجة الراجل ممكن يعملها في الست إيه؟.

- أنه يطعنها في شرفها .

--------------------------

- ماتيجي تقعد معايا أنا والولاد.

- معلش أصلي قاعد أذكر ربنا.



وحد قالك أن وجودك بينا ده مش طاعة لله!!


أنت ممكن تذكر الله وأنت قاعد في وسط عيالك ومراتك عادي على فكرة.


--------------------

-وهو يجيبلك هدية دهب بعد الجواز ليه! ماهو جايبلك شبكة بقد كده.

- بس أنا أولى ولا صاحبته.


- صاحبته طبعا.. انتي خلاص بقيتي مراته.


----------------------

علمته يحب اخواته أوي ويكره ولاده مش أوي 

وده لأن أمهم من وجهة نظرها عقربة


-------------------------
(1)

-أنت طلقت مراتك ليه؟

- أصل أمي ما بتحبهاش وهي اللي أمرتني بكده.
(2)



- أنت ليه معلق زوجتك الأولى ما تطلقها بدل أنت خلاص اتجوزت غيرها؟

- أصل أمي موصياني قبل ماتموت أني أخليها زي البيت الوقف.



وجهة نظرهم اللطيفة هنا أن "طاعة الأم واجبة وأن برها هو اللي هيدخلني الجنة"!


-----------------

متضايق اني بشتكيك للناس

ماهو من غلبي


عامة دلوقتي بشكيك لله


-------------------------

بيشكي أنها طول الوقت قاعدة على الكمبيوتر وسايباه

مايعرفش أن لو كانت قعدتها معاك حلوة وبتشبعها نفسيا


 مكنش فيه حاجة في الدنيا ممكن تشغلها عنك

------------------------

ممكن الجوازة تبوظ أو ما تتمش أصلا


لو حد لعب في دماغ أهل أحد الطرفين وقالهم كلام عن الطرف الآخر


 لمجرد أنه مش مقتنع بيهم لأسباب خاصة

زي مثلا:


- العالم دول ماينفعوش معاك خد بنصيحتي


(يقولها للعريس أحد أقاربه والذي للصدفة قريب للعروسة )


العريس يسمع كلامه لأنه واثق فيه ومايتقدمش أصلا بعد ما عشم البنت 


-ليه طيب؟


- أصل أنا عارفهم كويس البنت دي جدها عمل معايا موقف زمان مش ممكن أنساه

- والله بجد!! تبوظ الجوازة وتكره الواد في البنت لمجرد تار بايت بينك وبين جدها


 اللي مات من سنين!!

طيب والبنت نفسها وأبوها وأمها ملكش عليهم تعليق


-لأ الحقيقة أنا ما اتعاملتش معاهم بس العرق دساس يا با.


موقف آخر:


- بنتي متقدم لها فلان.. إيه رأيك فيه؟


- لا ياعم.. إبعد دول مش مستواكم خالص والواد مش مظبوط.


وبعدها خد العريس اللي خلى أبو العروسة يرفضه وقاله عروستك عندي

 وجوزه لبنت أخته !!





الثلاثاء، 24 يونيو 2014

عاد لينتقم


لم يعد الأمر قاصرا على الباعوض فقط ؛

هناك أنواع أخرى من الحشرات أصبحت تسود المنطقة

 وما يؤكد صحة إدعائي هذا أنني أعلم جيدا لدغة الباعوض

 (فهي عِشرة عمر) ولأن هناك آثار للدغات لم أستدل بعد على فاعلها فأردت التنبيه.

بالإضافة لاكتشاف خطير وهو أن الباعوض لا يموت بالأقراص القاتلة


 هي فقط تقوم بتخديره حتى إذا ما انتهى القُرص واحترق تماما يفيق الباعوض من 

غيبوبته ويعود لممارسة مهامه على أكمل وجه.

نسأل الله أن يكون وجوده في حياتنا تكفير لذنوبنا.







الاثنين، 23 يونيو 2014

نصايح (21)





1 - جرب تسأل ابنك قبل عيد ميلاده تحب أجيبلك إيه.

وهاتله اللي نفسه فيه.


وسيبك من اللي أنت مقرر تشتريهوله لأنه من وجهة نظرك أفيد وأقيم؛


ده ممكن تجيبهوله عادي في أي وقت،


لكن الهدية سيبه هو يختارها..


ولو عايز تفاجأه.. إسأله قبلها بشهر مثلا ولما ييجي يوم عيد ميلاده هيكون نسى أصلا 


أنك سألته وهيطير من الفرحة لو لقاك جبتهاله.

-------------------------

2- علموا ولادكم قيمة "احترام الكبير والعطف على الصغير".

---------------------------

3- عودوا ولادكم من صغرهم مايبسوش طنط وعمو.

------------------

4- ابنك الصغير أبو سنتين تلاتة حاول تسجل كلامه دلوقتي؛

 لأنك فجأة هتلاقيه كبر وبقى يرد عليك الكلمة بعشرة.

---------------------

5- بلاش تكونوا أداة إحباط لولادكم.







الأحد، 22 يونيو 2014

عنها







1- عنها لما تفضل مستنياه أيام وليالي ولما ييجي يشتمها ويتخانق معاها.

---------------------


2- عن لما تقوله عايزة حضن وهو في عز غضبه فيفتح دراعاته ليها

 من غير ولا كلمة.

---------------------

3- عن فجيعة امرأة الثلاثين التي لا تجد سوى حضن وسادتها وزوجها يغفو في

 الجوار.

---------------------

4- عنها بعد ما تكتب تعليق على بوست لصديق لتجد قبل الإرسال

تعليقه أمامها (صديق مشترك)

فتحذف ما كتبت حتى لايظن بتعليقها أنها تنتهز الفرص لتظهر أمامه عن عمد؛د

 فهي تعلم جيدا كيف تفكر شخصيته الغير سوية.

------------------------

5- 

عن فرحتك بنجاحه رغم أنه مايستاهلهاش

أصلك اللي ياما دعيتي يمسك في الفرحة ومايسيبهاش.

----------------------------

6- عن فرحة بناتها حواليها وهي اللي ياما قالوا عليها مابتخلفش.

--------------------

7- عن فرحتها لما تعمل أكلة جديدة وهو ياكلها باستمتاع ويقولها تسلم إيدك.

----------------------

8- 

عن لما يبقى وراكي معاد مهم والطرحة ماترضاش تتظبط من أول مرة .

---------------


- أنتي مش بتقولي بتحبيه!

- أيوة بحبه بس مش كراجل.

- أمال كست! (كسيدة)

- لأ.. كإنسان كوميدي وشهم ودمه خفيف وناجح وبيقول شعر حلو ..بس كده..

مش شايفاه راجل يعني ممكن أتجوزه..







الجمعة، 20 يونيو 2014

مُصالحة




يتعجب من اشتياقي الدائم له رغم بُعده المتعمد عني.
لا يعلم بأن لي طُرقي الخاصة التي أصالح بها نفسي عليه فيصبح بالنسبة لي بريئاً تماماً من أية أعذار قد أطلبها منه.
فعلى سبيل المثال :
أستمع لأغاني تحوي كلمات أشعر أنها تشبهني وأتخيل أنك تهديها لي،
أقرأ قصائد شعرية مناسبة لحالتي من غضبي واستيائي منك.
 أتخيلك موجود في مكان كنت تعلم مسبقاً بوجودي فيه لتفاجئني بإلقائك قصيدة شعرية محببة لقلبي أمام الجميع طالباً مني الصفح.
أقوم بتصميم بطاقات عليها صورتي وصورتك مع بعض الكلمات التي أتمنى أن تهديها لي.
أتخيل تصرفات مفاجئة منك لي كهدية رقيقة، أو حضن غير متوقع، أو مكالمة في وقت أعلم أنه من الصعب أن تهاتفني فيه.
 أكاد أعصر ذاكرتي محاولة أن أتذكر كلمة عابرة قلتها تسببت في نشوتي وقتها، أو حركة لذيذة عملتها بتلقائية من أجل أن أضحك.
 أوهم نفسي أنك حقاً تحبني، وأنك قطعاً لم تقصد أن تتسبب في غضبي.

جل ما أخشاه أن يكون هذا أسلوبك في الحياة .
وتصبح وحدتي في بعدك ووجعي من تصرفاتك الأمر الواقع الذي عليَّ التأقلم عليه.






الخميس، 19 يونيو 2014

رأي النقاد



نشر القصة الذي كتبها على أحد الجروبات التي تهتم بالأدب وتنقده ،
منتظراً أن يستمع للآراء وهي تمدح في قلمه، وتثني على روعة أسلوبه،
فكان الرأي الأول" الفكرة سطحية، وتحتاج إلى عمق".
والرأي الثاني" تحتاج لقراءة كثيرة؛ لتحسن من أسلوبك".
أما الثالث" مرادفاتك كالتلميذ في ابتدائي".
 الرابع" اترك الكتابة، ومارس هواية أخرى".
 الخامس" اكتب ما تريده في ورقة، ثم أقرأها جيداً، ومزقها قبل أن تطلع عليها أحد".
 السادس" العالم الأدبي لم يعد في حاجة لمزيد من الداخلين".
 السابع" جميلة كمحاولة أولى".
 الثامن" اقرأ جيداً عن فن القصة، واحضر ورش قصيرة ان استطعت"
 التاسع" لا تيأس وأعد التجربة".
العاشر" الحدوتة دارجة، واتهرست قبل كده كتير".

شعر بالغيظ، وكادت الدماء تنفجر من رأسه، وهم أن يخبرهم أن هذه القصة منقولة حرفيا من كاتب مشهور، وقد أثارت ضجة إعلامية، وحصل بها على العديد من الجوائز منذ أعوام عديدة.. وأنه فقط غير العنوان.

- تمت-

الأربعاء، 18 يونيو 2014

نصايح (20)


لو شك فيكي ماتتعبيش روحك معاه

لو حلفتيله على الميه تجمد مش هيصدقك

هو عايز حاجة معينة كدليل منك ولو ماعملتيهاش هيعكنن عليكي


أو هياخدها حجة للفراق

ما هي أصلها بتبان


يا أحبك وأنت تكون مصدق ده


يا مابحبكش وأنت برضه مصدق ده

"شكه فيكي إهانة ليكي "


----------------------------------------

نصيحة للأمهات: ربي ابنك كويس علشان ما تتكسفيش من رد 

فعله لما تكوني مع ناس بره وراسمه دور أنك من بيئة راقية.
---------------------------

نصيحة للخالات والعمات: بلاش أول ماتشوفوا حد تعاتبوه وأنت 

مابتسألش ليه ومابتجيش ليه وتقضوها كده والولد يقعد يبرر 

بحجج يمكن تكون غير صادقة بس علشان يصالحكوا..

بعد كده مش هيحب يجمعكم مكان..

خليكوا خفاف كده وبلاش تشيلوه ذنبكم وإحساس بالتقصير

وهو لو لقى قعدتكم حلوة هيتصل وهيجيلكم لوحده

على الهامش:

ماتبقيش ناكراه وهو صغير ومنتظرة يبرك وهو 

كبير



الاثنين، 16 يونيو 2014

النتيجة النهائية




 أعطي لمن أتعامل معه لأول وهلة دوماً نسبة مئوية بحجم الخمسين؛ فهذا يعني أنه تم قبوله مبدأياً ليكون بيننا تعامل، وعلى تصرفاته أن تحدد النسبة المتبقية ليكون عندي للشخصية نسبة نجاح تؤهله لأن يكون في حياتي حتى إذا كان سيشغل حيزاً صغيراً .. إلا أنت فقد أعطيتك منذ الوهلة الأولى المائة درجة كاملة بلا نقصان، ولكنك ظللت تنهل من الدرجات إلا أن صارت صفراً.. النتيجة النهائية تم بترك من حياتي.