الأحد، 31 مايو، 2015

عني (24)





هي الناس نست أن ظهوري على النت كان بمدونتي أمة الله!!

واللي لسه بفضل ربنا شغالة من يوم ما اتعملت.. 

لا هجرتها ولا بطلت اكتب فيها.
اختياري للاسم كمان مش من فراغ.

أنا أمة الله التي ترجو رضاه.

يعني طبيعي أغير على ديني وما قبلش بانتهاك محارمه.

يعني أدعو لسبيل ربي بالحكمة والموعظة الحسنة بقدر جهدي.


يعني أريد الإصلاح ما استطعت.


يعني أتقبل كل الناس عادي آه لكن ماسمحش لحد يغلط في ديني


ويشكك في فروضه ويتهكم على رسولي ويسخر من أمهات المؤمنين والصحابة.

والله عيب لما ألاقي مسلم وماسك الدين سخرية.

ولا لما ألاقي مسلمة منزلة صور عارية وكاتبة اللي غرايزه نأحت عليه يعرفني..

ومع نبرة القوة في كلمات المستهزأين تجد من يخضع في التعليقات

 ويسخر معهم لينول لقب الانفتاح العقلي المستنير لسائر الأشياء!!

ومع استمرار الهجوم على الدين

وانتقالا من المحاولات المستميتة لإثبات عدم فرضية الحجاب

وصولا إلى أن المثلية (الشذوذ الجنسي) حرية شخصية ومحدش له دعوة!!

اللي هي عندنا في الدين اسمها السحاق واللواط.


اللهم لاتؤاخذنا بما فعل السفهاء منا.

اللهم ثبت قلوبنا على دينك.

اللهم إذا أردت بقومي فتنة فاقبضني إليك غير مفتون.

اللهم لا تجعل مصيبتي في ديني.




السبت، 30 مايو، 2015

مقتطفات نسائية (50)








والدك العظيم هذا الذي تقف أمام قبره متبتلا لم يحسن تربيتك

 ولو عاد إلى الحياة لبصق في وجهك.

------------------------------


معه، لا تتغاضي عن شيء؛ فكرامتك هي الأبقى وحدسك هو الأصدق.

--------

ماكنش حب؛ كان رغبة في معانقة الحياة.

-------------


بما أنك تعمدت خسارتي فلتصمت للأبد.


 --------

تسألني بتعجب ما سبب الفراق بعد طول فترة الارتباط
أجبتها: حقاً لا أذكر ولكن لعله عمر الرباط انتهى لهذا الحد.

-------------------------

وفى عز شبابى حاسة إنى طلعت ع المعاش.. طيب هو أنا لحقت أشتغل.

--------------------

واضح فعلاً إنك متعرفش عنى حاجات كتير من ضمنها إنى أجيد النسيان.

-----------------------------

لوخدتى قرار إنك تسيبيه إوعى ترجعى له تانى.

--------------

 أعشق ذاتى حينما تقلد أسلوبى فى الحديث وطريقة غضبى منك.

--------------


وأول ما قالي بحبك حسيت أن روحي اتعلقت بيه.



الجمعة، 29 مايو، 2015

الأربعاء، 27 مايو، 2015

عالم موازي2




في عالم موازي هيكون فيه زراير كتير للتحكم في كل شيء
زر للضغط على منطقة معينة في الجسد لتخسيسها.

زر آخر للشعر لتغيير درجة لونه والتحكم في طوله.
زر آخر للأظافر يجعلها تطول كما تريد بعد أي كسر تتعرض له.






الثلاثاء، 26 مايو، 2015

مد وجزر






لا تقيم مشاعري بميزان عقلك، فأنا كالقمر حينما عشق البحر، فسلط عليه المد والجزر

 ليتلاعب بغروره، فظن البحر حينها بأنه المُتحكم الوحيد في أمواجه.





الاثنين، 25 مايو، 2015

لما تقولي يا جواز








- خدي اللي يفرح بيكي وتشوفي فرحته دي في عينيه.


- خدي اللي تحبي نفسك معاه وماتبقيش شايلة هم مقابلته او مكالمته.


- خدي اللي يخاف عليكي ويبقى عارف ازاي يحميكي من نفسه قبل أي حد تاني.


- خدي اللي يساعدك على الطاعة ويفكرك لو نسيتي.


- خدي اللي يحترم خصوصيتك.


-خدى اللى لحظة الغضب فضل انسان و ما اتحول لحيوان حتى لو اقدم لك مليون عذر

 عن همجيته لحظة غضبه ما تصدقيش لان فى لحظات الغضب

 بيبان معدن الانسان الحقيقى.

خدي اللي يقف جنبك في شدتك ويبقي في ظهرك.

- خدي اللي يعرف يضحكك في عز همك لأنه هايعمل أي حاجه عشان يشوفك مبسوطة.

- خدى اللى تشوفى انه ما بيستقواش ابدا على حد اضعف منه و لما بيحب يعمل راجل بيكون على راجل زيه و فى نفس قوته علشان تضمنى انه يحميكى و ميجيش يوم يستقوى فيه عليكى.
- اوعي تتنازلي عن دينك ومبادئك علشان ترضي حد لأنك من غيرهم ولا حاجة.

- اوعي تدخلي في علاقة وانتي ناوية تقومي بدور الداعية (اللي ربنا هيهديه على إيديها).


- ماتتغيريش علشان حد.


- ماتعمليش حاجة مش مقتنعة بيها علشان ترضيه.


افهمى ان مفيش حد مفيهوش عيوب

لو بتحبيه وحتقبليه اقبليه كله ع بعض بمميزاته وعيوبهعشان مفيش حد بيتغير عشان 

حد.


- ماتستهونيش بالتفاصيل.








السبت، 23 مايو، 2015

نصيحة (26)







من مصلحتك لما توصلي لسن تجاعيد جسمك فيه باينة حتى لو مكنتيش محجبة

 إنك تلبسي مقفول.

-----------


لقيتلك حل تحفة للدايت


البسي واسع ياقطة والبروز الظاهرة هتدارى.

-----------------



لما يتقدم لك عريس


اتكلمي معاه في قضايا شائكة وشوفي رأيه

يا اما هيبهرك بتخلفه وهتنهي قبل ما تبدأي

يا اما هتكملي معاه وانتي مطمنة ومبسوطة

------------------


البسي بادي وبنطلون ضيق وبصي على نفسك في المرايا


وانتي تقتنعي انك لازم تعملي دايت 

-------------------


علمي ولادك يشدوا السيفون الله يكرمك.


-----


رسالة للأم: ربي ابنك يا حاجة أنه يعتمد على نفسه في تلبية متطلباته الشخصية

 طالما معندوش إعاقة تمنعه.. علميه يكون مهندم في نفسه حتى وهو جوه البيت..

علميه أن المرأة لم تخلق خصيصا لخدمته أو للترفيه عنه.


----

تعرفي؟ 

أنتي ممكن تجيبي الفستان بكم أصلا بدل ماتلبسي تحته بدي.





الخميس، 21 مايو، 2015

من وحي الصورة (4)







حين يهب لي الله نعمة الإبصار ليس من حق أحد أن يحرمني منها حتى وإن كان دافعه أن الواقع مُذري..
 الخيال الحالم لن يجعلني أستمتع كما تظن؛ فيوما ما ستزاح الغمامة،
وحينها لن أستطيع مواكبة ما حولي من دمار وخراب
 و قد أتمنى العمى لأحيا مُجددًا في الخيال.






الأربعاء، 20 مايو، 2015

مقتطفات نسائية (49)




- عمر ما حد قالها آسف
عمر ما حد حس أصلا أنه جرحها
--------------
- وأنت يهمك في إيه موبايلي نوعه ايه!
--------------
- مش معنى أنك وحشتني أني عايزة أرجعلك.
--------------

- بس يا ستي وهيدخلك من مدخل أنه خايف عليكي وبتاع
فيكبر في عينيكي أكتر، وتدهولي على عينك معاه أكتر وأكتر...


-------------------

- ويوم ما بتكون ست البيت بتكون لبيت مش بيتها.

-------------------


- عن ذكريات كتيرة بينهم هو مش فاكر منها حاجة.

----------------------

- مش عارفة ليه دلوقتي بقيت كل ما أشوف صورة راجل لابس بدلة كده ونضيف سواء في فرح أصحابه أو في فرحه هو شخصيا
أو في مناسبة أخرى
أتخيله وهو قاعد في البيت منعكش ومعفن

-----------------------

- كل حاجة في الدنيا ممكن تتأجل لما تعرف إني محتجالك.

------------------

-سحقاً لفراغ جعلك تتملكني.

---------------------

-وبعد جفاه معها منذ مولدها المفروض أن تمرضه في شيخوخته!

-------------

-إذا تسببت في ابتعاده عني لن أغفر لك ما حييت.

-----------------------

-جابلها هدايا كتير حلوة وغالية
بس مافيهومش ولا حاجة هي عايزاها

--------------

عمر ما حد وعدها وعد ونفذه.

---------------

ماكنتش تعرف أنه سمى بنته على اسمها من قبل حتى مايقابلها.

----------------

لا تريد أن تعرف لماذا، ولكنها ستجن حتماً إن لم تعرف كيف استطاع فعلها!.





الثلاثاء، 19 مايو، 2015

رسائل إليه





اللي بتتكلم عنها وحش دي سواء بعد طلاق أو ارتباط أو فسخ خطوبة

 كانت في يوم من الأيام واثقة فيك وبتعتبرك راجلها.

--------------


عن كل زوج مش راضي يطلق مراته بس علشان بيحب عياله ومرتبط بيهم.


------------


لكل أب ناوي يطلق مراته أويتجوز عليها


أحب أعرفك أن ولادك عمرهم ماهيسامحوك على وجعك لأمهم

مهما كانت أمهم من وجهة نظرك مخطئة وأصبحت لا تطاق.

---------------


ماتنساش تسألها قبل العقد: هل تقبلينه زوجًا لكِ؟


ماتنساش تسأله: عايز تتجوزها ليه؟

---------------------------


الأولى أنك تحتفل بنجاحها مش بإنها كبرت سنة.







الاثنين، 18 مايو، 2015

بيعة وشروة



يرى ابنته بضاعة كاسدة، مما يجعله يبتهج فرحًا برؤية مُشتري يظهر في الآفاق، حتى 


وإن باعها بثمنٍ بخس،فأي سعر سيكون أفضل من حالة الركود.

 ما يهمه أن تزاح من عاتقه ليتباهى فيما بعد بأن بضاعته أصبحت رائجة،

 وإلا ما كان اشتراها أحدهم.

الأحد، 17 مايو، 2015

من وحي الصورة (3)



حتى وإن كانت فكرتي المُنيرة ستكون سببًا في هلاكي سأقدمها؛ لعل من يأتي من بعدي يكملها ويضئ الطريق لقراءة واعية لكل ما يدور حوله فيتقدم مجتمعي ويزدهر..
لكل من أراد أن نحيا في الظلام سنقدم أرواحنا فداء.









السبت، 16 مايو، 2015

فرصة تانية






"نعوض اللى فات"
وهو اللى فات ممكن يتعوض ازاى؟
العمر اللى راح
والقلب اللى اتكسر

والروح اللى اتشوهت