الجمعة، 31 أكتوبر 2014

مشاهد حياتية



الولد لأبوه وهما بيتفرجوا على مشهد في فيلم:
- هو بيبوسها كتير كده ليه يا بابا؟
- علشان جوزها يا حبيبي
- طيب ما أنت وماما متجوزين ومابتبسوش بعض ليه؟

--------------------------


- إتأخرت ليه؟
- كنت بجيب هدية مع واحد صاحبي لمراته
- ليه؟ هو بيخونها
- آه
 
- وجاب لها إيه؟
- شنطة
- كنت قله أني عايزة جزمة.




الخميس، 30 أكتوبر 2014

مقتطفات نسائية (29)




- مش عايزة حياتي معاك تكون ملل، وروتين مُكرر،وإعادة ليوم طويل ما بينتهيش.


---------------------------

- اعترفوا إن واحشكم كلامي وقت سكوتي.

---------------------------

- ماتفرحيش باهتمامه أوي كده
أنتي مجرد صورة تشبه حبيبته القديمة مش أكتر

------------------------------

هي كمان بتحبه، لكنها زوجة مخلصة وأم حنون..
عكسه تماماً فهو زوج خائن
.

-----------------------------


- مش معنى أني وافقت على زواجك منها أنك تفضل تحب فيها قصادي
المفروض تراعي مشاعري وتحبوا بعض بعيد عني.

------------------------------


تعرفي هيرجعلك إمتى؟
- لو له عندك حاجة هيرجع؛ غير كده فماتحلميش.

-----------------------------



- زعلان من لاوية بوزها قصادك!

طيب أنت حاولت تفرحها مرة وهي ما ضحكتش؟



- يعني ايه ما بيحبكيش؟
يعني عادي لما مايردش على رسايلك ولا اتصالاتك
يعني عادي لما مايتصلش ولا يسأل غير لو كان فاضي وزهقان ومش لاقي حاجة يعملها

-------------------------------------


- ولما بصيت لصوري معاك

لقتني لما سيبتك بقيت أحلى كتير

----------------------------------------

أنه جيد ككاتب وليس كحبيب.

-----------------------------


ماتحاصرنيش بحبك واهتمامك لأني كده هتخنق؛ ولو ده حصل مش هطيق وجودك في حياتي
وما تهملنيش وتتجاهلني؛ لأني كده هعتبره عدم تقدير وعدم احترام ووقتها أنا اللي هبعد نهائي
خير الأمور الوسط؛
لما احتاجك ألاقيك ولما تبعد أبقى عارفة فين ألاقيك.

-----------------------------------

عايز تعرف ليه مش قابلة آديك رقم تليفوني؟
لأني مش هسمح لك يوم ما مراتك تلاقي اسمي على موبايلك وتسألك مين دي فأنت ترد وتقول واحدة كانت عايزاني في شغل أو أي حاجة تانية غير أنك هتقولها أني صديقة زي ما أنت بتحاول تقنعني أن أقبل صداقتك.


----------------------------

أهي اللي عندها فراغ من وجهة نظرك معندهاش وقت ترد فيه عليك.

--------------------------------

 مهما أشوف من زوجى التاني عمري مااتمنى أرجع لزوجي الأول
لإنه لو كان كويس مكنتش سيبته وتمنيت غيره
ومش معنى إن التاني وحش إن الأول كان نعمة
هو آه من عيوب التاني التي لا تغتفر إنه خلاني للحظة أحن لأيام الأول بالمقارنة باللي أنا عايشة فيه دلوقتي
بس برضه عمري ماهرجع للأول
بفكر جدياً أطلب الطلاق.

------------------------


تؤمن تماماً أن الأحداث السعيدة تحدث ولكن ليس لها.




الأربعاء، 29 أكتوبر 2014

لأنك غبي



طلبها للخروج ليس رغبة منها في ممارسة الدلع والرفاهية كما تظن، ولكنه علاج مضاد للاكتئاب التي تحاول مقاومته بضراوة..
أنت لن تصدق هذا إلا بعدما تدهور حالتها وتعرضها على طبيب نفسي ليخبرك ببساطة "المدام محتاجة تغير جو".
أو تقع صريعة للمرض الجسدي وكل من يكشف عليها يخبرك" حالتها النفسية سيئة وهذا يؤثر بالسلب على صحتها"
وقد تموت كمدا أو قهرا أو حسرة أو زهدا في الحياة...
فلا تبخل عليها بنزهة أسبوعية وخاصة إذا ما طلبتها منك
فمن يمتلك حيوانا يحرص على تمشيته يوميا .






الثلاثاء، 28 أكتوبر 2014

عمره ماحس بيا





وبعد زيارة قريبته لقى مراته متضايقة فحب يصالحها  فجابلها دبدوب صغير ب7 ونص.. هي بصت له باستهزاء ورمته على الكنبه وقالت له مش عايزة.
هو من وجهة نظره: أنا عملت اللي عليا وهي اللي نكدية.
وهي من وجهة نظرها: هو مفكرني عيلة صغيرة..

 ده بدل ما يجيبلي الخاتم اللي نفسي فيه من سنة وأكتر وخصوصا بعد ما شوفت قريبته لابسة واحد زيه النهاردة!

















الاثنين، 27 أكتوبر 2014

قولي ليه




ليه ماقلتش أنك بتحبني قدام العالم كله وأولهم أهلك.
ليه ماقلتلهمش مش هسيبها ولو آخر يوم في عمري.
ليه مادافعتش عني قدامهم .
ليه سمحت لهم يغلطوا فيا.
ليه سيبتهم يأثروا عليك وعلى حياتنا وياخدوك مني بكل بساطة.
ليه استسلمت ورضيت بأول عروسة جابوهالك.
ليه سيبتني أروح منك ببساطة كده.
ليه سيبتني أكون لغيرك وأنا روحي فيك أنت.

ياترى هما دلوقتي مرتاحين!
 نارهم بردت لما بعدنا عن بعض!






الأحد، 26 أكتوبر 2014

أصبحنا أسرة






وبإنجاب طفلتنا أكتملت صورة ارتباطنا، وأصبحنا أسرة لها حق المشاركة في المجاملات الإجتماعية دون أن ندع مجال للشك بأن زواجنا على المحك، أو بأنه مجرد علاقة قامت على الشهوة سريعا ما تزول.

السبت، 25 أكتوبر 2014

نصيحة (18)




- لو سابك علشان ياكل او خارج أو أي سبب تاني وأنتي في عز عتابك ليه
 اعرفى انه مابيحبكيش.. إزاي هيجيله نفس ياكل وهو سادد نفسك من يوم ما زعلك؟
 مكالمتك عنده وأنتي في الحالة دي المفروض تكون أهم  عنده من جوعه ومن خروجته ومن أى حاجة تانية..

أي حاجة في الدنيا ممكن تتأجل إلا لحظة العتاب والصلح لو بدأت بالفعل.

------------------------


- صدقي الراجل في أي حاجة يقولها عن نفسه_ وأنتي شايفاها مش حلوة _حتى لو قالك إنه كذاب.

---------------------------------


- لو عرفتي قيمتك عند كل حد في حياتك وقتها هتعرفي إزاي تتعاملي معاه.

--------------------------------


- ما تتمنيهوش ظابط ولا مهندس ولا دكتور..
 اتمنيه يكون ناجح فى شغله مهما كان.





الجمعة، 24 أكتوبر 2014

أول ما أنجبت






نعم هو وليدي ولكن فرحتي به كانت أقل من المتوقع .. مع طول فترة الحمل وإيداعه في الحضانة وعدم رؤيتي له توقعت أنى سأنبهر به فرحاً، ولكن العكس هو ما حدث فقد وجدته أصغر بكثير مما توقعته حتى لونه فاجئني، لكن فرحة الناس وهما جايين يباركولي ومنظر أخويا وهو شايله واحنا مروحين فرحني بجد..
 وجود اللى بتحبهم حواليك بيحلي أي موقف.

الخميس، 23 أكتوبر 2014

انجذاب لا إرادي






كبرادة الحديد كنت ألهو جوارك دون اكتراث، وكنت أجرب العبث معك؛ فوجدتني أنجذب إليك بطريقة لا إرادية، وإلى الآن كلما حاول أحدهم نزعي منك أجد نفسي أتشبث بك كما يتشبث الرضيع بخصلات شعر أمه؛ يعلم أنها ستستطيع نزعها من يده، ولكنه يمسكها بعزم ما فيه رافضاً أن يفرط فيما أصبح أخيراً بين يديه


.

الأربعاء، 22 أكتوبر 2014

ضحك البنات




ليهم حق بنات ثانوي وجامعة يقضوها ضحك وهزار بصوت عالي
ماهم مش شايلين للدنيا هم ولا لحقوا يشوفوا وش الدنيا الوحش..
 أنا كنت زيهم زمان وكان متهيألي أن عمر الضحك ماهيخلص وعمرماحد يقدر يسرق ابتسامتي وعلشان كده ببص لهم دلوقتي وبشفقعليهم من اللي لسه الدنيا مخبياه ليهم.






الثلاثاء، 21 أكتوبر 2014

حب جديد




كنت لي، ثم لم تعد.
أفلت قلبي من بين ثنايا روحك فهام عابثا حتى التقى غيرك
فأحكم قبضته عليه ومنعه من الفرار.
هذا الآخر فعل مالم تمتلك جراءة فعله
لقد أعلن حبه على الملأ وأقسم بأنه لن يتوارى عن إباحة دماء من يحاول مجرد محاولة أن يفتح نافذة لذاكرة هذا القلب المجروح، وأعرب عن تقديمه الغالي والنفيس مقابل أن ينبض هذا القلب باسمه.
لقد أصبح قلبي_أخيرا_ في قبضة قلب عاشق؛ فهنيئا له به.
ولا عزاء للكاذبين، المخادعين، الخائنين.













الاثنين، 20 أكتوبر 2014

مقتطفات نسائية (28)





- أسوأ كلمة ممكن تتقال من حد بتحبه
"ماهو كان بمزاجك"

-----------------------------

- اتفاق ضمني بينهما بأنهما قد ماتا رغم سكنهما تحت سقف واحد.

------------------------------



في عُرفه، الزوجة: خادمة مدفوعة الأجر مقدما.

------------------------------


عاوزة أسمع منك إنك رافضني.. أيوة حساها ومتأكدة منها ومش عايزاك تنفيها..
أنا بس عايزة أسمعها علشان يوم ما أضعف وأحن ليك أفكر نفسي بيها وماجيبلكش أعذار تاني.

-----------------

- المكان ده أكتر مكان حبيته وإديته من وقتي ومجهودي ومالي..
ومع ذلك كان هو برضه المكان الوحيد اللي أهاني و ماحترمش وجودي ولا قدر مجهودي..
وعلشان كده مايستاهلش أني أكون فيه أو حتى أنتمي إليه.

----------------

- تقابل الحمقى دوماً .. متى ستعطي ثقتها لمن يستحق!.

-----------------------------

- أود السؤال عن سبب غيابك فقط لأطمئن أنك بخير.

-----------------------

- ينزعج من تلاحق أسئلتي ولا يعلم بأنها دليل حبي واهتمامي .. ليته يفهم.

-----------------------

- إذا كانت نهاية العالم غداً لم لا تكون معي الآن.

-----------------------------------------

- كلامك ما عجبنيش والصيغة الرسمية اللي بتكلمني بيها خلتني ماردش عليك.

------------------

- كم أشعر بغبائك حينما تستخدم بعض الحيل التي لقنتها لك زمان حتى تستطيع مصالحتي وكأنى كنت أعطيك حلولاً لترضيتي ولم تكن تستخدمها وقتها .. جاي تستخدمها دلوقتي بعد ما خلاص بقيت مستنية أشوف طريقتك أنت في ترضيتي..

----------------------

ولقيت رسايلنا لبعض أوف لاين أحلى كتير من رسايلنا أون لاين.. لما بنكون أون لاين مابنلاقيش كلام نقوله لكن في الأوف لاين بنرد على رسايل بعض بكل اهتمام..
عرفت بقى أنا ليه مابقتش أكون موجودة في الوقت اللي أنت بتفتح فيه.

--------------

- أدركت الآن أنه ليس نصيبي ورغم عدم اقتناعي التام به إلا أنه كان عامل لحياتي
 حياة والآن عودة للفراغ من جديد.

--------------

- أعلم إنك ستعود ولكنك لا تعلم بإنك ستعود بعد فوات الآوان.

------------------------

- بقى بعد ما خرجتك من الحالة النفسية السيئة اللي كنت فيها وكنت معاك في كل ظروفك وسمعتك ووقفت جنبك وساعدتك على اجتياز المحن اللي مريت بيها تروح في الآخر وتخطب واحدة غيري!! هو أنا كنت بظبطك علشان تروح لها هي على الجاهز!!..
 أنت من حقي أنا مش من حق حد تاني.

--------------

- أخذت وقت طويل أوى على ما استوعبت وفهمت فكرة إنك ماحبتنيش.






الأحد، 19 أكتوبر 2014

اكتئاب




- لم يعد لدي القدرة على الرد؛

فمن يراسلني عليه أن يعلم بأنني سأستقبل رسالته فقط،

ومن يهاديني عليه أن يعلم بأنني قد أشكره عليها فقط،

ومن يتحدث إليَّ سأستمع إليه فقط.


وحتى هذا الـ "فقط" قد لايحدث فاعذروني.

-----------------------


- الأيام كلها شبه بعض.. هتفرق في إيه لو نمت أو قمت أو حتى مُت.. كله سواء محدش هيحس بغيابي لإن وجودي مش مهم لحد.. لا عندي وظيفة أصحى علشانها،
 ولا عندى حياة زوجية أعيشعلشانها .. عادي بقى.

---------------------------


- من أسوأ المواقف
حينما تغلق موبايلك حتى إذا ما اتصل أحدهم يفاجأ بالرسالة الصوتية
ثم تفتحه بعد يومان لتكتشف بأن لا أحد اتصل.
إذن لم يشعر أحداً بأن موبايلك كان مغلقاً سواك.

--------------------------------



- دلوقتي بس عرفت ليه المفروض الواحدة ماتمشيش مع حد قبل الزواج
علشان مايحصلش مقارنة بينه وبين زوجها المستقبلي
خليها كده على عماها علشان  ترضى بنصيبها وتفكر أن كل الرجال كده.

------------------------------

ماذا إذا أعلنت الآن عن رغبتي في قضاء يوم ترفيهي مع أحدهم
شرط أن يكون اليوم صاخب بما تحويه الكلمة من معنى
من سيتقدم لمثل هذا العرض الرائع في رفقتي لمدة يوم
سيبدأ اليوم من العاشرة صباحاً..
نعم ليس السابعة أو التاسعة فهي ليست رحلة مدرسية ولو أنى لا أمانع مطلقاً أن ننطلق بوسيلة المواصلات أي كان نوعها في الساعة السابعة المهم أن تبدأ النزهة قبل الظهر
من سيقترح أكثر بروجرام صاخب سيكون هو الفائز.