الاثنين، 29 ديسمبر، 2014

نصيحة (21)






لازم تتعلمي تحرجي الناس عادي
اشمعنى هما بيقتحموا خصوصياتك وانبوكساتك عادي


-------------------

نصيحة للأزواج: لما تحصل في حياتكم مصيبة بلاش كل واحد يرمي الغلط على التاني
فكروا في ازاي تحلوها واتعلموا من الدرس المستفاد.

------------------------

اعمل فولدر للحاجات اللي الفريندز عندك بيعتهالك
ومن وقت للتاني اتفرج عليها وانبسط
هدايا الفيس بوك حلوة على فكرة وتترك أثرا جميلا لا ينسى.

-----------------------


قبل ما تطبخي خدي نية "إطعام الطعام"
قبل ما تلمي لعب الأطفال من ع الأرض وخصوصا المكعبات خدي نية
"إماطة الأذى عن الطريق".

 ----------------------

لما تشوف تراب على زجاج البوفيه
ماتلومهاش
هات قماشة التنضيف وامسحه

 ----------------------------

لما يكون عند حد مصيبة وأنت المفروض بتواسيه بلاش أنانية
بلاش تتكلم عن نفسك وحياتك ومشاكلك وكأن الكون كله المفروض يدور حواليك
احترم الحزن اللي خلاك تتجمع بيه
وقدر وجعه
ويا تطبطب عليه بكلامك 
يا تسكت.

------------------------


قبل ما تقرري الانجاب إسألي نفسك
- إيه أكتر الحاجات اللي هعلمهاله؟
- هربيه على ايه وإزاي؟
ربي نفسك الأول واستعدي نفسيا لمواجهة هذا الكائن الصغير الذي سيصبح نتاجك لهذا العالم وعملك الذي ستُسألين عنه
.

----------------------

سحقاً لكل أم تخطب لابنها سريعا بعد فشلة في ارتباط ما (حب، خطوبة، زواج)

وسحقاً لكل من يتعامل مع الأنثى كبلاستر طبي يطيب جرحه.

نصيحة: لو اتقدملك حد كان مرتبط قبل كده.. إبقي اعرفي هو أنهى العلاقة إمتى ..
 ولو كان من قريب إبعدي وماتوافقيش حتى لو كان عريس لقطة مايترفضتش.
أنتي عنده مش أكتر حاجة من اتنين :
 يا إما حاجة بيغيظها بيكي .. يا إما دواء مسكن لمرارة التجربة..
إوعي تقبلي على نفسك تكوني كده.






هناك تعليقان (2):

  1. قبل ما تطبخي خدي نية "إطعام الطعام"
    قبل ما تلمي لعب الأطفال من ع الأرض وخصوصا المكعبات خدي نية
    "إماطة الأذى عن الطريق".

    عجبتني العبارة دي أوي :)

    ردحذف