يعني إيه حب

سألتني صغيرتي يعني إيه حب يا ماما؟.
فأجبتها:
- يعني أبقى أكتر حاجة بكره أعملها هي أني أقف في المطبخ ومع ذلك أحضر الأكل ليكي ولبابا وأنا مبسوطة.
- يعني بابا يحضر معايا ندوات أدبية وهو مالوش فيها علشان يكون معايا ومايزعلنيش.
-يعني أصحى علشانك من بدري علشان تروحي المدرسة و أنا مبسوطة أني شايفاكي جاهزة وزي القمر.
- يعني أفضي نفسي دايماً علشانك وأجاوب على أسئلتك اللي ما بتخلصش وأروح الملاهي رغم أني مش هتمرجح.
-يعني نستنى شهر رمضان رغم الجوع والعطش علشان نعبد ربنا أكتر.
الحب قوة يا روح ماما.
هو اللي بيخلي للحياة معنى.