شوفتها فى زيارة خيرية لأطفال مرضى الأورام كانت جاية تعمل خير وكان عندها استعداد تغنى
لهم.. لأول وهلة شكيت لما بصيت لعينيها ولقيتهم بيتحركوا كتير ومش بيقفوا على اتجاه ثابت..
ولقيت صاحبتى بتعرفنا على بعض عادي سلمت عليها واتأكدت انها كفيفة
قالت لي انها بتدرس لغة عربية وكانت مستمتعة بالزيارة جداً
صاحبتى قالت لها أني كاتبة وقعدت تشكر في كتاباتي
فلقيتها بتقولي أنها عايزة تقرأ كتابي !!
قلت لها على مكان المكتبة وعنوانها وطلبت منها تعرفني رأيها فيه لما تقرأه..
شوية ومشيوا مع بعض بعد ماهزرنا كتير واتكلمنا عن الفيس بوك واليوتيوب والجمعيات الخيرية
ودكاترة الجامعة حتى الكلام اللى بيتقال قدامي عادة وأنا مش ببقى فاهمة معناه لقيتها
هي بتقولي معناه عادي وبتضحك.
هي مشت وجوايا ألف سؤال وسؤال
أنتي إزاي كده!
إزاي راضية عن حياتك وعارفة تستمعي بيها وعندك قدرة كمان على العطاء
وعلى الأعمال الخيرية
وإزاى ممكن تقرأي كتابي أصلاَ أو أي كتاب تاني
مش كفاية دراستك الصعبة للغة العربية
صغرتيني قدام نفسي أوي يا شيرين وكبرتي في عيني أوي
ربنا يكرمك ويراضيكي ويرزقك بفرحة دائمة
ليست هناك تعليقات:
إرسال تعليق