كتب الدراسة

أنها تلك اللحظة الحاسمة التي تقرر فيها أن تقوم بحملة تنضيف

فتلاقي كتب الجامعة قدامك وتبقى مكرر من جواك أنك خلاص 

بقى 

هترميهم هو أنا يعني هعمل بيهم إيه.

وبعدين تشوفهم وتفر فيهم فتفتكر قد إيه كانت الدراسة 

ممتعة

وتلاقي عندك أكتر الكتب علم نفس،

وكتب تانية عن المهارات اليدوية

 وتبقي في حيرة لو مش هترميهم..

 طيب أحطهم فين وأنت عايز تفضي مكان!

ده غير أنك متأكد أن لحظة الحنين مش هتتكرر تاني

 وأنك عمرك ماهتفتحهم!.

ومن خلال فحصي لكتب الجامعة اكتشفت أن:

- غالبية الدكاترة كانوا بيستعبطوا.

- حشو كلام كتير ع الفاضي.

- الكلام معناه واحد وبيحوروا عليه.

- الكتب كبيرة بزيادة وربعها أسماء المراجع أو نصها ملغي.

-عمر ما جه في دماغي وأنا بشتغل أني أطلع على أي كتاب فيهم .

- كتاب الموسيقى هو نفسه على مدار الأربع سنين.. وكل سنة بسعر جديد.

- أنا كنت بشتري كل الكتب وبحضر كل المحاضرات وبكتب ورا الدكتور

 ومع ذلك في حاجات كتير مش فاكرة منها ولا كلمة.

- المواد بتاعة كلية طب حلوة.

- المواد الخاصة بالمهارات الفنية حلوة لكن كتب العملي كانت طبعتها رديئة جداً.

- معظم الكتب طباعتها رديئة وغلافها غبي.

- مش فاكرة ولا شكل دكتور واحد من اللي قرأت أسمائهم على الكتب عدا 5 بالكتير.

- في أسماء دكاترة كتير كنت حاسة أني بقرأهم لأول مرة.

- النحو كان بسيط وجميل مش زي ما كنا متعقدين منه وقتها.

- في كتاب لغة عربية كله أشعار مش فاكرة أنه مر عليا أصلا!

-قررت أقول لولادي مايكتبوش ورا الدكتور وركزوا في اللي بيقوله أحسن.

-اكتشفت أني أصلا دخلت القسم ده علشان ولادي وتقريبا كنت محتفظة بالكتب برضه 

علشان أبقى أستعين بيها وقت اللزوم وبما أني كده خلاص قربنا على 10 سنين

من وقت التخرج ومفيش ولاد يبقى نفضي مكانهم 

ولما الولاد ييجو أنا هعرف أربيهم من غير كتب .

- عمري ما كنت أتخيل وأنا لسه في الجامعة أن الوقت هيعدي بسرعة كده

وألاقي نفسي محتاسة في الكتب ومش عارفة أعمل بيهم ايه.

وهنا سؤال لابد منه للسادة اللي اتخرجوا من فترة: أنتوا عملتوا إيه في كتب الجامعة ؟

سعادة فك القيد

 فراشة طايرة في الهوا، شايفة أن الكون اتخلق علشانها،

حياتها بين الخُضرا والهوا وطيور السما، 

خروجها من شرنقتها خلاها ماعدتش خايفة من حاجة 

حتى لو هتقرب من اللهب اللي فيه موتها.

ماتعذبش نفسك

تخيل كده حد ماتعرفوش،

وفجأة قالك أنه بيحبك ومعجب بيك من زمان.

هتبتسم أكيد وهتتفاجئ شوية وهتشكره على مشاعره

 وخلاص على كده.. 

تخيل بعد كده لو فسر ابتسامتك وكلامك معاه بذوق لموافقتك 

المبدأية لاستقبال الحب ده، وبدأ يحاوطك، ويحاصرك، ويراقبك

، ويتواصل معاك، ويأكد عليك أنه بيحبك في كل مرة يتكلم فيها 

معاك.عيش اللحظة كده..

أنت متخيل يعني إيه حد ماتعرفوش بيعرض عليك حبه!

متخيل أن مفيش في أيدك حاجة تقدمها غير أنك تفضل تتعامل

 بذوق معاه وبس.
.
متخيل أنه ممكن يفسر أي كلمة عابرة منك أي تفسير يرضيه

بغض النظر عن نيتك الحقيقية فيها.

أهو ده حال اللي بيحب من طرف واحد..

أنت عارف قلب وبتحبه ومتعلق بيه، والقلب ده مايعرفكش..

القلب ده مايعرفكش..

القلب ده مايعرفكش..

وعلشان كده عمره ما هيحس بيك. ولا حتى هيحس بوجع شوقك له.

وآديك المفاجأة كمان..

أنك لو فكرت تبعد عنه في يوم اعتقادا منك أنك كده هتوحشه فيقوم يسأل عليك ..

ده مش هيحصل لسبب بسيط لأن بُعدك عنه بالنسبة له هيريحه.

ملحوظة: شايف صورة التدوينة؟

 أهو أنت اللي عمال تزن في ودنه لكنه مش شايفك ..

 أنت مش في مرمى بصره أصلاً.

عني (15)

لن أخبره بكوني كاتبة، وسأطلب منه أن ينشئ لي حسابات

 على مواقع التواصل الاجتماعي المتعددة.

لن أخبره بكوني قارئة، وسأطلب منه تشفير كل القنوات الثقافية 

والإخبارية.

سأظهر له بأنني مجرد أنثى عابثة وربة منزل محترفة.

سأقنعه بأنني ليست أنا.

ماتستغربش

عن لما حد يتكلم معاك عن نفسه وعن مشكلة بيتعرض لها وفي

 الآخر أنت تقوله كلمتين، من جواك عارف أنهم مش هيعمله حاجة 

فيقوم هو في الآخر يشكرك، وأنت مابتبقاش عارف هو بيشكرك 

على إيه! أنت ماديتلوش حل قطعي ولا حتى وعدته بحاجة في

 إيدك ممكن تعملها له وبتبقى مستغرب

 هو ممتن ليك أوي كده ليه!

عارف هو شكرك ليه؟

لأنه مكنش محتاج في اللحظة دي أكتر من أنه يتكلم ويلاقي حد 

يسمعه، ومايهمش من كلامه ولا يستهتر بمشاعره ..

وأنت بالنسبة له قمت بالدور ده على أكمل وجه.

نصيحة 19

1- لما حد يقولك أنه واطي صدقه

ماتعملش فيها فقيق وعالم ببواطن الأمور

 هو أدرى الناس بحقيقة نفسه.

---------------------------------------------------

2-  حتى لو معندكش حاجة ممكن تقدمها للي طلب منك مشورة برضه رد عليه

 وقله معرفش.

--------------------------------------------------

3- 

عن لما تبقى عيل صغير أو حتى حد كبير وتقابلك مشكلة أنت 

ماعملتش فيها حاجة غلط فجري تروح لأبوك أو لأمك علشان مش

 بس يتصرفوا لكن علشان يفهموك اللي حصلك ده حصل ليه.

لأن من جواك عارف بما أنهم كانوا السبب في وجودك للحياة يبقى

 أكيد عارفين كل الحاجات اللي ممكن تقابلك.

وأوقات كتير هتتساءل بينك وبين نفسك أو حتى قدامهم

 
أنتوا كنتوا عايزين تخلفوني أوي كده ليه طالما مش ضامنين أن

 الحياة هتكون بالنسبة لي وردي!

وقتها ممكن حد حكيم فيهم يقولك:

" معلش يا ابني أنا كنت أناني ومافكرتش غير في أن يكون لي ولد

 أتباهى بيه بقدرتي على الانجاب "

وممكن حد تاني يقول"

 علشان دي سنة الحياة ولازم الارض تعمر وبلا بلا بلا"

الأكيد في الليلة دي أنك خلاص جيت الدنيا وبقيت قدام الأمر الواقع 

ومفيش حد منهم أو من غيرهم هيقدر يديك مبررات لأقدار الحياة

من الآخر يعني

أنت اتدبست يا معلم.. واجه الحياة بمفردك..

 محدش هينفعك غير نفسك.

----------------------------------------------------

4- لما تكوني لابسة جوانتي في الشتا ماينفعش تكسري بيض.

---------------------------------------------

5- مشكلته/ ها أنه/ها طول الوقت بتعمل إسقاط 

على حياة الكاتب/ة فالنتيجة أنها مابتبقاش فاهمة..

نصيحة خد/ي الكلام زي ما هو ..

يا يعجبك ويلمس حاجة جواك/ي يا لأ.

حياة الكاتب/ة بقى وظروفه وجواباته مش مجال للحوار والشرح 

والتبرير.

ومضات

نزوة


رصاصة عابرة خدشت القلب، ولم تستقر فيه.


--------------------------------


تبطر


شعرت بالدفء فتدثرت بالعراء.


---------------------------------

صياد

أضاق عيناه؛ فلمحت مكرهما.

---------------------

ظن خطأ

ظنت أنه الأبدية، وجدته شر البرية.

-------------------------------------

نسيان

ومن سميته حبيب العمر، أصبح في طي النسيان.