فجوة موجعة

 يااه يا بابا ده بدل ماتحاول تقرب مني وتتكلم معايا بعد الفجوة الكبيرة اللي بينا..

 جاي تزعق لي علشان لقيت محفظتك فاضية.. طيب وأنا مالي.. مش ابنك اللى يا ما دلعته أكتر مننا كلنا هو اللي فضاها.. مش ده اللي دخلته مدارس خاصة وكنت بتديله مصروف يومي من وهو في حضانة في الوقت اللي أنا واخواتي كانت مدارسنا حكومة ومعرفناش يعني إيه مصروف غير لما دخلنا الجامعة ..

مش ده اللي كنت بتديله دروس بمبلغ وقدره حتى وهو في الجامعة ..

 مش ده اللي لما كان بيسهر بره البيت وهو لسه في ثانوي ومايجيش غير قرب الفجر وكنت أنا أزعق له على تأخيره تزعقلي أنا وتقف في صفه..

مش ده اللي لما عرفت أنه بيشرب سجاير وحشيش ماعملتش حاجة غير السكوت..

 جاي تزعق لي أنه خد منك فلوس امبارح رغم أني قايلالك أنه خدها علشان يجيب لي بيها حاجات محتاجاها..

 كأنك بتقولي مش من حقك تاخدى مني فلوس ..

 جاي دلوقتى تقول أنك ماعدتش معاك فلوس..

 طيب وماقلتهاش ليه من الأول؟؟

 على الأقل ده شيء أنا متعودة عليه من صغري أن أي حاجة كنت بطلبها منك فين وفين على ماتيجي ده لو جت ..

على الأقل أنا دلوقتى كبيرة وهفهم أنك معكش فلوس..

عموماً شكراً.