احتياجاتي معك

- محتاجة أحس معاك بالأمان اللي يخليني أكلمك براحتي

 وأنا عارفة أن عمرك ما هتقول كلامي معاك لأي حد

ولو على سبيل الفضفضة ومهما كانت علاقتك بيه.

- محتاجة أحس بالأمان اللي يخليني أعطيك صوري وأي هدايا تذكارية

 وأنا متأكده إن محدش هيشوفها غيرك.

- محتاجة أحس إنك ملكي أنا لوحدي

وإن مش مسموح لأية واحدة غيري إنها تتدلع عليك وتتكلم معاك بعشم مبالغ فيه.

- محتاجة أحس إن أي وقت عندك أنا أولى بيه.

- محتاجة ما يكونش  في حياتك أصلاً بنات غيري ولو على سبيل الصداقة البريئة.

- محتاجة أحس إن علاقتنا كالصندوق المغلق ولن يستطيع أحد أن يرى محتوياته لإن مفتاح الصندوق معي أنا وأنت فقط.

- محتاجة تكون لي صديق وسند أفضفض له وأنا عارفة إنه هيكون عنده حلول لأي مشكلة بتواجهني مهما كانت بعيدة عن اهتمامته وميوله.

- محتاجة أحس معزتي عندك بالأفعال.

- محتاجة أحس أننا واحد وأن محدش فينا فعلا يقدر يعيش من غير التاني.

- محتاجة أتأكد أنك نصي التاني .

مقارنة

العشيق: نزوة.. رغبة مؤقتة في المرافقة ستزول سريعاً بانتهاء الموقف.

الحبيب: يتربع على عرش القلب بلا منازع.

العشيق: مش مهم تعرفي عنه حاجة، المهم أنه يكون معاكِ.

الحبيب: المهم تعرفي عنه كل حاجة وتطمني عليه حتى لو مش هيكون معاكِ.

العشيق: تعلمين بأنك لست الوحيدة في حياته.

الحبيب: لا تقبلين إلا أن تكوني الوحيدة في حياته.

العشيق : تندمين على فعلك الشهواني معه.

الحبيب: لا تندمين على حبك له.

العشيق: تدعى عليه عادي لو في لحظة أهانك أو بعد عنك.

الحبيب : تدعي له دايما مهما بعد عنك أو ماحسش مشاعرك.

عتاب صارخ

طيب أنا مابكلمكش علشان زعلانة منك.

أنت بقى مابتكلمنيش ليه!!؟.

-------------------

أنا كنت في حياتك إيه!

سؤالك اليومي عني كان إيه!

مهاتفتك لي باستمرار كان ليه!

خوفك عليا حين مرضي كان معناه إيه.

للدرجة دي كنت عندك ولا حاجة!!

 مجرد واحدة مرت في حياتك وخلاص ولما زهقت بعدت..

مين أداك حق تقرب مني وتبعد زي مايعجبك.

تقبل حد يعامل بنتك كده!! هيحصل ماتقلقش ماهو كما تدين تدان.

----------------------

- بكرهك لما تتعامل معايا كجسد وبس.

- بكرهك لما بتحسسني إني رخيصة وماليش قيمة عندك.

----------------------------------

- ليا حق أزعل منك .. ما أنت سايبني لوحدي.

من غيرك ببقى لوحدي حتى لو حواليا كتير.

من غيرك ببقى ضعيفة مهما كنت قوية وبعرف أتصرف في أي موقف

-----------------------------------

أيوة زواجك من غيري قتلني فإزاي تنتظر مني أرجعلك و دمائي

مازالت تخضب روحي..مستغرب ليه؟..

 ما أنا قلت لك قبل كده إن روحي فيك وأنت بإيدك طلعت روحي..

---------------------------------------

ماتقولش إنك ندمان أنا عمرى ماهرجعلك

المصيبة بالنسبة لي أنك مش راضي تعترف حتى بينك وبين نفسك أنك أنت اللي ضيعتني منك..

تعبت من عتابي ليك وأنا مليت من تجاهلك.

فيها إيه لو صالحتني وطيبت جراحي منك..إزاى معرفش.

 كنت فكر قبل ماتجرحني إزاي هتداويني ولا ده ماجاش في دماغك وقتها

أسهل حاجة تعملها أنك تسيبني وتمشي لما تشوفنى بتأوه من ضربك ليا.

عايزنى أنسى ..أوكى .. نسيني.

كل ما أرجع أحن ليك وأنسى ألاقيك تعمل حاجة تزعلني منك أكتر

وآخرها أنك مش حافظ رقمي بعد كل السنين دي

حتى طلباتي منك بتتجاهلها وكأنها مش ليك..

أنت شايف أننا كبرنا على شغل المراهقة اللي أنا معيشة نفسي فيه

 وأنا شايفة أن عمري وقف عند السن ده ..

 من حقي أحس بحبك واهتمامك اللي أنت بتقول عليهم واللي أنا مش شايفاهم..

أنا مش شايفة غير جرحك.

وريني بقى حاجة تانية تخليني أنسى

أنا مش هعيش ميت مرة..

أنا عندي أحس بحبك حتى لو مش بعض ولا أحس ببعدك واحنا مع بعض.

نفسي أصدقك تاني لكن للأسف أنت مش مساعدني.

بترجع لما بتكون محتاج تسمع كلام معين وكأنى استبن في حياتك

أنا كمان تعبت.

----------------------------

زي ماضيعتني منك زمان دلوقتي ضيعت موبايلي

عايزنى أنسى وابعت لك رقمي

ده ليه؟

علشان تحس إني لسه باقية عليك

هو أنت كنت حسستني إنك باقى عليا سواء زمان أو دلوقتي!

--------------------------------------

- يعني إيه بتتكلم عنى مع  واحدة غريبة عنك؟ .. مين دي بقى ..

وبتحكى لها إيه ؟ وليه؟

أنت مدرك أنت بفضفضتك دي بتعمل إيه؟

يعني حواراتنا مع بعض هي عارفاها!!

يعني مشاعرك تجاهي هي عرفتها قبل ما أنا أعرفها

يعني  لو ناوي تفاجئني بأي حاجة بتبقى مرتب معاها الأول!

يعني في واحدة أنا معرفهاش أصلاً تعرف عني كل حاجة!!

-------------------------------------------

هو أنا ماوحشتكش!!

مفيش كلام عايز تقولهولي

لو أنا حسيت في وقت ما إنك بتحبني فصمتك معايا دلوقتي بينفي أي إحساس حسيته..

أكد حبك ليا بكلامك أو انفيه بابتعادك

لكن مجرد تحية يومية  ترسلها في رسالة إليكترونية لم تعد تعني لي شيئاً..

---------------------------------------

تعالى بقى هياخدوني منك..

بيقرب مني في الوقت اللي أنت بتبعد عني فيه.

عارف يعني إيه في الوقت اللي أنت بتبعد عني فيه؟

يعني في الوقت اللي ببقى فيه ضعيفة ومحتاجة حد يسندني ويقولي أنه جنبي ومعايا

تعالى بقى أنا مش عايزة غيرك يسندني

أماني بالانتقام

  

- أتذكرك كثيراً.. كيف لا وجرحك بي ما زال ينزف.

كم أتمنى أن أضع كم غضبي تجاهك في قبضة يدي وأنا أحمل مضرب البيسبول،

 وأهوى به على صدغك حتى أسمع هشيم عظم الجمجمة.

حقاً.. كم أنتظر لحظة مقابلتك بكل شوق ورغبة حقيقية في المواجهة.

------------------------------------------

- كم أتمنى أن أقرأ اسمك في صفحة الحوادث مُصاحبة لصورة

تشعر فيها بالخزي والعار.

- كم أتمنى أن تفضح على روؤس الخلائق.

كم أتمنى أن تبدلي حالتك الإجتماعية من متزوجة إلى مُطلقة.

أنا لست شريرة على الإطلاق أنا فقط أريد أن ينتقم الله لي ممن

آلموني يوماً وتسببوا في كسري ووجع قلبي دون أدنى شعوربالذنب..

 ممن تلذذوا بإيذائي النفسي والمعنوي.

ممن كان تفكيرى يوماً لأجل إسعادهم فقط.

ممن استنزفوني لآخر قطرة ولم تكفيهم.

رفقاً بانطباعتكم تجاهي قليلاً؛ فأنا لم أفعل شيئاً يؤذيهم..

 أنا فقط تمنيت.

تصحيح معاني

اعترافي بحبك لم يكن ضعفاً؛ بل كان رغبة قوية فى الحياة.

وهزيمتي في عشقك لم تكن كسراً؛ بل كانت صاعقة جديدة أواجه بها الحياة.

و وجع قلبى فى بُعدك لم يكن ألماً؛ بل كان نزيفاً لوليد يجهض.

 و دموع روحي في هجرك لم تكن مسكنات؛ بل كانت طعنات لقلب يوئد.

و آهات جسدي من قسوتك لم تكن همسات؛ بل كانت صرخات لقلبك المستبد.

رغبة مشروعة

- أريد أن أستنشق عطري في أنفاسك.

- أريد أن أقرأني بين سطورك.

- أريد أن اسمع كلماتي على لسانك.

- أريد أن أراني بعيونك.

أريدك أن تكتبني بقلبك .. أريدك أن ترسمني بعينك.. أريدك أن تقرأني بقلمك.

فهل تحقق لي رغبتي ؟..

 هل ستكتب عني يوماً وأنا مازلت على قيد الحياة أم أنك ستنتظر وفاتي حتى ترثيني بكلمات لن أعلم عنها شيئاً.

عن الزواج

ليتنى أعلم متى سأموت

فلو كنت سأموت في سن صغيرة فلمَ الإنجاب وتكاليف الزواج الباهظة التي قد يعجز شريك حياتي عليها

فلنتزوج إذن وأستمتع بما تبقى من عمري معه دون أية منغصات دنيوية.

-----------------------------

- طقوس الزفاف الرتيبة ما الممتع فيها !!

سيناريو متكرر وتم حفظه جيداً للأجيال القادمة .

--------------------

عارف يعنى إيه أتزوجك؟

يعنى أوافق أقضي معظم وقتي في المطبخ لتجهيز الوجبات والحلويات يومياً وأنا أكره المطبخ بما يحتويه.

يعنى أوافق أكون مسئولة عن أطفالك مسئولية كاملة وأنا شديدة الملل من طلبات الصغار.

يعنى أرضى إن حياتي تبقى أنت والبيت والأطفال وبس وأنا اللي ليا حياة مستقلة مليئة بأشياء تبهجني .

يا ترى أنت بقى يعنى إيه تتزوجني ؟.

 ----------------------

- تريدنى كامرأة تشاركك الفراش وليس كامرأة تشاركك قسيمة الزواج.