ملكية خاصة

قسيمة الزواج تعني عقد ملكية الطرفين لكلاهما..

 فغيرة الزوجة مثلاً ليست بالضرورة تدل على حبها للزوج

 هي فقط لا تريد أن يقترب أحد من ممتلكاتها.

مقتطفات (2) من خبايا نسائية

عمري ما هتزوج بعده.. ده كان كل دنيتي وكان كل حياتي.

أيوة عشت معاه فترة صغيرة بس فيهم حسسني أني ملكة حياته

 وأميرة ذكرياته وبرنسيسة قلبه ونور عينه وروح قلبه..

 إزاي أتزوج غيره!!.

بتقولوا أني لسه شابة وصغيرة والعمر قدامي

 وهو تركني أرملة بلا أطفال..

 لكن مين قال إن العمر بيتقاس بالسنين..

أنا عمري ابتدى معاه وهينتهي يوم ما أنساه.

ذكرياته الحلوة معايا هتكفينى الباقي من عمري.

مين قال أنه مات وسابني .. دى روحه معايا بتطمني.

لن أترك شقتي ولن أخلع دبلتي فزوجي يعيش الآن بداخلي.

لن أعيش في ملابس الحداد كما تعتقدون فبعد الفترة الشرعية

 سأقوم بارتداء ملابسي ذات الألوان الزاهية وسأعود لممارسة 

حياتي بشكل طبيعي..

اطمنوا لن أحزن الحزن الذي يجعل الكل يشفق لحالي ولكني

 سأحزن الحزن الذي يجعل الكل يترحم عليه.

رحمك الله يا زوجي الغالي.




بقلم :منى ياسين (موناليزا)
من كتاب "خبايا نسائية" حالياً بالأسواق

مقتطفات(1) من خبايا نسائية

كان أجمل يوم في حياتي يوم ما رجعت من السفر ولقيتك 

بتستقبلني في المطار..

كانت عينيا بتدور عليك وأنا بسلم عليهم..

واللي يقولي حمدالله على السلامة أرد وأقوله "محمد فين؟"..

ولما بصيت لقيتك واقف بعيد..

 ماهمنيش الناس والزحمة وجريت عليك لقيتك فاتح لي دراعك 

وشيلتنى ولفيت بيا.. وكان ولا أجمل مشهد رومانسى ممكن 

أشوفه في أي فيلم وخصوصاً لما يكون بين أخت وأخوها

 مش بين حبيب وحبيبته.

لـ منى ياسين(موناليزا) خبايا نسائية.

من كتاب أبجدية إبداع عفوي حالياً بالأسواق.

عني (1)

- أنا أحب "خبايا نسائية" لأني أغزلها بأحاسيس صادقة ومشاعر 

متباينة ونبضات متأرجحة فينتج ثوباً نسائياً يراه الرجال بوضوح.

-بحس نفسي شجرة .

ولما تصميم غلاف كتابي لقيت فيه شجرة فرحت أوي.

- الكتابة النسائية رغم متعتي في ممارستها لكنها مُتعبة

 ومرهقة للروح جداً.

نصيحة (1)

إلى الغير مرتبطة عاطفياً :

 اجعلي عزائك بأن ليس لكِ حبيباً تشتاقين إليه وتتمنين الزواج منه

 ولكن الظروف تحول دون إتمام ذلك.

فالوحدة دون وجود شخص في محيط حياتك

 أهون بكثير من الوحدة الإجبارية حين يوجد شخص في حياتك.

خارج الكوكب(2)

ركبت تاكسي كالعادة 
ولكن على غير العادة.. كان السائق مختلف.
كان يضع هاند فري في أذنه ليسمع ما شاء دون أن يتسبب للراكب بأي إزعاج.. وده طبعاً مش العادي.. العادي انه بيبقى مشغل الكاسيت ع الآخر وأنا أطلب منه بذوق يوطيه فلما مايرضاش أصمم أنه يقفله خالص .

وصلني إلى المكان بالظبط ..في العادي التاكسي بيقف ع الناصية على اعتبار ان المكان اللي أنا عايزاه بيبعد خطوتين يعني ومش مسافة تخليهم يدخلوا الشارع وأنا  مابشوفش فيها مشكلة اني انزل واكمل الخطوتين دول لأن الشارع أصلا ضيق وبيبقى زحمة  لأي عربية تدخل.. هو بقى دخلني من غير ما أنا أطلب.

بديله الأجرة فهو بكل ذوق يقولي: خلي ..خلي والله.. 

الجدير بالذكر انه محصلش بينا أي حوار من أي نوع طول الطريق ولا حتى كان بيبص عليا في المرايا كعادة السواقين.
يعني موقفه ده ماكنش علشاني لكن كان نابع من شخصيته وتربيته.

طبعاً أخد أجرته وأنا نزلت .
 لكن موقفه معايا كان لازم يتسجل.

خارج الكوكب (1)

يوما ما أثناء زيارتي لأطفال مركز الأورام ..جلست مع طفل وأمه.. الطفل حالته كانت صعبة جداً و ورق التأمين اللي هيصرف لهم بيه الجرعة متأخر والدنيا عندهم متلخبطة أصلاً.. الأم في عز ده كله مصممة إني لازم آكل من عندهم حاجة.. واعتبرتني ضيفة ولازم تعمل معايا الواجب.. عزمت عليا بموز..وفتحت خزنة صغيرة جنبها علشان توريني أن عندها كتير، والطفل قالي طيب كلي زبادي .
ومواقف مين دي كتير.

أسروني بأخلاقهم رغم بساطة حالهم والموقف اللي هما فيه أصلاً.
واتعلمت أنه مش بالغنى ولا بالصحة ده بالرضا والأصل الطيب.