عن التسامح

عارف يعني إيه تسامح؟

يعني قلبك مايبقاش شايل فعلا من اللي آذوه.

يعني لو قابلت حد منهم صدفه تاخده بالحضن وتسلم عليه بشوق.

يعني ملامحك تنبسط لما تشوفهم صدفة.

يعني لو حد فيهم أعتذرلك تكمل ابتسام وتقول مش فاكر تقصد إيه لأن فعلا اللي عمله 

معاك ماعدتش بيوجعك لدرجة تخليك تفتكر.

وعلشان كده مش كل الناس تقدر تسامح؛ممكن تبطل تتكلم بدافع القهر أو أن الزمن بيلهي

  وينسي لكن من جواها لسه شايلة ومعبية ع الآخر.

التسامح: مش كل الناس تقدر عليه.

قلة أصل

شافوها وهي بتقع.. غرهم سكوتها ودموعها المحبوسة .. سابوها ومشوا..

جم بعدين.. لقوها خرجت من الحفرة وبقت تقدر تقف على رجلها من غير عكاكيز..

هنا بس حبوا يسندوها.

نصيحة (20)

أهم حاجة وأنتي بتاكلي ماتوقعيش حاجة ع الأرض وخصوصا الفرافيت

أنا عارفة أن الموضوع مابيبقاش مقصود بس حاولي تاخدي بالك

لأنك اللي هتدبسي في التنضيف في الآخر.

-----------------------------

حقك يا ستي تسمي ولادك أسماء جديدة

لكن ياريت تخلي الاسم المختار يبين نوع المولود

------------------------------------

 ماينفعش تستعيضي عن الملح بالبهارات

الملح أساسي

عن اللفتات

فرق كبير بين أنك تحب حد وأنك تعمل معاه الواجب
على سبيل المثال
إذا مرضت الزوجة وآتى لها زوجها بالطبيب المعالج وبالأدوية المكتوبة 
هنا من وجهة نظر الزوج لولا حبي لها ما فعلت
ولكن الحقيقة هي أن فعلك هذا واجب عليك وإن لم تفعله لن يدل على قلة حبك لها ولكن سيدل على قلة أصلك
في هذا الموقف ما يظهر الحب حقا كلماتك معها كـ " البيت مالوش طعم من غيرك، وحشتيني، أنا من غيرك ولا حاجة، مش عارفة أعمل حاجة من غيرك، قومي بقى علشاني، لو عايزة تعرفي غلاوتك عندي فأنتي غالية فعلا... وغيرها من العبارات التي تعبر عن صدق مشاعرك مما تنعكس بدورها على الزوجة فتتحسن حالتها النفسية ومن ثم تقاوم ما بها بضراوة لتقوم مجددا وهي في كامل صحتها وحيويتها
أرأيت عزيزي الزوج.. هذه الكلمات هي من عجلت بالشفاء وليس الطبيب والأدوية.

مثال آخر: تجلب الحلوى والفواكه دائما على اعتبار أن هذا دليل على حبك لزوجتك
وفي الواقع سأفاجئك بأن هذا أيضا واجب عليك أن تبتاع متطلبات المنزل الذي سيأكل منه أفراد المنزل عامة
الحب هنا يتمثل في شراءك لها ما تحبه هي والذي بحكم معرفتك بها تعلمه جيدا حتى وإن بدا تافها بالمقارنة بما اشتريته من أشياء غالية الثمن..
قد تكون الزوجة تحب مثلا" الذرة المشوي وعندها أفضل من التفاح الأمريكاني وفرحتها به ستفوق بمراحل فرحتها بأي شيء آخر 
كيسرية في فيلم أحلى الأوقات كانت تريد مجرد ورد وليس كيلو كباب

-------------------
- بتحب أبوك؟
- أكيد.
- طيب بتعمل إيه علشان أبوك يعرف أنك بتحبه؟
فكرت في مرة تقولهاله
فكرت في مرة تعمل حاجة تبين له فيها أنك بجد بتحبه
ولو حتى برسالة موبايل
جربت تشوف ايه التفاصيل اللي هو بيحبها وتعملها
جرب كده ومش هتندم

-----------------------

بتحبي بنتك؟
- أكيد.
بتدعميها دايما.. أنتي ليها أداة بناء مش هدم.. بتعلميها كل حاجة علشان تبقى أحسن وأفضل
بتهتمي بتفاصيلها.. مستوعبة بأنها غيرك.. بتشتريلها الحاجات اللي هي بتحبها حتى لو مش عجباكي.. بتدافعي عنها قدام الناس حتى لو كانت غلطانة ..محسساها أنها رقم واحد عندك بالأفعال مش بس بالكلام.


اللفتات الصغيرة هي من تترك أثرا كبيرا في النفوس .

مقتطفات نسائية (34)

حينما وجدتك غاضب حاولت أن أستوعبك بابتسامة، مع سماع كلامك مهما بدى قاسياً

ولو كنت أعلم أن هذا الغضب بسبب وجودي في حياتك ما كنت يوما اقتربت؛

ليس رفقة بثورتك حينما تغضب، ولكن رأفة لذاتي حينما تعشق.

-----------

كلامك لي محفوظ؛ قلته لألف قبلي وهتقوله لألف بعدي وبتقولهولي في كل مرة بنفس التفاصيل

تزعم إنك كده صادق وإلا كنت غيرت كلامك

وأنا شايفة إنك بتداري عيب النسيان بحفظ شيء مكرر.

-----------------------

الغريب أن أقضى ليلتي معك في استمتاع وأحلم بيه هو وأنا سعيدة إنه أخيراً اهتم بيا ورجع يضحك لي في أحلامي تاني.

--------------------

من يوم ما عرفتك وأنا بحضن نفسي كتير.

-------------------------

الغريب أني معاك خنت نفسي وخنت ربي وخنت أهلي ومارضيتش أخونك أنت.

خنت أغلى الحاجات في حياتي وماخنتشكش أنت رغم أنك عندي ولا حاجة

خليت شيطاني يغلبني وده عمري ماهسامحك عليه.

------------------

هحرق قلبي عله يتطهر من تدنيسك له.

--------------------

يعني أنت لما تطلقها وتتزوج عادي وهى لما تتزوج بعدك تبقى خاينة!!

-------------------

وعدتنى بشرفك إنك تصون العهد وأنا صدقتك

ونسيت إنك وعدتني بحاجة ماتملكهاش

---------------------

وأهو جه اليوم اللي تدور عليا فيه وماتلاقنيش

بعد ما ترجيتك يا ما ماتسيبنيش

ويا فرحة قلبى في بُعدك بعد ما عرف يعيش

وإنك كنت في حياتي حقيقي مفيش.

-------------------

عارف يعنى إيه زعلانة منك؟

يعنى كنت متعشمة فيك أوي

يعنى كنت معتقدة أني مهمة عندك وفارفة معاك.

-----------------

أيوة لازم أخس وأبقى أرفع منهم كلهم علشان يبطلوا يتريقوا عليا وعلشان ألبس أحسن منهم ميت مرة وعلشان كمان أتخطب قبلهم.

--------------

ليه رافض فكرة أني أحط نفسي في كفة عندك قصاد كفة شربك للسجاير وثرت واعتبرتها أنانية، وتسلط وكلام كتير أنا مش مستوعباه

 وفى نفس الوقت ألاقيك حاطط نفسك في كفة عندي قصاد أهلي وأنك بتمنعني أزورهم لإنك مش ناسي صعوبة أبويا معاك في فترة الخطوبة.

------------------

كنا كأننا مخطوبين أو على علاقة عاطفية لكنها مستترة وغير معلنة ولا حتى أمام أنفسنا.

----------------------------

لإنى متعودة أتصور لوحدي فاستغربت صورتنا سوا.. هى آه مش وحشة بس برضه مش حلوة أوي.. حساها ناقصها حاجة ..دبلة في إيدى ودبلة في إيدك مثلاً.. ذراعك تحاوط كتفي.. أنظر لعيونك وابتسم .. تضم كف يدي في يديك.. مش مجرد اتنين واقفين جنب بعض كده وخلاص.

--------------------------

- مين قال أن علشان قلت أني هقابل العريس أبقى وافقت عليه!!

 أنا هقابله بس علشان خاطر أمي ماتزعلش..

حساها نفسها تفرح بيا وتعيش لحظة أن فيه عريس جاي لبنتها

 وأنا مش هحرمها من ده حتى لو كنت مقررة مسبقاً إني رفضاه.

قلبي عملها

أخشى أن يتعرفوا عليك في أوراقي قبل أن يعترف قلبي بميلادك.

أخشى أن يدلهم قلمي عليك ومازال القلب يقاوم همساتك.

أخشى أن يلمحوا صورتك في لوحاتى قبل أن يسكن القلب في مساحتك.

فقلبى لا يريد الاستسلام وقلمي لا يجيد الكتمان.

صفات نادرة الوجود

بعدك يا رسول الله مفيش راجل يملى عيني

أصلي درست سُنتك، وعرفت سيرتك فلما بيتقدم لي حد بعقد مقارنة بينه وبينك.

فبلاقي مفيش وجه مقارنة أصلا..

وأقول هو أنا بس اللي قريت سيرتك وبحاول أطبقها ولا إيه!