يده

كانت تحب في الرجل خشونة يده، ولمسته القاسية.

 أما هو فكانت يداه ناعمة، مرنة، كأنها تخص فتاة مُدللة.

أمنية 14

عايزه حد يكتب فيا شعر ولما يشوفني يسمعهولي

عن عشقهن له

إيه السر في أن كل واحدة تقرب منك تبقى عايزة ترقص معاك!

-----

أراه مُلهم للكثيرات؛ فهو يقتحمهم بجرأة، ويتركهم في نشوة، ويستدرجهم لما يريد دون أن يطرف له جفن..

محترف هو، وغريرات هن.

-----

أرى ضحية أخرى تحوم في الأفق.

مواقف مخزية (2)

قررت تكون له زي فتيات الاعلانات
حاجة كده ملوكي تخليه يحس أنه شهريار زمانه
قال عليها منحلة وطلقها بعد ما طعن في شرفها وأخلاقها

------

لم يطلب منها كلمة السر الخاصة بحساباتها على الانترنت؛ ولكنها اكتشفت- عن طريق الصدفة- أنه يضع برنامج للتجسس على جهاز الكمبيوتر يمكنه من قراءة كل ما فعلته فور دخولها النت.

------

دخل غرفة المعيشة وجد زوجته تشاهد برنامج هبة قطب
فكان رده: أنتي قليلة الأدب
وانتبه قليلا فوجد أمه تتابع معها
فقال: أنتي عايزة تعلمي أمي قلة الأدب!-

--------

أسعد لحظات حياته وهو شايفها متبهدلة في المطبخ

 ---------

- وماله يا حبيبي أشيل الأكل واعمل أكل تاني أنا أهم حاجة عندي إنك تكون مبسوط.
لكن يا ترى إيه أهم حاجة عندك؟
أقولك أنا؟
أنك برضه تكون مبسوط
يا بختها نفسك بيك

مقتطفات نسائية 39

 الرجل هو البيت؛ وأنا عمر ما كان ليا بيت.

 أنا حتى مش فاكرة إذا كنت حبيتك فعلا ولا لأ!

-----

وفي عز كلامه معاها عنها
قام حبها

----

عنها لما لبست كعب عالي بزيادة وهي طالعة تقابل العريس فقام هو رافضها بحجة أنه مينفعش يتجوز واحدة أطول منه.

-----

ولما اتحطيت في موقفها ماعملتش اكتر من اللي هي عملته واللي كنت بلومها عليه زمان.

 -------

يا بنتي فوقي بقى
اللي أنتي شايفاه حاجة كبيرة ماحصلتش
هو شايفك حاجة قليلة أوي

---------

مازلت أفتقد حضنك الخيالي الذي طالما تمنيته ولم أحصل عليه مطلقا.

--------

وبعد الغيبة الطويلة دى

يا ترى كنت فين ومع مين

اتجوزت رقم كام لغاية دلؤتى ؟

-------------------

أنا عارفة إن مفيش فى إيدك حاجة تعملهالى وأنا ماطلبتش منك حاجة

بس بلاش تستكتر عليا أنى أبين زعلى بالتكشيرة والصمت

ماهو أنا ماليش نفس لا اضحك ولا أتكلم

فهاجى على نفسى فى دى كمان!

--------------------

توقعتك هتصالحنى بعد الغيبة دي مش جاي تتخانق معايا!

ابن قلبها

ومهما يحصل بينهم

أول ماتشوفه حزين

تبقى عايزة تاخده في حضنها وتقوله

ماتزعلش حقك عليا

ابن أمه

مايغركيش شكله الحلو وملامحه المظبوطة ع الشعرة،ولا مستقبله المشرق وأخلاقه 

المهذبة،ولا كلامه عن الدين وحبه لربنا.

البيه المحترم ابن أمه ومالوش كلمة ولا كرامة قدامها.

واصلالك الجملة دي؟

فاهمة معناه كويس؟

عارفة يعني ايه ابن أمه؟

يعني أمه ممشياه بريموت كنترول...

لو قالت له يوطي يربط جزمتك في الشارع؛ هيعملها.

ولو قالتله لو شوفتها بتموت ماتناولهاش بق ميه، برضه هيعملها.

هتتجوزي حماتك باختصار.

لو اتجوزتيه هتتبهدلي معاه أكتر ما هتتبهدلي مع سواق توكتوك متربي في الشوارع.