القاف والنون حروف مستفزة

يوماً ما تمنيت أن أكون مُحامية فلم يكن أقدر على جلب حقي بالقانون سواي.

نسيتك

عارف يعني إيه نسيتك؟.
يعني لما ترسل لي أغنية "نخبي ليه".
فاسمعها وأعيش معانيها و ألاقيني تلقائياً بدندن مع نفسي أغنية "بص بقى".

شيلني

- شيلني.
- هههههههههه حاضر.
- بتضحك ليه؟.
- أصلك فاجئتيني بطلبك.. طيب تحبي أشيلك ازاي؟.
- شيلني بوضعية أحس فيها أني بتاعتك أنت وبس.

كان اسمه أحمد

الجدير بالذكر إن لما حد بقى يسألني عنك .
بقيت أرد عفوياً : أحمد مين؟.

أراني تحررت منك.

الخلاصة

بعد نهاية أي علاقة هتقدري تحكمي هي كان نوعها إيه.

بذاءة

ينعتها بما ليس فيها ويسبها بأمها.
ماذا إذا ردت عليه السباب بأقذع منها وذكرت الست الوالدة بما لذ وطاب وسيكون معها حق فهي لم تحسن تربيته.
هل سيشعر بالراحة وقتذاك؟.
أم أن غروره صور له أنها ستستقبل وقاحته في صمت؟.

وضع مؤلم

مين قالك إنى هرضى بأي وضع تحطني فيه حتى لو من وجهة نظرك ده الأحسن ليا.. أنا راضية بيك أنت.. مش عايزاك تجيبلي شقة جديدة فى مكان جديد وافرشه على ذوقي وأبقى أنا ست البيت على قد ما عايزة أفضل في بيتي اللي اتعودت عليه واسكن مع غيري ويكون ليا فيك شريك بس ما تبعدتش عني.. أيوة كده أنت واثق في قدراتي على تربية عيالك لوحدي وعايزنى أفضل على ذمتك بس علشان كده.. مش حباً فيا.

*****************

أنتِ أذيتيني كتير وتعديتي عليا كتير لكني مع ذلك مقدرة غيرتك عليه ومسمحاكِ لكن ظلمه ليا علشانك عمري ما هسامحه عليه ما أنا برضه زوجته مثلك الفرق أني الثانية اللي جابها علشان تخلف له الولد بعد ما يأس أنك ممكن تخلفي ودلوقتي بعد ما بقيتي حامل جاي يخرجني من شقتي ويجيبك أنتي ويأجرلي شقة في مكان بعيد.