مخاوف

(1)

مانكرش أن مركزك الإجتماعي كويس، وأنك قدام الناس هتكون زوج يشرف؛ لكن ماذا عن حياتى أنا معك.. أنت عايزنى أكون مسئولة عن أطفالك الرضع.. في الوقت اللي مامتهم اتطلقت منك وعايشة حياتها عادي.. أبقى أنا لسه عروسة ومعايا طفلين مسئولة عنهم مسئولية كاملة ،أربي، وأأكل، وأغير، وأنضف، وأعلم، وأكبر وفي الآخر برضه هي مامتهم وأنا زوجة أبوهم.. مين يضمن لي أنك هتقدر تعبي وتضحيتي علشانك وعلشان ولادك ومش هتعتبره حق مكتسب.. مين يضمن لي أنى مش بعد ما أكبرهم هي تيجي تاخدهم مني على الجاهز.. مين يضمن لي أنك عايز تتجوزني حباً فيا بجد مش علشان ألبي احتياجاتك أنت وولادك.. ليا حق أحتار وأخاف وأقلق كمان ما هو قراري ده أنا لوحدي اللي هتحمل نتايجه.

---------------------------------

(2)

- ماتستغربيش أنى هوافق عليه وهو أكبر مني بأربعين سنة ماهو كله بتمنه.. هخليه يكتب باسمي شقة تمليك بمحتوياتها ، وهتتفرش على أحدث طراز، والشبكة هتكون على حسب اللى يعجبني عند الجواهرجي، وعربية باسمى كمان، ومع كل ده معنديش نية أخلف منه أو حتى أسعى لده.. مافضلش أبداً أني أكون مسئولة عن أطفال لوحدي بعد مايموت ويسيبني؛ ماهو محدش ضامن عمره وهو مش هيعيش قد ما عاش.. لو ينفع كنت حددت مدة معينة للزواج منه واتطلقت وخدت اللي أنا عايزاه وشوفت حياتي بقى مع شاب من عمري..

 ما هو أنا عارفة أني مش هكون زوجة على قد ما هكون مجرد ونيس ولو إداني حقوقي الشرعية النهاردة مش هيديهالي بكره.. يعني مأقلمة نفسي أن غريزتي لن يتم إشباعها بشكل كامل.. لكن معاه هقدر أتمنظر على قرايبي لما يشوفوني عايشة في مكان راقِ ومش ناقصني مادياً حاجة وهي الناس ليها إيه إلا المظاهر.

----------------------------
(3)

- أتساءل كثيراً هل سأصبح أماً جيدة!!. هل سأستطيع تولي هذه المهام بحب وتفاني.. أعتقد أني سأنفذها ليس عن متعة ولكن عن واجب.. ما المتعة في أن أظل أرضع ،وأغير، وأنيم ،وأشيل، وأهدهد حتى يستكين الصغير.. ما المتعة في أني أوقف حياتي لإرضائه.. حتى مشاهدتي للتلفاز يجب أن تكون مقننة طالما هو جواري.. عليَّ أن أستخدم سياسة ضبط النفس ليصبح فرداً سوياً خالياً من العقد.. عليَّ مراعاة مشاعره.. عليَّ تلبية طلباته سريعاً.. عليَّ أن أكظم غيظي تجاه أي تصرف يصدر منه؛ فهو مازال صغيراً ولا يدرك معنى تصرفاته.. عليَّ بسياسة البال الطويل حتى أستوعب أسئلته الكثيرة المتلاحقة.. عليَّ أن تصبح هواياتي الذهاب معه للمراجيح أو لأي مكان آخر يجد فيه متعته.. عليَّ أن تصبح برامج التليفزيون المفضلة لديَّ هي افلام الكرتون.. عليَّ أن ألتزم بكلامي أمامه.. عليَّ أن أعرف معلومات عن كل شيء حتى إذا ما سألني عن أى شيء يجد لدي إجابة واضحة.. ياااه يالها من مهمة شاقة وأرجو أن تكون محببة للنفس.

---------------------
(4)

- حبي له سبب كافي بالنسبة لي لعدم الموافقة على الزواج منه..أنا أصلي بحبه قوي..
 بحبه بزيادة، وعايزة أبقى في عينيه حلوة طول الوقت.. أنا شاكة في حبه لي رغم أنه اتقدم لي .. حتى لوبيحبني  بجد بس أنا بحبه أكتر وده هيضغط على أعصابي طول الوقت.
هبقى عايزة دايما أبقى حلوة في عينيه ،هخاف على مشاعره، مشهقدر يبعد عني،
 أو أنام وهو زعلان أو تعبان وده شيء مرهق جداً..
لكن لو اتجوزت حد عادي بس هو اللي بيحبني هيخليني ملكة..
 وأنا من ناحيتي مش هقصر معاه  بس قلبي معاه هيبقى مرتاح أكتر.